თბილისის მერიამ მცირე და საშუალო ბიზნესის დასახმარებლად ბიზნესაქსელერატორი შექმნა

თბილისის მერიის ინიციატივით და ევროკავშირის მხარდაჭერით მცირე და საშუალო ბიზნესის ხელშეწყობის მიზნით, ბიზნესაქსელერატორი Spark-ი ამოქმედდება - წერს Forbes Georgia.

თბილისში რეგისტრირებულ ან მომუშავე ყველა ბიზენსკომპანიას საშუალება ექნება, აქსელერატორს მიმართოს სხვადასხვა საკითხებზე. კერძოდ კონსულტაციისთვის, ფინანსური ანგარიშგებების, საგადასახადო კანონმდებლობისა და ადამიანური რესურსების მართვასთან დაკავშირებულ, იურიდიულ და ბრენდის პოზიციონირების საკითხებზე .

პროექტის ფარგლებში, სიცოცხლისუნარიან და წარმატებულ 100-ზე მეტ კომპანიას აქსელერატორი ვებგვერდებს შეუქმნის, შეუდგენს ბიზნესგეგმას და შესაძლო პარტნიორებთან შემდგომ ადვოკატირებას გაუწევს.პროგრამის ფარგლებში მეწარმეებისთვის 30-მდე გამოფენა-გაყიდვაც მოეწყობა.  

„თბილისის მერიისა და დამსაქმებელთა ასოციაციის ინიციატივით, ევროკავშირთან ერთად, ხელი მოეწერა შეთანხმებას, რომლის მიხედვითაც ერთობლივი ძალისხმევითა და დაფინანსებით ეკონომიკურად აქტიური ადამიანების დახმარება გადაწყდა. საწყის ეტაპზე აღნიშნული პროექტი 4-წლიანია. 2018 წელი იყო მოსამზადებელი პერიოდი, ხოლო მომდევნო სამი წლის გეგმაში სწორედ ამ ადამიანებისთვის დახმარების გაწევაა გაწერილი“ - ამბობს მერიის ეკონომიკური განვითარების საქალაქო სამსახურის უფროსის მოადგილე, ვიქტორ წილოსანი.  

რა სარგებელს მიიღებენ კომპანიები

თბილისში რეგისტრირებულ პირს ან კომპანიას თუ გააჩნია იდეა, ან სურს განვითარება, შეუძლია დარეგისტრირდეს spark. gov.ge -ზე. რის შემდეგაც შესაძლებლობა ექნებათ, ისარგებლონ უფასო სამუშაო სივრცით, ბიზნესის ექსპერტების კონსულტაციით, შეხვედრებისთვის ცალკე გამოყოფილი სივრცით, ასევე მიიღონ კონსულტაციები მენტორებისგან, გაიარონ მათი ბიზნესისთვის მნიშვნელოვანი და საინტერესო ტრენინგები. ყოველთვიურად საუკეთესო იდეის მქონე მინიმუმ ოთხ პირს მსოფლიოში აღიარებული კომპანიები ბიზნესგეგმას შეუდგენენ. მათი ექსპერტული ცოდნის გაზიარება მნიშვნელოვანია როგორც შესაძლო დამფინანსებლებისთვის, ასევე თავად მეწარმეებისთვის, რადგან ისინი წინასწარ დაგეგმვასა და რისკების მართვას შეძლებენ.

ვისთვის იმუშავებს ბიზნესაქსელერატორი

აღნიშნულ პროექტში მონაწილეობის უფლება აქვს ყველას, ვისაც აქვს იდეა და მისი ბიზნესად გარდაქმნა სურს, ასევე არსებულ ბიზნესს, ვისაც აქვს ხედვა და თავისი ბიზნესის განვითარების სურვილი.აღნიშნულ პროცესში პირის ჩართვისთვის და ჩამოთვლილი სერვისებით უფასოდ სარგებლობისთვის საჭირო პროცედურა ძალიან მარტივია. საკმარისია, დაინტერესებული პირი spark.gov.ge -ზე დარეგისტრირდეს.

რა ღირს პროექტი  

ამჟამად მიმდინარეობს კონკურსი, სადაც მსოფლიო ხუთეულში შემავალი საკონსულტაციო კომპანიები იღებენ მონაწილეობას. აღნიშნული კომპანიის შერჩევის შემდეგ გამარჯვებული კომპანია ყოველ წელს სიცოცხლისუნარიან 50 იდეას გამოავლენს, რომელთაც ბიზნესგეგმას დაუწერს. ხოლო შემდგომ მეწარმეებს შესაძლო პოტენციურ პარტნიორებთან პროექტის ადვოკატირებაში დაეხმარება. ბიზნესაქსელერატორის ჯამური ბიუჯეტი 3 მილიონ ლარზე მეტია, რომელსაც თბილისის მერია და ევროკავშირი თანაბრად აფინანსებს. ვინაიდან ამ პროექტის თანადამფინანსებელი თბილისის მერიაა, პროექტში ჩართვა მხოლოდ თბილისში რეგისტრირებულ ფიზიკურ და იურიდიულ პირებს შეეძლებათ. შერჩევა ყოველთვიურად მოხდება. მეწარმეებს ექნებათ 2-თვიანი ვადა, რომ “სპარკის” კონსულტანტებთან ერთად თავიანთი იდეა დახვეწონ, სწორი მონაცემები წარმოადგინონ და პროცესი შეკრან.

2018 წელი სრულად დაეთმო მოსამზადებელ სამუშაოებს. თბილისის მერიის მედიათეკების გაერთიანებამ “სპარკს” კიკვიძის ბაღის შენობა პრაქტიკულად სრულად დაუთმო. დაინტერესებულ პირებს 2019 წლის იანვრის ბოლოდან აღნიშნულ სივრცეში ყველა ზემოხსენებული სერვისების მიღება შეეძლებათ.