ბრიტანეთის პრემიერი იმედგაცრუებულია, რომ ზელენსკის „ევროვიზიის“ კონკურსის მსვლელობისას აუდიტორიისთვის მიმართვაზე უარი ეთქვა

დიდი ბრიტანეთის პრემიერ-მინისტრი, რიში სუნაკი იმედგაცრუებულია, რომ ვოლოდიმირ ზელენსკის „ევროვიზიის“ კონკურსის მსვლელობისას აუდიტორიისთვის მიმართვაზე უარი ეთქვა. ინფორმაციას ამის შესახებ ტელეკომპანია CNN-ი ბრიტანეთის პრემიერის პრესმდივანზე დაყრდნობით ავრცელებს.

„ღირებულებები და თავისუფლებები, რომლებისთვისაც იბრძვიან პრეზიდენტი ზელენსკი და უკრაინელი ხალხი, არ არის პოლიტიკური, ის ფუნდამენტურია. პრემიერ-მინისტრი ფიქრობს, რომ მართებული იქნებოდა, რომ პრეზიდენტი ზელენსკი სიტყვით გამოსულიყო ღონისძიებაზე იმის გათვალისწინებით, რომ ჩვენ ამ ღონისძიებას უკრაინის სახელით ვმასპინძლობთ“, - განაცხადა რიში სუნაკის პრესმდივანმა.

მანამდე ცნობილი გახდა, რომ ზელენსკის, BBC-მ და სხვა საერთაშორისო მაუწყებლებმა „ევროვიზია 2023“-ის კონკურსის მსვლელობისას აუდიტორიისთვის მიმართვაზე უარი უთხრეს.

ევროპის მაუწყებელთა კავშირმა (EBU) რომელიც 100-ზე მეტ მაუწყებელს აერთიანებს მთელი მსოფლიოდან, განცხადება გამოაქვეყნა, სადაც ნათქვამია, რომ კონკურსის ერთ-ერთი ძირითადი წესი აპოლიტიკურობაა, შესაბამისად, ზელენსკის მოთხოვნა „ევროვიზიის“ კონკურსის პრინციპებს ეწინააღმდეგება.