ირაკლი მეზურნიშვილი: საქართველოსა და იაპონიას ძალიან ბევრი რამ აკავშირებს, ჩვენს ორ ქვეყანას შორის ძალიან ძლიერი ემოციური ბმა არსებობს

ფილმის შექმნის იდეა კულტურის კომიტეტში დაიბადა, როდესაც იაპონიის ელჩთან შეხვედრაზე ვსაუბრობდით ორ ქვეყანას შორის კულტურულ ურთიერთობებზე და იქ გაჩნდა იდეა, რომ ჩვენ შეგვექმნა ფილმი, რადგან თურმე ძალიან ბევრი რამ აკავშირებს ამ ორ ქვეყანას. ძალიან ძლიერი ემოციური ბმაა, ტრადიციების პატივისცემა, ოჯახის კულტი, უფროსების პატივისცემა და ძალიან საინტერესო მოგზაურობა ელის თითოეულ მაყურებელს, - ამის შესახებ „იმედის“ გადაცემაში „იმედი LIVE“ საპარლამენტო უმრავლესობის წევრმა, ფილმის „საქართველო - იაპონია,საუკუნის მესამედი“ ავტორმა ირაკლი მეზურნიშვილმა განაცხადა.

„რამდენიმე წლის წინ ჩემს გუნდთან, სტუდია „პულსთან“ ერთად დავიწყეთ სრულიად ახალი მიმართულება - დიპლომატიის დოკუმენტალისტიკა. გადავიღეთ რამდენიმე დოკუმენტური ფილმი, რომელიც ასახავს ორი ქვეყნის მეგობრობის ისტორიას, ქრონოლოგიას. ამ ფილმში მონაწილეობა მიიღეს ელჩებმა, რომლებიც იყვნენ მოვლენილი მისიებით ჩვენს ქვეყანაში. საინტერესო იყო ის ხაზი, რომელიც ჩვენ დავიწყეთ. ეს იყო მათი თვალით დანახული საქართველო. პოლიტიკური პროცესების შეფასება, ეს იყო ძალიან ობიექტური და ამითაც ფასობს ეს პროექტი. მთელი მსოფლიოს მოვლა მიწევდა, თავგადასავლებით სავსე პროცესი იყო. პირველი იყო აშშ-თან, შემდეგ დიდ ბრიტანეთთან, გერმანიასთან და ყველა ამ ფილმის პრემიერა შედგა „იმედის“ ეთერში, რისთვისაც მადლობას ვუხდი თქვენს გუნდს. მე ვერც წარმოვიდგენდი, რომ იაპონიის სერია შეიქმნებოდა. ეს იდეა კულტურის კომიტეტში დაიბადა, როდესაც იაპონიის ელჩთან შეხვედრაზე ვსაუბრობდით ორ ქვეყანას შორის კულტურულ ურთიერთობებზე და იქ გაჩნდა იდეა, რომ ჩვენ შეგვექმნა ფილმი, რადგან თურმე ძალიან ბევრი რამ აკავშირებს ამ ორ ქვეყანას. ძალიან ძლიერი ემოციური ბმაა, ტრადიციების პატივისცემა, ოჯახის კულტი, უფროსების პატივისცემა და ძალიან საინტერესო მოგზაურობა ელის თითოეულ მაყურებელს. დღეს ტოჩინოშინმა დაასრულა კარიერა. მან ერთგვარი რევოლუცია მოახდინა. სუმო და ძიუდო იაპონიაში რელიგიის რანგში არის აყვანილი, საოცარი პოპულარობით სარგებლობს სპორტის ეს ორი სახეობა და ორივეში ძალიან დიდი წარმატებები გვაქვს. ტოჩინოშინმა იმხელა კვალი დატოვა იაპონიაში, ყველაზე დიდი ელჩის როლი შეასრულა საქართველოს პოპულარიზაციის კუთხით და ეს თითქმის წარმოუდგენელიც იყო, იმიტომ რომ სუმო ძალიან დახურულია და იქ მოხვედრა ძალიან რთულია“, - აცხადებს ირაკლი მეზურნიშვილი.