უკრაინის მოქალაქეები ვოლოდიმირ ზელენსკის უკრაინელი სამხედროებისთვის გაუქმებული ფულადი პრემიების დაბრუნებას სთხოვენ

უკრაინის მოქალაქეები ვოლოდიმირ ზელენსკის სთხოვენ, უკრაინელ სამხედროებს გაუქმებული ფულადი პრემიები დაუბრუნოს. საუბარია 30 000 გრინვაზე. შესაბამისი ელექტრონული პეტიცია სახელმწიფოს მეთაურის ოფიციალურ ვებგვერდზე 31 იანვარს გამოჩნდა.

პეტიციის ავტორი ვერა რუსინაა, რომელიც თვლის, რომ ახლა არ არის შესაფერისი დრო უკრაინელი მებრძოლებისთვის ფულადი დანამტების გასაუქმებლად.

„გთხოვთ, დაუბრუნოთ სამხედროებს პრემია 30 000 გრინვა. ვიპოვეთ დასაზოგი! დეპუტატებს ხელფასს უზრდით, სამხედროებს აკლებთ“, - წერს პეტიციის ავტორი.

მისივე თქმით, ასეთი გადაწყვეტილება დროული არ არის, განსაკუთრებით რუსეთის ფედერაციის მხრიდან მეორე შეტევის რისკის გათვალისწინებით.

რუსინა ასევე იხსენებს, რომ გასულ ზაფხულს ელექტრონულმა პეტიციამ, უკრაინის შეიარაღებული ძალების სამხედრო მოსამსახურეებისთვის ნაღდი ანგარიშსწორების გადახედვისა და გაზრდის მოთხოვნით, საჭირო 25 ათასი ხმა მიიღო.

„ამის ნაცვლად მთავრობამ დიამეტრულად საპირისპირო გადაწყვეტილება მიიღო. ვერ ჩაჯდები იმ ადამიანების ჯიბეში, რომლებზეც დღეს სახელმწიფოს შენარჩუნებაა დამოკიდებული“, - ამბობს ახალი მიმართვის ავტორი.

გამოქვეყნების მომენტში რუსინას პეტიციამ 3 021 ხელმოწერა მოაგროვა. იმისთვის, რომ მოთხოვნა პრეზიდენტმა განიხილოს 25000 ხმა არის საჭირო.

შეგახსენებთ, რომ 31 იანვარს უკრაინის უშიშროებისა და თავდაცვის ძალებმა ერთობლივ დოკუმენტში სამხედროებისთვის დანამატების დაანგარიშების პროცედურის ცვლილება გამოაცხადეს. 1 თებერვლიდან ფულადი ჯილდო დამოკიდებული გახდა იმ ტერიტორიებზე, რომლებშიც მებრძოლები არიან განლაგებული, ასევე საბრძოლო თუ სპეციალური დავალებების სირთულესა და სპეციფიკაზე, რომელსაც ისინი ასრულებენ.