ადვოკატთა ასოციაციის თავმჯდომარე: ცვლილებები, ეფექტიან საშუალებას მისცემს, ქვეყანაში ოპერირებად ბიზნესკომპანიებს, რომ უფრო მეტად იყოს დაცული თავისუფალი და კონკურენტული გარემო

კონკურენციის შესახებ კანონში ცვლილებების თანახმად, რომელიც 4 ნოემბრიდან შევიდა ძალაში, დაწესდა სანქცია არაკეთილსინდისიერი კონკურენციის შემთხვევებზე. სანქციის სახით კანონდამრღვევს ბრუნვის 1%-მდე ოდენობის ჯარიმა დაეკისრება. ამასთან, საქმის მოკვლევის, კონცენტრაციის შესახებ შეტყობინების განხილვის და მონიტორინგის პროცესში, ეკონომიკური აგენტების მხრიდან სააგენტოს მიერ გამოთხოვილი ინფორმაციის მოწოდება სავალდებულო გახდა. წესის დარღვევის შემთხვევაში - ფიზიკური პირი ათასი, იურიდიული პირი კი 3 ათასი ლარით დაჯარიმდება.

ადვოკატთა ასოციაციაში კონკურენციის სამართლის მიმართულებით საკანონმდებლო ჩარჩოს რეგლამენტაციას და ეფექტურად მოწყობას დადებითად აფასებენ. გადაცემაში „ბიზნესი იმედზე“ საუბრისას იურისტები მიიჩნევენ, რომ ცვლილებები საშუალებას მისცემს ბიზნეს კომპანიებს, რომ უფრო მეტად იყოს დაცული თავისუფალი და კონკურენტული გარემო ბიზნეს ურთიერთობებში.

„ადმინისტრაციული წარმოება, შესაბამის დარღვევებზე რეაგირება, რაც უნდა განხორციელდეს ბიზნეს სუბიექტების მიმართ ან ბიზნეს სუბიექტების კონკრეტული პრეტენზიების გათვალისწინებით,ეფექტიან საშუალებას მისცემს, ქვეყანაში ოპერირებად ბიზნესკომპანიებს, რომ უფრო მეტად იყოს დაცული თავისუფალი და კონკურენტული გარემო.

დიდი გამოცდილება ჩვენს ქვეყანას კონკურენციის სამართლის სფეროში არ აქვს და კარგია, რომ საერთაშორისო პრაქტიკით და მრავალი საერთაშორისო ექსპერტის მონაწილეობით მოხდა ამ საკანონმდებლო ცვლილებების მიღება“, - განაცხადა, ადვოკატთა ასოციაციის თავმჯდომარემ, დავით ასათიანმა.

გარდა ამისა, ცვლილების მიხედვით, გაიზარდა ბაზარზე დომინირებული მდგომარეობის ბოროტად გამოყენების და კონკურენციის შემზღუდველი შეთანხმებების სრულყოფილად შესწავლის პერიოდი და მოკვლევის მაქსიმალური ვადა, 10 თვის ნაცვლად, 18 თვით განისაზღვრა.