ბაიდენი ტრამპს უფლებამოსილების ბოროტად გამოყენებაში ადანაშაულებს

Washington Post-ში გამოქვეყნებულ სტატიაში აშშ-ის ყოფილმა ვიცეპრეზიდენტმა ჯო ბაიდენმა დონალდ ტრამპს უფლებამოსილების ბოროტად გამოყენებაში დაადანაშაულა. 

ბაიდენმა თავისი ოპონენტი გააკრიტიკა და აღნიშნა, რომ ტრამპს არ შეუძლია იყოს პრეზიდენტი. დემოკრატი პოლიტიკოსი მიიჩნევს, რომ თეთრი სახლის ლიდერი პოსტს პირადი და არა ეროვნული ინტერესებისთვის იყენებს. 

ბაიდენის განმარტებით, ტრამპი თავის პასუხისმგებლობას ვერ იაზრებს და ის აშშ-ის პირველ პრეზიდენტს ჯორჯ ვაშინგტონს შეადარა. „როგორც ცნობილია, ჯორჯ ვაშინგტონს ტყუილის თქმა არ შეეძლო. ტრამპს კი როგორც ჩანს, სიმართლის თქმა არ შეუძლია"- განაცხადა ბაიდენმა.

5 ოქტომბერს ცნობილი გახდა, რომ დემოკრატებმა ტრამპი-ზელენსკის საუბრის დოკუმენტაცია გამოითხოვეს. შესაბამისი მოთხოვნა აშშ-ის პრეზიდენტის იმპიჩმენტის პროცედურას უკავშირდება.

სექტემბერში აშშ-ის დაზვერვის თანამშრომელმა დონალდ ტრამპის წინააღმდეგ საჩივარი დაწერა, რომელიც მისი და ერთ-ერთი უცხოელი ლიდერის საუბარს ეხებოდა. მოგვიანებით აღმოჩნდა, რომ ეს ლიდერი უკრაინის პრეზიდენტი ვოლოდიმირ ზელენსკი იყო.

ჩანაწერის თანახმად, ტრამპმა სატელეფონო საუბრის დროს აშშ-ის ყოფილი ვიცეპრეზიდენტის, ჯო ბაიდენისა და მისი შვილის საკითხი განიხილა. აშშ-ის კონგრესის დემოკრატმა წევრებმა კი გამოთქვეს ვარაუდი, რომ კორუფციასთან ბრძოლის საფარქვეშ ტრამპი უკრაინის ხელისუფლებას თავისი ოპონენტების წინააღმდეგ სისხლის სამართლებრივი დევნის დაწყებას აიძულებდა.

ამის შემდეგ თეთრმა სახლმა პრეზიდენტ დონალდ ტრამპსა და უკრაინის ლიდერ ვოლოდიმირ ზელენსკის შორის 25 სექტემბერს შემდგარი სატელეფონო საუბრის სტენოგრამა (.pdf) გამოქვეყნა. მანამდე კი თავად ზელენსკიმაც დაადასტურა, რომ სატელეფონო საუბრისას ტრამპი მას ბაიდენზე ზემოქმედებისკენ არ უბიძგებდა.

მიუხედავად ამისა, აშშ-ის წარმომადგენელთა პალატის ნაწილმა დონალდ ტრამპის წინააღმდეგ იმპიჩმენტის ფორმალური პროცედურა დაიწყო. აშშ-ის წარმომადგენელთა პალატის გადაწყვეტილებას იმპიჩმენტის შესახებ ამერიკელების 47% მხარს უჭერს.