პოლონეთის პრემიერი: „ევროპული ფასეულობების“ მათრახით სხვების გაროზგვა იმის გაგების გარეშე, თუ რა ცვლილებები უნდა განახორციელონ კონკრეტულმა ქვეყნებმა, თვითდესტრუქციულია ევროკავშირისთვის

პოლონეთის პრემიერ-მინისტრმა, მატეუშ მორავეცკიმ ჰაიდელბერგის უნივერსიტეტში სიტყვით გამოსვლისას წარმოადგინა თავისი ხედვა ევროპის მომავლის შესახებ, რომელშიც ხაზი გაუსვა სუვერენული ეროვნული სახელმწიფოების როლს ევროპული ფედერაციის წინააღმდეგ. ინფორმაციას ამის შესახებ გამოცემა EURACTIV-ი ავრცელებს.

„ვერაფერი დაიცავს ერების თავისუფლებას, მათ კულტურას, მათ სოციალურ, ეკონომიკურ, პოლიტიკურ და სამხედრო უსაფრთხოებას ისე, როგორც ეროვნული სახელმწიფოები. სხვა სისტემები ილუზორული ან უტოპიაა“, - აღნიშნა პოლონეთის პრემიერ-მინისტრმა.

მატეუშ მორავეცკის თქმით, სუვერენული ეროვნული სახელმწიფოებისგან შემდგარი ევროპის ალტერნატივა იქნება „ტექნოკრატიული უტოპია, რომელსაც ზოგიერთი ბრიუსელში, როგორც ჩანს, წარმოიდგენს“ ან „ნეოიმპერიალიზმი“.

„თუ ევროკავშირის ცალკეული ქვეყნები სხვებზე დომინირებას შეეცდებიან, ევროპა შესაძლოა წარსულის შეცდომების მსხვერპლი გახდეს“, - აღნიშნა მორავეცკიმ და დასძინა, რომ მისი „პროევროპულობა“ გამოიხატება მისი მხარდაჭერით ევროკავშირის გაფართოების და არა შემდგომი ცენტრალიზაციის მიმართ.

თავის გამოსვლაში მორავეცკიმ ასევე მკაცრად გააკრიტიკა ევროკომისია, რომელმაც ცოტა ხნის წინ განაცხადა, რომ პოლონეთის წინააღმდეგ სარჩელს შეიტანს საკონსტიტუციო ტრიბუნალის შესახებ ორი გადაწყვეტილების გამო, რომელიც ევროკომისიის თქმით, ეჭვქვეშ აყენებს ევროკავშირის სამართლის პრინციპის უზენაესობას.

„ევროპული ფასეულობების“ მათრახით სხვების გაროზგვა იმის გამო, რომ არ ეთანხმები მათ განმარტებას ან არ გესმის, თუ რა ცვლილებები უნდა განხორციელონ კონკრეტულმა ქვეყნებმა, თვითდესტრუქციულია ევროკავშირისთვის. ჩვენ ნამდვილად გვინდა პან-ევროპული კოსმოპოლიტური ელიტა უზარმაზარი ძალაუფლებით, მაგრამ საარჩევნო მანდატის გარეშე?“, - დასძინა მან.