მესხეთის თეატრის დირექტორი: მოხარული ვარ, რომ საერთაშორისო ფესტივალს ვმართავთ

მესხეთის სახელმწიფო თეატრი „ეროვნული დრამატურგიის მეშვიდე საერთაშორისო თეატრალურ ფესტივალს“ მასპინძლობს. ინფორმაციას მესხეთის თეატრი ავრცელებს.

„ფესტივალი უკვე მეცხე დღეა მიმდინარეობს. მაყურებლის წინაშე, 8 თეატრალური დასი წარდგა.

„ეროვნული დრამატურგიის საერთაშორისო თეატრალური ფესტივალის“ მნიშვნელობაზე საუბრობს თეატრის დირექტორი, ირაკლი ათუნაშვილი.

„მივესალმები „ეროვნული დრამატურგიის მეშვიდე საერთაშორისო თეატრალური ფესტივალის“ მონაწილეებს. მოხარული ვარ, რომ მონაწილე ვარ, საერთაშორისო ფესტივალის ორგანიზებაში. ვიმედოვნებ, რომ მომავალ წლებში, ფესტივალო გაიმართება მესხეთის განახლებულ და თანამედროვე ტექნიკით აღჭურვილ თეატრში. ღრმად მწამს, რომ გაიზრდება საზღვარგარეთის თეატრების მონაწილეობა, რაც მომავალში, ჩვენი ქვეყნების ურთიერთობის განმტკიცებას და დამეგობრებას შეუწყობს ხელს“, - აცხადებს ათუნაშვილი.

ფესტივალის ფარგლებში, დღეს, 23 მაისს, რუსთავის გიგა ლორთქიფანიძის სახელობის დრამატული თეატრი გამართავს სპექტაკლს: „მზის დაბნელება საქართველოში“. მომდევნო დღეებში მესხეთის თეატრის სცენა ეთმობა კიდევ 12 თეატრს.

31 მაისს, მესხეთის თეატრის სცენაზე თურქეთის, ტრაპიზონის თეატრი გამართავს სპექტაკლს: „ვეძებთ მოხუც კლოუნს“

1 ივნისს, კი მოლდოვის, იონ ლუკა კარაგეალის ეროვნული სატირული თეატრი „ჰამლეტს“ ითამაშებს.

2 ივნისს ფესტივალს დახურავს მესხეთის დრამატული თეატრი“, - აღნიშნულია ინფორმაციაში.