ილჰამ ალიევი: აზერბაიჯანის არმიამ რეგიონში ახალი რეალობა შექმნა

აზერბაიჯანის პრეზიდენტმა, ილჰამ ალიევმა აზერბაიჯანელ ხალხს ლაჩინის რაიონის გათავისუფლება მიულოცა. ილჰამ ალიევმა აღნიშნა, რომ აზერბაიჯანის არმიამ და ოფიციალურმა ბაქომ რეგიონში ახალი რეალობა შექმნეს.

„ეს რეალობა აზერბაიჯანმა შექმნა. მტერი ჩვენი მიწებიდან განვდევნეთ. გაეროს უშიშროების საბჭოს რეზოლუციები შევასრულეთ. ეს რეზოლუციები 27 წლის განმავლობაში მხოლოდ ქაღალდზე არსებობდა. ჩვენი ტერიტორიული მთლიანობა აღვადგინეთ და ოკუპაცია დავასრულეთ. რეგიონში უსაფრთხოებისა და თანამშრომლობის ახალი ფორმატი შევქმენით“, - აღნიშნა აზერბაიჯანის ლიდერმა.

ილჰამ ალიევმა ასევე ისაუბრა დასავლეთის ზოგიერთი სახელმწიფოს მიკერძოებულ პოზიციაზე.

„საფრანგეთის სენატმა მთიანი ყარაბაღის აღიარების შესახებ რეზოლუცია მიიღო. თუ ასე მოგწონთ ისინი, გადაეცით მათ ქალაქი მარსელი, შეუცვალეთ მას სახელი და მანდ შეუქმენით მეორე სახელმწიფო. ვერავინ ჩაერევა ჩვენს საქმეებში. კიდევ ერთხელ მინდა განვაცხადო, რომ ტერმინი „მთიანი ყარაბაღის კონფლიქტი“ წარსულს ჩაბარდა. არავის ვურჩევ ამ ტერმინის გამოყენებას. მხოლოდ ისტორიის კონტექსტში შეიძლება ამ ტერმინის გამოყენება“, - დასძინა ილჰამ ალიევმა.

30 ნოემბერს აზერბაიჯანის შეიარაღებული ძალების დანაყოფები ლაჩინის რაიონში შევიდნენ.

10 ნოემბერს ნიკოლ ფაშინიანმა მთიან ყარაბაღში საომარი მოქმედებების შეწყვეტა გამოაცხადა. სომხეთის პრემიერის განცხადებით, მან შესაბამის შეთანხმებას ხელი რუსეთისა და აზერბაიჯანის პრეზიდენტებთან ერთად მოაწერა. რუსეთის პრეზიდენტმა, ვლადიმერ პუტინმა განაცხადა, რომ სომხეთი და აზერბაიჯანი მთიან ყარაბაღში რუსი მშვიდობისმყოფელების განლაგებაზე შეთანხმდნენ.