უზბეკეთში საპარლამენტო არჩევნები მიმდინარეობს

უზბეკეთში საკანონმდებლო პალატის (პარლამენტის ქვედა პალატის) არჩევნები მიმდინარეობს. ინფორმაციას ამის შესახებ ტელეარხი Al-Jazeera ავრცელებს.

მისი ინფორმაციით, 2016 წელს ისლამ კარიმოვის გარდაცვალების შემდეგ უზბეკეთმა ეკონომიკური და სოციალური თავისუფლებების მიმართულებით სვლა დაიწყო. პრეზიდენტმა შავკათ მირზიიოევმა 50-ზე მეტი პოლიტპატიმარი გაათავისუფლა, საარჩევნო კოდექსში კი შევიდა ცვლილებები, რომლებიც პარტიულ სიაში ადგილების 30%-ის ქალებისთვის გადაცემას ითვალისწინებს.

თუმცა, ექსპერტების შეფასებით, ახალმა საარჩევნო კოდექსმა ქვეყნის პოლიტიკური სისტემა უფრო კონკურენტუნარიანი ვერ გახადა. პარტიის შესაქმნელად საჭირო 20 ათასი ხელმოწერის შეგროვება ბევრისთვის შეუსრულებელ ამოცანად იქცა. 2003 წლის შემდეგ უზბეკეთში არც ერთი ახალი პარტია არ დარეგისტრირებულა, 5 არსებული პარტია კი სისტემის ნაწილს წარმოადგენს.

„მოსახლეობას საპარლამენტო არჩევნები არ აინტერესებს. მათ იციან, რომ ყველაფერს პრეზიდენტი წყვეტს. ასე იყო კარიმოვის დროს და ასეა ახლაც. თუმცა ეს არ ნიშნავს, რომ აქტივობა დაბალი იქნება. ადამიანები ტრადიციულად მიდიან არჩევნებზე და ხმას აძლევენ იმ პარტიას, ვისაც მათ თემის ლიდერი ურჩევს. რამდენიმე წლის წინ ხშირი იყო შემთხვევები, როდესაც ოჯახის უფროსი დანარჩენი წევრების ნაცვლადაც აძლევდა ხმას. ადამიანებს არ სჯერათ, რომ დეპუტატებს სისტემის შეცვლა შეუძლიათ“, - ამბობს დამოუკიდებელი ანალიტიკოსი აჰმედ რაჰმანოვი.