ეროვნული ბანკი თიბისი ბანკიდან 4 მილიონის გაცემაზე განცხადებას ავრცელებს

საქართველოს ეროვნული ბანკი ბოლო დღეების სკანდალს ეხმაურება. საუბარია ზაზა ოქუაშვილის ინფორმაციაზე, თიბისი ბანკიდან არასამუშაო საათებში 4 მილიონი ლარის ექვივალენტი უცხოური ვალუტის განაღდებასთან დაკავშირებით. ამის შესახებ GBC.ge-ი წერს. 

"გვსურს, გამოვეხმაუროთ ბოლო დღეებში მედიასაშუალებებით გავრცელებულ ინფორმაციას „თიბისი ბანკიდან“ უცხოურ ვალუტაში გატანილი თანხის შესახებ.

ვაცხადებთ, რომ ინფორმაცია იმის თაობაზე, რომ კომერციული ბანკიდან გაცემული თანხა „თიბისი ბანკმა“ ეროვნული ბანკისგან მიიღო, სიმართლეს არ შეესაბამება. „თიბისი ბანკიდან“ თანხის გატანის პერიოდში კომერციულ ბანკს ეროვნული ბანკის საცავიდან უცხოური ვალუტის ინკასირება არ განუხორციელებია.

დამატებით აღვნიშნავთ, რომ ოპერაციების განხორციელების პროცესში კომერციული ბანკები ვალდებულნი არიან დაიცვან „უკანონო შემოსავლის ლეგალიზაციის აღკვეთის ხელშეწყობის შესახებ“ საქართველოს კანონით და მის საფუძველზე გამოცემული კანონქვემდებარე ნორმატიული აქტებით განსაზღვრული პროცედურები და მოთხოვნები.

აქვე გვსურს განვმარტოთ, რომ ეროვნული ბანკის მიერ საზედამხედველო ღონისძიებების ფარგლებში მიღებული მასალები წარმოადგენს კონფიდენციალურ ინფორმაციას და, შესაბამისად, ეროვნული ბანკი მოკლებულია შესაძლებლობას საჯაროდ ისაუბროს ტრანზაქციის დეტალებთან ან/და ეროვნული ბანკის მიერ განხორციელებულ/განსახორციელებელ ღონისძიებებთან დაკავშირებით. საქართველოს ეროვნული ბანკი, მისი კომპეტენციის ფარგლებში, ყოველთვის მოქმედებს კანონმდებლობის შესაბამისად", - ნათქვამია ეროვნული ბანკის განცხადებაში.

30 ოქტომბერს "ომეგა ჯგუფის" დამფუძნებელმა ზაზა ოქუაშვილმა "რუსთავი 2"-თან ინტერვიუში თქვა, რომ ბიძინა ივანიშვილმა ოპოზიციური პარტიის, „პატრიოტთა ალიანსის“ დაფინანსებამოსთხოვა. მისივე თქმით, მას 4 მილიონი იძულებით გადაარიცხინეს ანგარიშზე, რომლიდანაც 24 საათში თანხა ნაღდი ფულით ყოველგვარი ანგარიშსწორების წესის დარღვევით, შს მინისტრის ზეწოლით გაიტანეს.

ოქუაშვილის მტკიცებით, ამ პროცედურას ესწრებოდნენ თიბისი ბანკის პრეზიდენტი და სამეთვალყურეო საბჭოს თავმჯომარეებიც, რომლებზეც ასევე ხორციელდებოდა ზეწოლა.

„თიბისი ბანკში“ ოქუაშვილის განცხადება უარყვეს.  ბანკში აცხადებენ, რომ ზაზა ოქუაშვილის  განცხადება არ შეესაბამება სიმართლეს.

„ბატონი ოქუაშვილის განცხადებასთან დაკავშირებით, „თიბისი ბანკი“ განმარტავს, რომ ბანკში ყველა ტრანზაქცია სრულდება სამუშაო საათებში, კლიენტის ანგარიშების გახსნისა და წარმოების ყველა წესის დაცვით. „თიბისი ბანკს“ გააჩნია კანონიერი ვალდებულება დაიცვას კლიენტის პერსონალური მონაცემები და საბანკო საიდუმლოება, ამიტომ ბანკის მხრიდან დაუშვებელია კონკრეტული ტრანზაქციისა და კლიენტის შესახებ დეტალების გასაჯაროვება“, - ნათქვამია თიბისი ბანკის განცხადებაში.

„პატრიოტთა ალიანსისთვის“ თანხის გადარიცხვის შესახებ გავრცელებულ ინფორმაციას პარტიის ლიდერი ირმა ინაშვილი სოციალურ ქსელში გამოეხმაურა.

მისი განცხადებით, არჩევნების შემდგომ პერიოდში პარტიას უამრავი აქტივობა ჰქონდა. ჩხეიძე და ოქუაშვილი, როგორც მონაწილეები, პარტიის აქტივობებში, ყოველთვის მონაწილეობდნენ, "მაგრამ არც ერთ შემთხვევაში, არც ქალბატონ ნატოს და არც ბატონ ზაზას, არც მათი მხრიდან რომელიმე მხარდამჭერს ფინანსური თანამონაწილეობა არ გაუღია.

გარდა ამისა, პირველ ოქტომბერს, „ომეგა ჯგუფთან“ დაკავშირებით განცხადება გაავრცელა „საქართველოს ბანკმა“. როგორც ბანკის მიერ გავრცელებულ განცხადებაში წერია, სს „საქართველოს ბანკის“ მიმართ „ომეგა ჯგუფს“ აქვს დავალიანება, რომელიც ჯამურად 84 მილიონ ლარზე მეტს შეადგენს.

ამავე ინფორმაციის მიხედვით, „ომეგა ჯგუფი“ ბანკის მიმართ ვალდებულებებს 2016 წლიდან მოყოლებული არ ასრულებს და ამ დავალიანებასთან დაკავშირებით სასამართლოში დავაა.

სექტემბერში, „იბერიის“ ეთერში, რომლის მფლობელიც „ომეგა ჯგუფია“ პირველი ჩანაწერი გამოქვეყნდა. არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“.

ფინანსთა მინისტრის განცხადებით, „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს.

27 სექტემბერს საგამოძიებო უწყებაში "ომეგა ჯგუფის" სამი დირექტორი დაიბარეს, - მათ შორის: ზაზა ოქუაშვილი, ირაკლი ჩუბინიშვილი და გიორგი ქურდაძე. გიორგი ქურდაძემ საგამოძიებო უწყების დატოვებისას ჟურნალისტებთან განაცხადა, რომ გამომძიებლებთან არ თანამშრომლობს და სასამართლო წესით დაკითხვას ითხოვს.

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო.