თეა ონიანი: სვეტიცხოვლის ტაძრის სამხრეთ ნაწილში მოხდა წყლის ინფილტრაცია, გავრცელებული ინფორმაცია, თითქოს ტაძარს ემუქრება შეუქცევადი დაზიანების საფრთხე, არ შეესაბამება რეალობას

სვეტიცხოვლის ტაძრის სამხრეთ ნაწილში მოხდა წყლის ინფილტრაცია. სააგენტოს ხელმძღვანელობა მონიტორინგის ჯგუფთან ერთად დაუყოვნებლივ გამოცხადდა ადგილზე, მოხდა ვითარების პირველადი შესწავლა და იმ კერების გამოვლენა, საიდანაც შეიძლება მომხდარიყო წყლის ინფილტრაცია, - განაცხადა კულტურული მემკვიდრეობის დაცვის ეროვნული სააგენტოს ხელმძღვანელმა თეა ონიანმა.

„ბუნებრივია სპეციალისტებთან ერთად, იუნესკოსთან შეთანხმებით, მოხდება ტაძრის გრძელვადიანი საკონსერვაციო სამუშაოების და პროექტირების განხორციელება. სამწუხაროდ გარკვეულმა პირებმა, იმის ნაცვლად, რომ კონკრეტულად გაეანალიზებინათ შექმნილი პრობლემა, საკუთარი პიარის მიზნით თუ პოლიტიკური მოტივებით, გაავრცელეს აბსოლუტურად არასწორი ინფორმაცია, რომ ტაძარში არის კატასტროფული მდგომარეობა, რომ ტაძარს ემუქრება შეუქცევადი დაზიანების საფრთხე, რაც არანაირად არ არის სწორი“, - აღნიშნა თეა ონიანმა.

თეა ონიანი ერთ-ერთ არხზე გასულ სიუჟეტს გამოეხმაურა. სააგენტომ უხვი ნალექის შედეგად სვეტიცხოვლის სამხრეთ ნაწილში წყლის მცირე ინფილტრაციის პროცესი შეისწავლა. უწყებაში განმარტავენ, რომ სარეაბილიტაციო პროცესი ხვალიდან დაიწყება. რაც შეეხება ტაძარს, ან ფრესკებს საფრთხე არ ემუქრება.