მიშელ ობამა სოციალურ ქსელებში დონალდ ტრამპის სამუდამოდ დაბლოკვას ითხოვს

აშშ-ის ყოფილი პირველი ლედი, მიშელ ობამა სოციალურ ქსელებში დონალდ ტრამპის სამუდამოდ დაბლოკვას ითხოვს.

„ახლა დროა, რომ სილიკონის ველის კომპანიებმა შეწყვიტონ ამ საშინელი ქცევის დაშვება და კიდევ უფრო შორს წავიდნენ და ეს ადამიანი სამუდამოდ დაბლოკონ თავიანთ პლატფორმებზე“, - აღნიშნა მიშელ ობამამ.

7 იანვარს სოციალური ქსელი Facebook-ის ხელმძღვანელმა, მარკ ცუკერბერგმა განაცხადა, რომ აშშ-ის პრეზიდენტი, დონალდ ტრამპი Facebook-ში საპრეზიდენტო ვადის ამოწურვამდე იქნება დაბლოკილი.

„ბოლო 24 საათის შოკისმომგვრელი მოვლენები აშკარად ცხადყოფს, რომ პრეზიდენტი ტრამპი დარჩენილ დროs ხელისუფლების მშვიდობიანი გადაცემის პროცესისთვის ძირის გამოსათხრელად გამოიყენებს. ჩვენ მიგვაჩნია, რომ ამ პერიოდში პრეზიდენტისთვის ჩვენი მომსახურებით სარგებლობის დაშვება რისკებს შეიცავს. ამიტომ, მისი Facebook-ისა და Instagram-ის ანგარიშების დაბლოკვა სულ მცირე შემდეგი ორი კვირით გახანგრძლივდება, სანამ ხელისუფლების მშვიდობიანი გადაცემა არ დასრულდება“, - აღნიშნა მარკ ცუკერბერგმა.

6 იანვარს ვითარება ვაშინგტონში მას შემდეგ დაიძაბა, რაც დონალდ ტრამპის მხარდამჭერები კაპიტოლიუმის შენობაში შეიჭრნენ, სადაც საპრეზიდენტო არჩევნების შედეგებს ამტკიცებდნენ. დემონსტრანტები ჯო ბაიდენის გამარჯვებას აპროტესტებდნენ. შენობიდან კონგრესმენთა ევაკუაცია განხორციელდა. არეულობის შედეგად 4 ადამიანი დაიღუპა. ვითარების კონტროლქვეშ აყვანას რამდენიმე საათი დასჭირდა, რის შემდეგაც კონგრესმა მუშაობა განაახლა და ჯო ბაიდენის პრეზიდენტის პოსტზე არჩევა დაამტკიცა.