21 იანვარი 2019

როგორ აპირებს მერია თბილისელების უსაფრთხოების დაცვას

დედაქალაქის მერის ინფრასტრუქტურული და პოლიტიკური გამოწვევები

არის თუ არა საცხოვრებელი ბინების უსაფრთხოება დაცული - ეს კითხვა მას შემდეგ გაჩნდა, რაც 16 იანვარს დიდ დიღომში ბუნებრივი აირის გაჟონვის გამო საცხოვრებელ კორპუსში აფეთქება მოხდა. მიუხედავად მოქალაქეების სიფხიზლისა „ყაზტრანსგაზის“ წარმომადგენლებმა ვერ დაინახეს საფრთხე შემოწმების დროს, რასაც შეეწირა 4 ადამიანის, მათ შორის მცირეწლოვანი ბავშვის სიცოცხლე. გამოძიება დაიწყო. 2 ადამიანი დაკავებულია. ტრაგედია პოლიტიკური სპეკულაციების საგნად იქცა და ბრალდებების ეპიცენტრში აღმოჩნდა თბილისის მერი. გადაცემის „იმედი live“ წამყვანებს კახა კალაძე დედაქალაქის და მმართველი პარტია „ქართული ოცნების“ გამოწვევებზე ესაუბრა.
 

კახა კალაძე

კახა კალაძე
ფოტო: Facebook

თეონა გეგელია: თქვენი თქმით, ერთ-ერთი პრობლემაა ის, რომ 2009 წელს იმდროინდელმა ხელისუფლებამ გააუქმა მნიშვნელოვანი რეგულაცია. მაგრამ თქვენ ხელისუფლებაში 2012 წელს მოხვედით, მას შემდეგ ბევრი დრო გავიდა და დღეს არგუმენტია ის, რომ თუ რაღაც არ ვარგოდა, უნდა შეგეცვალათ. ამაზე რა პასუხი გაქვთ და კიდევ, მერიამ რა დასკვნა გამოიტანა დიდი დიღმის ტრაგედიიდან? სად არსებობს მთავარი ხარვეზი - კომპანიის მუშაობაში, კანონში, როგორც თქვენ აღნიშნეთ, მშენებლების გულგრილობაში, მოქალაქეების არაინფორმირებულობაში, სად არის ეს პრობლემა და როგორ აპირებთ მომავალში, მსგავსი ფაქტების თავიდან აცილებას?

კახა კალაძე: მინდა კიდევ ერთხელ სამძიმრით დავიწყო და მივუსამძიმრო უბედურების შედეგად გარდაცვლილთა ოჯახებს, ახლობლებს და სრულიად საქართველოს. მართლა დიდი უბედურება დატრიალდა, სამწუხაროდ. თვითონ ჩემს ბრიფინგს რაც შეეხება და 2009 წელს კანონმდებლობაში განხორციელებულ ცვლილებებთან დაკავშირებულ შეკითხვას, ჩემი მხრიდან ეს განცხადება გაკეთებული იყო იმასთან დაკავშირებით, რომ ერთი დღის განმავლობაში ეს პოლიტიკური პარტიები და კონკრეტული ტელეკომპანია თავისი სიუჟეტებით საუბრობდნენ... მე მესმის, რომ პოლიტიკური სპეკულაციებია და მაქსიმალურად ცდილობენ, სათავისოდ გამოიყენონ ეს უბედურება, რაც ძალიან ცუდია და კატეგორიულად მიუღებელია. ისინი საუბრობდნენ იმაზე, რომ შენობა-ნაგებობების ექსპლუატაციაში არ მიღება და ის, რომ იქ ადამიანები ცხოვრობენ, ეს თითქოს რაღაც ერთი კორუფციული სქემაა, რომელიც სადღაც მერიაში დალაგებულია. ბატონ უგულავას ხომ აქვს წესიერებაზე პრეტენზია, მაგრამ ერთხელაც არ გამოსულა და არ აუხსნია, არ უთქვამს საზოგადოებისთვის, რომ მეგობრებო, ეს იყო ჩემი გადაწყვეტილება, რომელიც მივიღე 2009 წელს და განვახორციელე ცვლილებები. გადმოვიდნენ პოლიტიკურ შეტევაზე ამ კონკრეტული თემით. მე, რა თქმა უნდა, მათ არ მივცემდი შესაძლებლობას საზოგადოება შეცდომაში შეეყვანათ და ავხსენი, რეალურად როგორი იყო ეს სიტუაცია. დღეის გადმოსახედიდან, ჩვენ თუ შევხედავთ ამ ცვლილებებს, რა თქმა უნდა, ძალიან მძიმე შედეგი მივიღეთ იმ თვალსაზრისით, რომ დღეს დედაქალაქში გვყავს ათასობით, შეიძლება ათი ათასობით ოჯახი, ვინც ცხოვრობს ისეთ შენობა-ნაგებობებში, რომელიც ექსპლუატაციაში მიღებული არ არის. მე ერთი წელია რაც ოფიციალურად, ჩემს თანაგუნდელებთან ერთად, შევუდექი საქმიანობას და ამ 1 წლის განმავლობაში ბევრი მნიშვნელოვანი რეფორმა განვახორციელეთ. ეს იყო საკანონმდებლო ცვლილებები, ეს იყო ახალი რეგულაციების შემოღება, გამკაცრება მშენებლობებზე. რა თქმა უნდა, ამ მიმართულებითაც ვმუშაობთ, როდესაც სურათი დავინახეთ, თუ რა მძიმე შედეგი მივიღეთ.

თეონა გეგელია: კანონის შეცვლას აპირებთ?

კახა კალაძე: ამის პირდაპირ ცვლილება მოგვცემს სერიოზულ პრობლემას. როგორც ვთქვი, ათასობით ოჯახი ცხოვრობს იმ შენობა-ნაგებობებში, რომელიც არ არის ექსპლუატაციაში მიღებული. როდესაც ამ ცვლილებას აკეთებ, რა უნდა უყო იმ შენობა-ნაგებობებს, იმ ადამიანებს ხომ ვერ გამოიყვან, ხომ ვერ დაანგრევ იმ შენობა-ნაგებობებს?! ეს სერიოზული პრობლემაა, თუმცა ამ მიმართულებით გარკვეულ ცვლილებებს ვამზადებთ და უახლოეს მომავალში წარვუდგენთ საზოგადოებას, როგორი იქნება ჩვენი ხედვა. მე ასევე ყურადღება გავამახვილე და რა თქმა უნდა, ეს უნდა გაიმიჯნოს - ყველა სამსახური, ყველა უწყება თავისი კომპეტენციის ფარგლებში მუშაობს და მოქმედებს. მცდელობა იყო, რომ პირდაპირ დაეკავშირებინათ ექსპლუატაციაში არმიღებული შენობა-ნაგებობები გაზთან, დენთან, წყალთან. მინდა კიდევ ერთხელ განვუმარტო საზოგადოებას, რომ შენობის ექსპლუატაციაში მიღება განისაზღვრება მხოლოდ და მხოლოდ, როცა გაიცემა სამშენებლო ნებართვა. რა თქმა უნდა, არსებობს პროექტი იმ შენობა-ნაგებობის, რომელიც უნდა აშენდეს და როდესაც სრულდება სამუშაოები, ხდება მომართვა და მუნიციპალური ინსპექცია ვალდებულია მივიდეს ადგილზე და დეტალურად შეამოწმოს რამდენად თანხვედრაშია გაცემული ნებართვა, რომელიც პროექტის სახით იყო წარმოდგენილი, უკვე აშენებულ შენობა-ნაგებობასთან.     

გურამ ნიკოლაშვილი: მით უმეტეს, რა კავშირში იყო ეს სიტუაცია ამ კონკრეტულ ტრაგედიასთან, როდესაც დაკეტილ ბინაში მოხდა გაზის დაგროვება?

კახა კალაძე: ეს იყო მხოლოდ და მხოლოდ პოლიტიკური სპეკულაციები და მცდელობა, დარტყმა მოეყენებინათ პირადად ჩემთვის და ზოგადად, მერიისთვის და მერიის სამსახურებისთვის. ეს იყო პირდაპირ დისკრედიტაციის მცდელობა. რაც შეეხება თავად რეგულაციებს, ელექტროენერგიას, გაზს, ეს განსაზღვრულია მარეგულირებელი კომისიის და ცენტრალური მთავრობის განკარგულებით. ეს რეგულაციები გაწერილია მკაფიოდ და მკაცრად. როდესაც ენერგეტიკის სამინისტროში მინისტრად ვმუშაობდი და საკმაოდ დიდ უწყებაზე ვიყავი პასუხისმგებელი, ამ მიმართულებით გარკვეული ცვლილებები განვახორციელეთ და მხოლოდ და მხოლოდ ლიცენზირებულ კომპანიებს მივეცით უფლებამოსილება, რომ თუნდაც ელექტროენერგიის გაყვანა, თუნდაც ბუნებრივი აირის მილების მიყვანა საცხოვრებელ სახლებში გაეკეთებინათ მხოლოდ მათ, ლიცენზირებულ კომპანიებს. არის მეორე მომენტიც, რომელიც ასევე ძალიან მნიშვნელოვანია. ეს არის ის, თუ როგორ გააკეთებენ ამას ადამიანები საკუთარ სახლში, გამათბობელს, გაზქურას. ამას აქვს ძალიან დიდი მნიშვნელობა. უამრავი სამწუხარო ფაქტი მოხდა. ბევრი ადამიანი დაიღუპა იმის გამო, რომ ბუნებრივი აირის გაჟონვა ხდებოდა, კუსტარულად ხდებოდა დაყენება. მახსოვს, ჩემი მინისტრობის პერიოდში მთელი რიგი აქციები გვქონდა „ყაზტრანსგაზთან“ ერთად, ვაცხადებდით, კამპანიები გვქონდა იმასთან დაკავშირებით, რომ მოგვმართეთ, ყოველგვარი ანაზღაურების გარეშე, ყოველგვარი გადასახადების გარეშე მოვა სპეციალური ჯგუფი, შეგიმოწმებთ საკუთარ სახლში განლაგებულ გაზქურებს, გამათბობლებს, რომ დაზღვეულები ვიყოთ მაქსიმალურად.

თეონა გეგელია: ეს შეიძლება არ არის თქვენი კომპეტენცია, კომპანიის თემაა და გასაგებია ისიც, რომ ის ლიცენზირებულია, მაგრამ მეტი ყურადღებით ხომ უნდა იყოს კომპანია? ეს იყო ძალიან ცხადი მაგალითი: გაზის სუნით შეწუხდა მოსახლეობა, გამოიძახეს ადამიანები და მათ ვერაფერი იპოვეს. გასაგებია, რომ ეს ხალხი დღეს დაკავებულია, მაგრამ მე სხვა შემთხვევებიც ვიცი, მიდიან, ვერაფერს პოულობენ და ბრუნდებიან.. აქ რაღაც გზა ხომ უნდა მოიძებნოს, რომ უფრო ყურადღებით იყოს კომპანია? ან კომპანიის პასუხისმგებლობის საკითხი როგორ შეიძლება ამ შემთხვევაში დადგეს, რადგან პოლიტიკური პასუხისმგებლობა თქვენზეა და იმის მიუხედავად, რომ კომპანიის თანამშრომლები ისჯებიან, ეს ხომ გამოსავალი არ არის?

კახა კალაძე: რა თქმა უნდა, ძალიან მნიშვნელოვანია გავიგოთ, რეალურად რა მოხდა. რასთან გვაქვს საქმე, იმ ადამიანების დაუდევრობასთან, კომპანიის პრობლემასთან, ამას, რა თქმა უნდა, გამოძიება დაადგენს. ეს უნდა დაადგინოს გამოძიებამ და საზოგადოების ყველა კითხვას უნდა გაეცეს პასუხი. არის დანაშაული? ყველა დამნაშავემ კანონის წინაშე უნდა აგოს პასუხი.

გურამ ნიკოლაშვილი: ამ ტრაგედიის განვითარებას რომ ვადევნებდით თვალს, თავიდანვე ატყდა სპეკულაცია იმაზე, რომ „ყაზტრანსგაზის“ ბრალია და შემდეგ ეს ძალიან მალე გადაიზარდა თქვენს დადანაშაულებაში, რომ ინტერესებს ლობირებთ...

კახა კალაძე: ინტერესებს კი არა, პირდაპირ აცხადებდნენ იმას, რომ თითქოს ის ჩემი საკუთრება იყო...

გურამ ნიკოლაშვილი: ჩვენ შევისწავლეთ ეს საკითხი. იმ დროისთვის, როდესაც „ქართული ოცნება“ ხელისუფლებაში მოვიდა, „ყაზტრანსგაზი“ უკვე იყო სპეციალური მმართველობის ქვეშ. ყაზახებს ის წართმეული ჰქონდათ. მახსოვს მაშინდელი ამბები, რომ დიდი ხნის განმავლობაში თქვენ გქონდათ არაერთი ვიზიტი, ანუ მოლაპარაკება ყაზახურ მხარესთან მუდმივად გრძელდებოდა, დიდი თანხა იყო გადასახდელი, რომ რაღაც მოგვარებულიყო. 5 წლის განმავლობაში ენერგეტიკის მინისტრი იყავით და ერთადერთი კავშირი, რაც შეიძლება დადასტურებულად ვიპოვოთ, ეს არის ის, რომ „ყაზტრანსგაზის“ დროებით მმართველად მუშაობდა გია ბენაშვილი, რომელიც ახლა არის „ქართული ოცნების“ დეპუტატი და ის ადრეც მუშაობდა „ყაზტრანსგაზში“.

კახა კალაძე: კი, გია ბენაშვილი, შემდეგ მამუკა კობახიძე იყო, რომელიც ასევე მუშაობდა.             

გურამ ნიკოლაშვილი: ეს ადამიანი არის ერთადერთი, რომელიც არის კავშირში „ყაზტრანსგაზთან“, მაგრამ ეს ხდება იმ პერიოდში, როდესაც იქ არის დროებითი მმართველობა. დღეს, როგორც ვიცით, ეს კომპანია გაიყიდა, უკვე ღიად დაიდო ინფორაცია ვისია და აღარ არის ოფშორში დარეგისტრირებული რაღაც კომპანია.

კახა კალაძე: ხვიჩა მაქაცარია, დავით ბეჟუაშვილი არიან ამ კომპანიის მფლობელები, ეს ფაქტი ყველასათვის ცნობილია.

გურამ ნიკოლაშვილი: დიახ, ადამიანები, რომლებიც ძირითადად „ნაციონალური მოძრაობის“ მმართველობის დროს არაერთ კომპანიას ხელმძღვანელობდნენ და საქართველოში ეს ბიზნესები მაშინ დააგროვეს. რანაირად ხდება, სრულიად სხვა პოლიტიკური გუნდთან აფილირებული პირების დაკავშირება თქვენთან და რა საფუძველი აქვს ამ სპეკულაციებს, მით უმეტეს დღეს, როდესაც კომპანია გაიყიდა და მათ შეიძინეს?

თეონა გეგელია: ბატონო კახა, გასაგებია მათი მიზნები, მაგრამ თქვენი აზრით, რა უფრო დამაჯარებელია მოქალაქეებისთვის, მათი ბრალდებები თუ თქვენი საპასუხო არგუმენტები?

კახა კალაძე: გეტყვით. ჩემი უპირატესობა ამ კონკრეტულ პოლიტიკურ ძალასთან, „ნაციონალურ მოძრაობასთან“ არის რამდენიმე რამ. ეს არის ჩემი პატიოსნება. მე არაფერი არ მაქვს დასამალი. რაც გამიკეთებია და შემიქმნია, ყველაფერი დეკლარირებული მაქვს, ამას კანონი მავალდებულებს. თუ რამეს ვიყიდდი, არც ეს მაქვს დასამალი. რატომ დავმალავდი? მაქვს შესაძლებლობები, ღმერთმა მომცა იმის შანსი, რომ მაღალანაზღაურებადი სპორტსმენი ვყოფილიყავი წლების განმავლობაში. ასევე იმის ნიჭი და ინტელექტიც გამაჩნია, როგორ მიმემართა ეს თანხები ჩემი სპორტული მოღვაწეობის დასრულების შემდეგ, რომ მეცხოვრა და ჩემს შვილებს პრობლემები არ ჰქონდეთ. და სიკეთის მეტი არაფერი მიკეთებია, რაც შემიძლია ყველას ვეხმარები და ხელს ვუწყობ.

მეორე, ასევე რაც ამ ადამიანებთან უპირატესობას მანიჭებს, არის ის, რომ ყოველთვის, როდესაც კითხვა ისმის, გამოვდივარ და პასუხს ვცემ. რატომ უნდა დავიმალო, როდესაც თეთრზე ამბობენ შავს. შესაბამისად, ეს უპირატესობები ამ ადამიანებს აღიზიანებთ. ყველაზე მთავარი და მნიშვნელოვანი, რომელიც მათთვის სერიოზულ პრობლემას წარმოადგენს, ეს არის ჩვენი ქვეყნის მოსახლეობის განწყობა და დამოკიდებულება ჩემს მიმართ - სიყვარული, რომელსაც მე ძალიან ვაფასებ. ეს არის ურთიერთობა, რომელსაც მე წლების განმავლობაში ვაშენებ და საკუთარი ოჯახივით, საკუთარი შვილივით ვუფრთხილდები ამ ურთიერთობას. ეს არის, რაც ყველაზე მეტად აღიზიანებთ და არ აწყობთ ამ ადამიანებს.

თეონა გეგელია: ძალიან საინტერესოა, რომ „ნაციონალურ მოძრაობის“ წარმომადგენლები თქვენ დისკრედიტაციას „ნაციონალურ მოძრობასთან“ წარსული კავშირების შეხსენებით ცდილობენ და ამას იყენებენ როგორც კომპრომატს

კახა კალაძე: მე სპორტსმენი ვიყავი, პოლიტიკასთან არანაირი შეხება არ მქონდა. რაც კარგი კეთდებოდა ქვეყანაში ამით ვამაყობდი და მსიამოვნებდა როდესაც ცვლილებებს ვხედავდი, რეფორმები რომ ტარდებოდა. მაგრამ ასევე ვსაუბრობდი მტკივნეულ საკითხებზე ღიად, რაც მათ არ სიამოვნებდათ, მაგრამ ეს ჩემთვის მნიშვნელოვანი იყო.

თეონა გეგელია: გვახსოვს ერთ-ერთი თქვენი საჯარო გამოსვლა ტელევიზიით. ახლა ვნახოთ თქვენი ერთი რეპლიკა, რომელიც ბოლო დღეებში ყველაზე პოპულარული გახდა და შემდეგ გავაგრძელოთ ლაპარაკი.

[ვიდეო. 18 იანვარს თბილისის მერმა ოპონენტების ბრალდებებზე საუბრისას თქვა, რომ მთაწმინდაზე გამოსაქანებელ ადგილს აფართოებს და მათ შეუძლიათ „მთაწმინდიდან გამოექანონ"]

გასაგებია ემოციურად ეს განცხადება. ეს ამ ტრაგედიიდან მესამე დღეა; ვითვალისწინებთ თქვენი ოპონენტების რეპუტაციასაც და ზოგადად, ზოგიერთი პოლიტიკოსის უტიფრობას, ასევე სიყვითლეს, რომელიც პოლიტიკას ახლავს და არა მხოლოდ საქართველოში, არამედ ყველგან გაყვითლდა ლექსიკა; მახსოვს გიგი უგულავას ერთ-ერთი განცხადებაც, რომ „ქართული ოცნება“ ჩუკენობითაა დაკავებული და ამის გამეორებისთვის მე ვიხდი ახლა ბოდიშს, თუმცა უგულავა იყო ის, ვინც გამოვიდა და თქვენ დაგადანაშაულათ არანორმატიულ საუბარში. ეს ყველაფერი მესმის, მაგრამ თქვენი ოპონენტები ხომ არ არიან თქვენი ერთადერთი მსმენელები, არამედ თქვენ გისმენენ მოქალაქეები. ხომ არ ნანობთ, რომ გაცხარებულზე ასეთი რამ თქვით?  

კახა კალაძე: გაცხარებული ნამდვილად არ ვყოფილვარ.

თეონა გეგელია: ცუდ ხასიათზე?

კახა კალაძე: ცუდ ხასიათზე კი, ისეთი უბედურება დატრიალდა, ცხადია, სრულიად საქართველო შეძრა ამ უბედურებამ და ძალიან მძიმე იყო ეს ყველაფერი, რა თქმა უნდა, თუმცა მე საზოგადოებასთან და ადამიანებთან არც ურთიერთობა მეშლება, არც საუბარი, არც ზრდილობა მაკლია. რომ გითხრათ, ვამაყობ-მეთქი ამ განცხადებებით, ნამდვილად არ არის ასე, იმიტომ რომ, ქალაქის მერი ვარ, პოლიტიკოსი... არ დავიწყებ ახლა ამის ახსნას. თუმცა, ეს [ნაციონალური მოძრაობა] არის ადამიანების დაჯგუფება, რომელიც ძირითადად დაკავებულია სიცრუით, ჩაგვრით.

თეონა გეგელია: თქვენი აზრით, მათ სხვა ენა არ ესმით?

კახა კალაძე: სხვა ენა მათ არ ესმით. ამის ძალიან ბევრი არგუმენტი შემიძლია მოვიყვანო. თუმცა ეს არ არის გამამართლებელი, მაგრამ კიდე ერთხელ ვიმეორებ, მე ცენზი არ დამირღვევია, მე ეს ვთქვი ისეთი სიტყვებით, რომელიც ყველასთვის გასაგები იყო. საკმაოდ დიდი პოპულარობა მოიტანა ამ გამონათქვამმა, სხვათა შორის. 

თეონა გეგელია: როგორ აფასებთ თქვენს გუნდში არსებულ მდგომარეობას, როგორ აპირებთ და აპირებთ თუ არა, როგორც პარტიის გენერალური მდივანი, რაღაც დოზით ჩაერთოთ იმ კრიზისულ ვითარებაში, რომელიც თქვენს გუნდში არსებობს სასამართლოსთან დაკავშირებით? ხომ არ აღმოჩნდება ეს თემა უმრავლესობის დაშლის მიზეზი? ასევე, თქვენს პირად დამოკიდებულებაზე თუ შეგიძლიათ გვითხრათ ამ კონკრეტული მოსამართლეების მიმართ, და იმ თქვენი თანაგუნდელების მიმართ, რომლებიც დღეს საკმაოდ კრიტიკულ განცხადებებს აკეთებენ? ზოგადად თქვენ თავად ამ პროცესის მიმართ, რაც ახლა სასამართლოსთან დაკავშირებით ხდება, რა განცდა გაქვთ?

კახა კალაძე: პირველი, დავიწყოთ იქიდან, რაც ზოგადად უმრავლესობაში ხდება. ამასთან დაკავშირებით ახალი წლის წინა დღეებში მომიწია საუბარი და იქაც გავშალე თემა, ვთქვი, რომ ნამდვილად არ არის სასიამოვნო, რაც გუნდში ხდება. დავიწყოთ იმით, რომ ჩვენ მოსახლეობის ძალიან დიდმა ნაწილმა აგვირჩია და მოგვცა ხმა, რომ განვახორციელოთ გარკვეული პროექტები, რომ ხვალინდელი საქართველო იყოს უკეთესი, გამართული ეკონომიკით, გამოსწორებული სოციალური მდგომარეობით და ასე შემდეგ და როდესაც საზოგადოება გიყურებს და დროს ხარჯავ ერთმანეთში კინკლაობაზე, რომ იმან ეს თქვა, შემდეგ ამან ეს უპასუხა, ჩემი აზრით, პრობლემაა.

თეონა გეგელია: თუმცა პოლიტიკური დებატია, რაც ძალიან ნორმალურია, თან ასეთ მნიშვნელოვან საკითხზე.                

კახა კალაძე: მესმის. ნახეთ, როგორი სიტუაციაა. შეიძლება გუნდში იყოს აზრთა სხვადასხვაობა. როდესაც კონსტიტუციური უმრავლესობაა და ამდენი ადამიანია წარმოდგენილი პარლამენტში, რა თქმა უნდა, ყველა ერთ აზრზე ვერ იქნება, მაგრამ გუნდი იმიტომ არსებობს, რომ გუნდის შიგნით მოხდეს კონკრეტული საკითხების, თემების განხილვა. შეიძლება ვიღაცას ჰქონდეს სხვა მოსაზრება კონკრეტულ საკითხზე, მაგრამ მსჯელობაში შეიძლება ჩამოვყალიბდეთ და მივიღოთ ერთიანი გადაწყვეტილება.  

გურამ ნიკოლაშვილი: რა აკლდათ ამ ადამიანებს, ვთქვათ ეკა ბესელიას, სხვებს, რომ განსხვავებული პოზიცია ვერ დააფიქსირეს შიგნით?

კახა კალაძე: მე ვფიქრობ, ეს იყო ურთიერთობის არარსებობა, კომუნიკაციის პრობლემა...

გურამ ნიკოლაშვილი: ვინ არის ამაზე პასუხისმგებელი, რომ ეს ურთიერთობა იყოს? პარლამენტის თავმჯდომარე? უმრავლესობის ლიდერი?

კახა კალაძე: ცალკეულ პიროვნებებს არ ვაბრალებ, მე ვფიქრობ ჩვენი ყველას პრობლემაა ზოგადად, რომ ეს კომუნიკაცია არ შედგა. უახლოეს მომავალში იგეგმება შეხვედრა უმრავლესობასთან და გვექნება მსჯელობა ყველა პრობლემურ საკითხზე, რომელიც აქტუალურია. 

თეონა გეგელია: თქვენი პირადი მოსაზრება როგორია?

კახა კალაძე: მე ცოტა ფართო ჭრილში მინდა დავინახო ყველაფერი. ჩემთვის სახელმწიფოებრივად ყველაზე მთავარი და მნიშვნელოვანია რეპუტაცია სასამართლოსი. ჩვენ თუ ვიმსჯელებთ და ვნახავთ, რა ხდებოდა წლების განმავლობაში, იყო სრული კატასტროფა. სტატისტიკასაც თუ გადავხედავთ გამოტანილი განაჩენების, როგორ ხდებოდა ეს ყველაფერი და დღეს რა მდგომარეობა გვაქვს. უნდა ვთქვათ, რომ გაცილებით უკეთესი მდგომარეობაა, შედარება არ შეიძლება, რაც ხდებოდა 2012 წლამდე.

თეონა გეგელია: ეს არ არის საკმარისი.

კახა კალაძე: ამას ვამბობ. თქვენ თუ შემეკითხებით, ვარ თუ არა კმაყოფილი და ჩვენ ვაკმაყოფილებთ თუ არა ისეთ დონეს, როგორც ევროპულ განვითარებულ ქვეყნებში, გეტყვით, რომ არა. ამ მიმართულებით გვაქვს სამუშაო. არის კონკრეტული რეფორმები განსახორციელებელი, კონკრეტული ნაბიჯები გადასადგმელი. ჩვენ ვისმენთ კონკრეტული მოსამართლეების მიმართ განწყობებს, დამოკიდებულებებს. მე ვფიქრობ, რომ თუ არსებობს კითხვები კონკრეტული მოსამართლეების მიმართ, მოდით, ერთად დავიბაროთ ეს ადამიანები, არის ამის პლატფორმა, გამოვიდნენ და უპასუხონ ყველა იმ შეკითხვას, რომელიც საზოგადოებაში აქტუალურია. თუ არ ვცდები 2013 წელი იყო თუ 2014, ზოგიერთი მოსამართლე გამწესებული იქნა სასამართლოში მაღალ თანამდებობაზე, მაშინ ეს თემა არ აწეულა და ისმის კითხვა, ხომ არ არის რომელიმე პოლიტიკური პარტიის, ან პოლიტიკოსის რაიმე ინტერესი მოსამართლეებთან დაკავშირებით?!

თეონა გეგელია: ეს ინტერესი რომ არის, ეს ფაქტია, მაგრამ...  

კახა კალაძე: მე რაზეც ვარ თანახმა და რასაც მივესალმები, ეს არის კრიტერიუმების განსაზღვრა. ვფიქრობ, რომ აუცილებელია ეს კრიტერიუმები განისაზღვროს და რაც უფრო ფართო იქნება ეს ჯგუფი, ვინც კრიტერიუმებს განსაზღვრავს, მხოლოდ და მხოლოდ მისასალმებელია. ასევე, როდესაც პარლამენტის თავმჯდომარე საუბრობდა იმაზე, რომ ამას მიეცემა უკუძალა და შესაძლებელი იქნება ის სია, რომელიც პრობლემურია, თავიდან გადაიხედოს, ეს მხოლოდ და მხოლოდ მისასალმებელია. მთავარია, სასამართლოს რეპუტაცია და გამჭვირვალედ იყოს ყველაფერი.

თეონა გეგელია: უშვებთ იმ აზრს, რომ ეს თემა შეიძლება გახდეს „ოცნებაში“ სერიოზული განხეთქილების მიზეზი თუ პრობლემის დაძლევა შეიძლება?

კახა კალაძე: მე ვერ ვხედავ ამ პრობლემას. თქვენ მოისმინეთ პარტიის თავმჯდომარის განცხადება. ჩვენ ყველას გვაქვს ის დამოკიდებულება, რაც კრიტერიუმებთან დაკავშირებით იქნა გაჟღერებული, რომ ყველა პროცესი უნდა იყოს ღია, გამჭირვალე, რომ საზოგადოებაში არ დარჩეს რაიმე კითხვა.

გურამ ნიკოლაშვილი: კრიტერიუმების მიუხედავად უკვე ჩანს იმის განწყობა და არასამთავრობო ორგანიზაციებმაც ცალსახად თქვეს, რომ კი, კრიტერიუმები ძალიან მნიშვნელოვანია და დაე განვსაზღვროთ, მაგრამ ამის მიუხედავად იძახიან, რომ ჩვენ გვაქვს მოსამართლეების 20-კაციანი სია, ისინი უნდა წავიდნენ სისტემიდან. განსხვავებით 2013 წლისგან, როდესაც უფრო დადებითი შეფასებები კეთდებოდა, დღეს მათ პრაქტიკულად დაავიწროვეს სამიზნე აუდიტორია, ვინც მოიაზრება, არ ვიცი როგორ ვთქვა, პირდაპირ ხელისუფლების გავლენის ბერკეტად სასამართლოში. პირდაპირ ხდება ამ მოსამართლეების, ასე ვთქვათ, განდევნა.

კახა კალაძე: თუმცა ხელისუფლებას ჰქონდეს რაიმე ბერკეტი სასამართლოზე, ამაში ვერ დაგეთანხმებით...

თეონა გეგელია: ასე ხდება წარმოჩენა ამის...

კახა კალაძე: ძალიან ბევრი გადაწყვეტილება შეგვიძლია ვნახოთ და მე მგონია, რომ დღეს სასამართლო არის თავისუფალი ისე, როგორც არასდროს. თუმცა, რა თქმა უნდა, მინდა უფრო უკეთესი და უფრო მნიშვნელოვანი რეფორმები განხორციელდეს ამ მიმართულებით.

გურამ ნიკოლაშვილი: [არასამთავრობო] ორგანიზაციებში აქვთ ეჭვი გავლენებზე, ხოლო იგივე „ოცნების“ წევრებში მაინც მგონია, რომ არის სუბიექტური ფაქტორი. განსაკუთრებით სუბიექტურნი არიან ის ადამიანები, ვინც იურისტები იყვნენ, როდესაც მონაწილეობდნენ რაღაც პროცესებში და ის მოსამართლეები იყვნენ, ვისაც მაშინდელი კონიუნქტურის შესაბამისად გამოჰქონდა გადაწყვეტილებები. თქვენც გახსოვთ, როცა 2012 წლამდე საარჩევნო კამპანიაში მონაწილეობდით, რა რთული იყო ეს და ალბათ, ერთ-ერთი უმძიმესი ბრძოლა გაიარეთ, რაც სასამართლოს მეშვეობით ხდებოდა.   

კახა კალაძე: ამიტომ საუკეთესო გამოსავალია კრიტერიუმების ჩამოყალიბება, რომ კრიტერიუმებმა განსაზღვროს იმ კანდიდატთა სია, ვისაც სურვილი ექნება გამწესდეს მოსამართლედ.

გურამ ნიკოლაშვილი: კარგით, მაშინ დავუბრუნდეთ ქალაქის საკითხებს. ეს არის გენგეგმის საკითხი. უამრავ ნეგატიურ მემკვიდრეობასთან ერთად, რაც წილად გხვდათ, როგორც ქალაქის თავს, იყო რაღაც პროცესები, რომელიც დაიწყო მანამდე და ერთ-ერთი არის გენგეგმა, რომელიც მიღებულია, დამტკიცებულია, თუმცა უკვე ქმნის გარკვეულ პრობლემებს. ერთ-ერთი არის ის, რომ იცვლება ზონირება. ადამიანებმა, რომლებმაც რაღაც გარკვეული ნაკვეთები შეიძინეს და მაშინ ეს არ იყო სარეკრეაციო ზონა, რუკაზე აღმოაჩინეს, რომ იქ უკვე სარეკრეაციო ზონაა, რაც პრაქტიკულად ართმევს მათ იმის საშუალებას, რომ მშენებლობაზე განაცხადი შეიტანონ. რა ეშველება ამ ხალხს?

კახა კალაძე: ეს ყველაფერი გაწერილია გენგეგმაში, თუ როგორ უნდა მოქმედებდეს დედაქალაქის მერია. ზოგადად, გენერალური გეგმის მიღებას რაც შეეხება, ეს თებერვლის შუა რიცხვებში მოხდება, ეს გადაგზავნილია საკრებულოში და რეგულაციებზე მიდის მუშაობა, როგორ უნდა მოხდეს ახალი გენგეგმით სწორად მუშაობა, როგორ უნდა წარიმართოს პროცესები. რაც შეეხება თქვენს დასმულ შეკითხვას, თუ რა ეშველება ამ ადამიანებს, ეს გაწერილია გენგეგმაში. არის რამდენიმე ვარიანტი, ეს არის ადგილმონაცვლეობა, ეს არის ზონის შეცვლა და ეს არის გამოსყიდვა. რა თქმა უნდა, უნდა შეხედო ბიუჯეტს, ყველაფერი თანხებზეა დამოკიდებული.

თეონა გეგელია: საკმაოდ ძვირად აქვთ თან ნაყიდი მიწები. მაგალითად, „კაკლებს“ რომ ეძახიან იმ ტერიტორიაზე.

კახა კალაძე: ბევრია ასეთი ადგილი. თუმცა ჩვენ როცა გენერალურ გეგმაზე დავიწყეთ მუშაობა, გაცილებით მეტი ტერიტორია იყო მონიშნული და შემდეგ მოგვიწია მუშაობა. ისეთი ადგილები იყო, რომელშიც აზრს ვერ ხედავდა ადამიანი და შემდეგ მოგვიწია ამის კორექტირება. საკმაოდ ნაყოფიერად ვიმუშავეთ გენგეგმის ჯგუფთან და უახლოეს მომავალში გენერალური გეგმა იქნება მიღებული. თუმცა, კიდევ ერთხელ ვიმეორებ, ძალიან ბევრი პრობლემური საკითხი გვერგო მემკვიდრეობით. ჯერ კიდევ უგულავას მერობის დროინდელი საკითხები, ნაღმები, რომლებიც გვიფეთქდება.

თეონა გეგელია: ნარმანიას კუდებიც ბევრია, ბატონო კახა       

კახა კალაძე: ნარმანიასი ჯერ არ შემხვედრია, თუმცა თუ იქნება, მაგისიც არ მომერიდება, მაგასაც ვიტყვი.

თეონა გეგელია: როგორც ვიცი, „კაკლებში“ აქტიურად იყიდებოდა მიწები ნარმანიას დროს.

კახა კალაძე: მე მაგის არ მომერიდება, უბრალოდ ისეთ დიდ თემებზე ვსაუბრობ, როგორიცაა მაგალითად, ვაკის პარკში გაცემული სამშენებლო ნებართვა. 30-მეტრიან 5-ვარსკვლავიან სასტუმროზე. დაახლოებით 8-9 სართულიანი კორპუსის ჩადგმის ნებართვაა გაცემული.

გურამ ნიკოლაშვილი: 5 წელი შეუსრულდა ამ პრობლემას, რაც ის გახდა საჯარო და დაიწყო მოქალაქეების დიდი პროტესტი. ეს ხდება ჯერ კიდევ ნარმანიამდე. უგულავა, როგორც მერი მოხსნილი იყო, ის დროებით შემსრულებელი იყო იმ პერიოდში და რა მექანიზმებიც ახლა ახსენეთ, ეს არის ყველაზე მკაფიო მაგალითი, რომლის გამოყენებაც, ალბათ, გონივრულია. ერთის მხრივ, რესტორან „ბუდაპეშტის“ მფლობელებს გააჩნიათ ყველაზე უფრო მყარი დოკუმენტაცია იმათგან, ვინც ვაკის პარკში გასხვისებულ სხვა ნაკვეთებს ფლობს. ერთ-ერთი პირველი და ძირძველი ნაკვეთია ვაკის პარკში, რომლის პრივატიზებაც მოხდა, მაგრამ მეორე მხრივ, ყველაზე დიდი პროტესტი მოჰყვა სწორედ ამ მშენებლობას. ეს პრობლემა ლამის შევარდნაძის დროიდან იღებს სათავეს, იმიტომ რომ, 1998 წელს მიღებული კანონის თანახმად, მოიჯარეებს მიეცათ უფლება, რომ ნორმატიულ ფასად გამოესყიდათ 99 წლიანი იჯარით აღებული ტერიტორია. შემდეგ უკვე უგულავას დროს მას დაუმტკიცეს პროექტი, რომ აეშენებინათ.       

კახა კალაძე: 2013 წელს დაიწყო ეს ყველაფერი. პირველი ნებართვა გაცემული იყო რესტორნის რეაბილიტაციაზე, მანდ ხომ ცნობილი რესტორანი „ბუდაპეშტი“ იყო და შემდეგ რამდენიმე თვეში, დაჩქარებული წესით გაიცა ნებართვა 30-მეტრიანი, დაახლოებით 8-9-სართულიანი სასტუმროს მშენებლობაზე. ამას მოჰყვა შემდეგ სარჩელი. მინდა ვისარგებლო შემთხვევით და მადლობა გადავუხადო ყველა იმ ადამიანს, ვინც იცავს ამ ტერიტორიას.

თეონა გეგელია: სასამართლოს გადაწყვეტილება აქვთ. მერიამ განაცხადა, რომ ყველა ბერკეტს გამოიყენებს, რომ ეს შენობა არ აშენდეს. სასამართლო გადაწყვეტილების შემდეგ რა შანსები გაქვთ?

კახა კალაძე: ძალიან რთული სიტუაცია გვაქვს. არსებული რეალობა ძალიან მძიმეა.

თეონა გეგელია: დღევანდლამდე, ამ გადაწყვეტილებამდე, გქონდათ თუ არა რაიმე რესურსი? ისიც ითქვა, რომ აი რას აკეთებდა მერია აქამდე?

კახა კალაძე: ჩვენ რა უნდა გაგვეკეთებინა, საქმე სასამართლოში იყო და განხილვა მიდიოდა.

გურამ ნიკოლაშვილი: ნარმანიას დროს ერთადერთი ბერკეტი, რაც გამოყენებულია, არის ის, რომ მშენებლობის ნებართვასთან ერთად მათ კიდევ ბევრი რამ უნდა წარმოედგინათ, მათ შორის, იყო გამწვანების გეგმა, ნარგავების გადარგვა. მშენებლობა შეჩერებულია, მაგრამ დოკუმენტაციის წარმოების პროცესი მიმდინარეობდა და ეს იყო დახარვეზებული. ბოლო დოკუმენტი რაც მოვიძიე, სწორედ ესაა. ეს ხდება 2016 წელს. ეს ტექნიკური დეტალებია, ადამიანებს საბოლოო ჯამში აინტერესებთ, იქ რა აშენდება. ეს ურთულესია. ეს ხელისუფლება იცავს მესაკუთრის უფლებებს და ძნელია ამ ადამიანებს წაართვა, მაგრამ მშენებლობის ნებართვას გასცემს მერია, რომელსაც შეუძლია დაუშვებლად ცნოს, რომ ამხელა მოცულობის შენობა იქ აშენდეს, რომელიც იქ დომინანტი გახდება მთელ მიმდებარე სივრცეზე. სად შეიძლება კონსენსუსის მონახვა, ან თუ არის საერთოდ რესურსი, რომ მესაკუთრესთან მოლაპარაკება მოხდეს?

კახა კალაძე: მესმის. ძალიან მძიმე სიტუაციაა. 2016 წელს მათ მშენებლობის ნებართვის ვადა გაუვიდათ და მიმართული ჰქონდათ მერიისთვის, რომ გაეგრძელებინათ ვადა, მაგრამ გაგრძელება არ მოხდა, იმიტომ რომ, მოსთხოვეს გამწვანების პროექტი, რაც მფლობელმა არ მიიტანა. თუმცა სასამართლოს გადაწყვეტილებაში, ყველაზე მძიმე და ცუდი რაც არის, წერია ის, რომ მშენებლობაზე გაცემული ნებართვა პრობლემას არ წარმოადგენს-ო და ინვესტორებს მშენებლობის ნებართვა მერიამ უნდა აღუდგინოს. თუმცა აქ მთავარია, ჩვენი მიზანი რა არის. ჩვენი მიზანი არის, რომ ჩემთვის და ჩემი გუნდისთვის კატეგორიულად მიუღებელია ამხელა შენობა-ნაგებობის აშენება მწვანე სივრცეში. დღეს ყველაზე დიდი პრობლემა, რაც ქალაქს გააჩნია, არის მწვანე სივრცის ნაკლებობა, გაჩეხილი სკვერები და ასეთ ადგილებში მშენებლობებზე გაცემული ნებართვები, გამწვანების ვალდებულების გარეშე. ეს საერთო ჯამში ქმნის ყველაზე დიდ პრობლემას. მე ხვალ მაქვს შეხვედრა ინვესტორთან, ამ ადამიანებთან. მათი არაკეთილსინდისიერი განცხადებებიც მოვისმინე, თუმცა ჩვენ ყველაფერს გავაკეთებთ იმისთვის, რომ ქალაქის ინტერესებიდან გამოვიდეთ.

გურამ ნიკოლაშვილი: თქვენ ბერკეტები ჩამოთვალეთ, ადგილმონაცვლეობა, კომპენსაცია...

კახა კალაძე: კი, რა თქმა უნდა, ადგილმონაცვლეობის თემა არის, კომპენსაციაზეც წამსვლელები ვართ. რა თქმა უნდა, ეს ყველაფერი უნდა იყოს გონივრულობის ფარგლებში.

გურამ ნიკოლაშვილი: თუ ეს ნაკვეთი იყიდეს ნორმატიულ ფასად, მე გამოვიანგარიშე კიდევაც და დღევანდელი ნორმატიული ფასითაც რომ მოხდეს ამის გამოსყიდვა, ეს პრინციპში გონივრული თანხა იქნება.

კახა კალაძე: ინვესტორი ამას შეაფასებს როგორც მშენებლობის ნებართვით და თქვენ წარმოიდგინეთ, მშენებლობის ნებართვით, არსებულ ტერიტორიას გაცილებით დიდი ფასი აქვს, ვიდრე, როდესაც არ აქვს მშენებლობის ნებართვა. ანუ, ძალიან რთული საუბარი გვექნება, ჩვენ მზად ვართ ყველანაირად და ხვალ გვექნება ეს შეხვედრა.

ვიდეო 

სხვა ინტერვიუები