ვანო მერაბიშვილი: ქართველ ხალხს ღირსებას ვერავინ წაართმევს

ვანო მერაბიშვილი საპრეზიდენტო არჩევნებს ეხმიანება. შინაგან საქმეთა ექს მინისტმა „ნაციონალური მოძრაობის“ კანდიდატს გრიგოლ ვაშაძეს არჩევნების პირველ ტურში მიღწეულ შედეგი მიულოცა.

„დიდი სიხარულით მინდა მივულოცო ჩემს მეგობარს, გრიგოლ ვაშაძეს წარმატება. გუშინდელი არჩევნებით ქართველმა ხალხმა დაამტკიცა, რომ მას ღირსებას ვერასოდეს ვერავინ წაართმევს. მიხარია, რომ ჩემი განცდა და სურვილი რეალურად დადასტურდა - ოპოზიცია ერთიანად იბრძვის გამარჯვებისთვის. მეორე ტურში ორმაგი უპირატესობა უნდა დავაფიქსიროთ"- წერს მერაბიშვილი Facebook-ის საკუთარ გვერდზე.

ვანო მერაბიშვილი, რომელსაც 2012 წელს, ხელისუფლების შეცვლამდე პრემიერმინისტრის თანამდებობა ეკავა, მანამდე კი შინაგან საქმეთა მინისტრი იყო, 2013 წლის 21 მაისს დააკავეს. 

საერთო სასამართლოებში მერაბიშვილის მიმართ განხილული საქმეები და სასჯელის ვადები ასე გამოიყურება: 1.“აკურას“ ღვინის ქარხნის უკანონოდ ჩამორთმევის საქმე - 2 წელი და 3 თვე; 2. სანდრო გირგვლიანის საქმეზე მტკიცებულებების გადამალვა - 3 წელი; 3. აქციის დარბევა 2011 წლის 26 მაისს - 4 წელი და 6 თვე; 4. მითვისება გაფლანგვა და ამომრჩევლის მოსყიდვა - 5 წელი; 5. ვალერი გელაშვილზე ფიზიკური ანგარიშსწორება - 6 წელი და 9 თვე. სასჯელის შთანთქმის პრინციპით, ვანო მერაბიშვილს სასჯელის საბოლოო სახედ 6 წლითა და 9 თვით თავისუფლების აღკვეთა განესაზღვრა. ამ განაჩენით, მერაბიშვილს გათავისუფლება 2020 წლის მარტში უწევს.

„ნაციონალური მოძრაობის“ საპრეზიდენტო კანდიდატმა გრიგოლ ვაშაძემ წინასაარჩევნო კამპანიის დროს განაცხადა, რომ გაპრეზიდენტების შემთხვევაში მიხეილ სააკაშვილს, ვანო მერაბიშვილს, ბაჩო ახალიას და სხვადასხვა დანაშაულში ბრალდებული „ნაციონალური“ მთავრობის არაერთ წევრს შეიწყალებს.