FT: რუსეთის ძალების წინსვლა უკრაინის თავდაცვაში არსებულ ბზარებს ავლენს

რუსულმა ჯარმა, გამოიყენა რა კიევის შეცდომები და სამხედრო ძალის დეფიციტი, სწრაფად და საგრძნობლად გააფართოვა საკუთარი ტერიტორიები უკრაინაში. სტატიას ამ შინაარსით Financial Times-ი ავრცელებს.

გამოცემის ცნობით, ამავდროულად უკრაინის საზოგადოებაში ძლიერდება მოსაზრება იმის თაობაზე, რომ ომი მოლაპარაკებების გზით უნდა დასრულდეს.

უკრაინელი მაღალჩინოსნები ჰყვებიან, რომ დღევანდელი მოცემულობით რუსეთის ინტერესს დონეცკის ოლქის აღმოსავლეთ ნაწილი წარმოადგენს. მოსკოვმა ამ მონაკვეთზე შეტევა გასული წლის ბოლოს დაიწყო, თუმცა, ბოლო კვირებში ის გაძლიერდა. რუსეთის პრეზიდენტის ვლადიმერ პუტინის მთავარ მიზანს რაც შეიძლება მეტი ტერიტორიის დაპყრობა წარმოადგენს.

„რუსეთის ძალების წინსვლა უკრაინის თავდაცვაში არსებულ ბზარებს ავლენს“, - ციტირებს გამოცემა ერთ-ერთ უკრაინელ მაღალჩინოსანს. მისი თქმით, დონეცკში რუსეთის ჯარმა ტაქტიკურ წარმატებას მიაღწია და თუ სიტუაცია არ შეიცვლება, მოსკოვმა შესაძლოა ახალი შეტევა დაიწყოს.

საერთო ჯამში რუსეთმა გააცამტვერა უკრაინული არმიის მიერ გასულ წელს მიღწეული წარმატებები. გამოცემა ერთ-ერთ კვლევას იშველიებს, რომლის თანახმადაც, მაისიდან მოყოლებული რუსების მიერ წართმეული ტერიტორიების მოცულობა თითქმის ორჯერ აღემატება იმას, რისი დაბრუნებაც დიდი დანაკარგებით უკრაინელებმა გასული წლის ზაფხულში შეძლეს.

მაგრამ ზოგი ოფიციალური პირი მაინც ოპტიმისტურად არის განწყობილი და მიიჩნევს, რომ რუსეთის შეტევა მსხვილ ქალაქებთან მიახლოებისთანავე შენელდება, რადგან იქ უკრაინას უფრო ძლიერი თავდაცვითი ზღუდეები აქვს.