Financial Times-მა დაასახელა სამი მიზეზი, რომელთა გამოც ისრაელის უსაფრთხოების სამსახურებმა „ჰამასის“ თავდასხმის აღკვეთა ვერ შეძლეს

7 ოქტომბერს „ჰამასის“ მიერ განხორციელებულმა თავდასხმამ შეარყია ისრაელის რწმენა საკუთარი სამხედრო და სადაზვერვო სამსახურების მიმართ - პასუხისმგებელმა უწყებებმა არა მხოლოდ ვერ აღკვეთეს ერთ-ერთი მთავარი მოწინააღმდეგის გეგმები, არამედ უამრავი გაფრთხილების იგნორირება მოახდინეს, - ამის შესახებ გამოცემა Financial Times-ი წერს.

სტატიის ავტორები, ჯონ პოლ რეთბონი და ნერი ზილბერი აღნიშნავენ, რომ დაზვერვის მიერ დაშვებულ შეცდომასთან დაკავშირებით საბოლოო დასკვნების გამოტანა მხოლოდ წლების შემდეგ, სრული გამოძიების შედეგად იქნება შესაძლებელი, უკვე ნათელია, რომ მოვლენების ასეთ განვითარებას რამდენიმე ფაქტორმა შეუწყო ხელი.

მათი აზრით, ისრაელის უსაფრთხოების სამსახურებმა სათანადოდ ვერ შეაფასეს „ჰამასის“ უნარი, ჩაეტარებინა ასეთი ფართომასშტაბიანი ოპერაცია, მიეღო აუცილებელი მკაცრი უსაფრთხოების ზომები, დისციპლინური დაგეგმვითა და ისრაელის ტერიტორიის ზედმიწევნით შესწავლით. გამოცემა აღნიშნავს, რომ ანალოგიური შეცდომა ისრაელმა 50 წლის წინ, იომ-ქიფურის ომის წინ დაუშვა, როდესაც იფიქრა, რომ მისი სამხედრო სიძლიერის გამო არაბული ქვეყნები არასოდეს დაესხმებოდნენ თავს.

Financial Times-ის თანახმად, ისრაელის წარუმატებლობის მეორე მიზეზს „ტექნოლოგიური ქედმაღლობა“ წარმოადგენდა. ისრაელი დარწმუნებული იყო, რომ მოწინავე ტექნოლოგიები - საჰაერო დრონები და სენსორებით აღჭურვილი სასაზღვრო ღობე - საკმარისი იქნება „ჰამასის“ უფრო მოკრძალებული ტექნოლოგიური შესაძლებლობების წინააღმდეგ. სტატიის ავტორები აღნიშნავენ, რომ მრავალი წლის განმავლობაში „ცაჰალი“ ამ ტექნოლოგიების საშუალებით საზღვრის უკანონო კვეთის თითქმის ყველა ფაქტს აფიქსირებდა, თუმცა ამანვე შეუქმნა ისრაელს უსაფრთხოების მცდარი შეგრძნება.

კიდევ ერთ ფაქტორად, რომელმაც ხელი შეუშალა ისრაელს „ჰამასის“ თავდასხმის პრევენციაში, გამოცემა ასახელებს ნეთანიაჰუს შიდა პოლიტიკით გამოწვეულ პოლიტიკურ დაპირისპირებას, რომელმაც დაასუსტა ეროვნული უსაფრთხოება და მოადუნა სადაზვერვო სამსახურების ყურადღება.