დონალდ ტრამპი: ვიცე-პრეზიდენტს თაღლითური გზით არჩეული საარჩევნო კოლეგიის წევრების აცილების უფლება აქვს

აშშ-ის პრეზიდენტმა, დონალდ ტრამპმა განაცხადა, რომ მაიკ პენსს თაღლითური გზით არჩეული საარჩევნო კოლეგიის წევრების აცილების უფლება აქვს.

„ვიცე-პრეზიდენტს თაღლითური გზით არჩეული საარჩევნო კოლეგიის წევრების აცილების უფლება აქვს“, - დაწერა დონალდ ტრამპმა სოციალურ ქსელებში.

6 იანვარს აშშ-ის კონგრესის ორივე პალატის ერთობლივ სხდომაზე საპრეზიდენტო არჩევნების შედეგები უნდა დამტკიცდეს. მოქმედი პროცედურის თანახმად, კონგრესის წევრები უფლებამოსილნი არიან ამა თუ იმ შტატში არჩევნების შედეგების დამტკიცება გააპროტესტონ. წარმომადგენელთა პალატის ერთმა წევრმა და ერთმა სენატორმა პროტესტი წერილობითი ფორმით უნდა დააფიქსირონ. ამგვარი პროტესტის შემთხვევაში, აშშ-ის კონგრესის ერთობლივი სხდომა შეჩერდება და კონგრესის ორივე პალატა აღნიშნულ საკითხს ცალკე განიხილავს და მას კენჭს უყრის. თუ აშშ-ის კონგრესის ერთი პალატა მაინც არ დაეთანხმება არჩევნების შედეგების გაპროტესტებას, პროტესტი უარყოფილი იქნება.

გავრცელებული ინფორმაციით, 6 იანვარს 140 „რესპუბლიკელი“ კონგრესმენი აშშ-ის კონგრესში საპრეზიდენტო არჩევნების შედეგების დამტკიცებას მხარს არ დაუჭერს.

15 დეკემბერს ამომრჩეველთა კოლეგიამ აშშ-ის საპრეზიდენტო არჩევნებში ჯო ბაიდენის გამარჯვება დაამტკიცა. 3 ნოემბერს გამართული საპრეზიდენტო არჩევნების შედეგად, „დემოკრატების“ პრეზიდენტობის კანდიდატმა, ჯო ბაიდენმა ამომრჩეველთა კოლეგიის წევრთა 306 ხმა მიიღო, ხოლო მოქმედმა პრეზიდენტმა, დონალდ ტრამპმა - 232 ხმა.

რამდენიმე გადამწყვეტ შტატში დონალდ ტრამპის გუნდი სამართლებრივ დავებს აწარმოებს არჩევნებში დაფიქსირებულ დარღვევებთან დაკავშირებით. აშშ-ის პრეზიდენტი, დონალდ ტრამპი არჩევნებში დამარცხებას არ აღიარებს და აცხადებს, რომ საპრეზიდენტო არჩევნები გაყალბდა.