WSJ: ტრამპზე თავდასხმის მცდელობაში ეჭვმიტანილი მამაკაცი ადრეც უცნაურად იქცეოდა

აშშ-ის ხელისუფლებას არაერთხელ მიუღია ინფორმაცია იმის შესახებ, რომ 58 წლის რაიან უესლი რუთი, რომელიც პოლიციამ აშშ-ის პრეზიდენტობის კანდიდატზე „რესპუბლიკური“ პარტიიდან დონალდ ტრამპზე თავდასხმის მცდელობის ბრალდებით დააკავა, ადრეც უცნაურად იქცეოდა. ინფორმაციას The Wall Street Journal-ი ავრცელებს.

„შეიარაღებული მამაკაცი, რომელიც პრეზიდენტ დონალდ ტრამპზე თავდასხმის მცდელობაშია ეჭვმიტანილი, მისი პროუკრაინული აქტივიზმის წლებში იმდენად მოუწესრიგებლად იქცეოდა, რომ სხვა ამერიკელები, რომლებიც მას ხვდებოდნენ, ამის შესახებ ხელისუფლებას უყვებოდნენ“, - წერს გაზეთი.

ასე, მაგალითად, მედდამ ჩელსი უოლშმა, რომელიც რუთს კიევში 2022 წელს რამდენჯერმე შეხვდა, განაცხადა, რომ რუთის მიერ ძალადობის შესახებ მუქარები იმდენად აღელვებდა მას, რომ მან ამის შესახებ 2022 წლის ივნისში ვაშინგტონის აეროპორტის საბაჟოსა და სასაზღვრო სამსახურის თანამშრომლებს უამბო. როგორც გამოცემა აღნიშნავს, მაშინ უოლშმა მას ერთ-ერთ ყველაზე სახიფათო ამერიკელი უწოდა, ვისაც ოდესმე უკრაინაში შეხვედრია.

ამერიკის ცენტრალური სადაზვერვო სამმართველოს ყოფილმა თანამშრომელმა სარა ადამსმა კი განაცხადა, რომ რუთი უკრაინაში მომუშავე ჰუმანიტარულ ჯგუფებში „თაღლითისა“ და „შეშლილის“ სახელით იყო ცნობილი. რუთს ვოლონტიორების ჩათში შესვლა აუკრძალეს მას შემდეგ, რაც მან დაწერა, რომ უკრაინის შეიარაღებულმა ძალებმა მისი დაჟინებული თხოვნით რამდენიმე ავღანელი მებრძოლი თავის რიგებში საცდელად აიყვანა. მაშინ აშშ-ის სახელმწიფო დეპარტამენტს განუცხადეს, რომ რუთი, შესაძლოა, ადამიანებით ვაჭრობდეს.

The Wall Street Journal-ის მტკიცებით, მედდა უოლშმა აგრეთვე თქვა, რომ რუთი ადრე რუსეთის პრეზიდენტზე ვლადიმერ პუტინზე და ჩრდილოეთ კორეის ლიდერზე კიმ ჩენ ინზე თავდასხმის სურვილზე საუბრობდა. მან აგრეთვე თქვა, რომ რუთი ტრამპისა და აშშ-ის პრეზიდენტის ჯო ბაიდენის სახელებსაც ახსენებდა, თუმცა ვერ იხსენებს იმას, ემუქრებოდა თუ არა ის მათ.