ევროკომისიის დაკვეთით მარიო დრაგის მიერ მომზადებული ანალიტიკური ანგარიში: საძირკველი, რომელზედაც ჩვენ ავაშენეთ გაერთიანებული ევროპა, ახლა ირყევა

საძირკველი, რომელზედაც ჩვენ ავაშენეთ გაერთიანებული ევროპა, ახლა ირყევა, - ნათქვამია ევროკომისიის დაკვეთით ევროპის ცენტრალური ბანკის ყოფილი პრეზიდენტის, მარიო დრაგის მიერ მომზადებულ ანალიტიკურ ანგარიშში „ევროპის კონკურენტუნარიანობის მომავალი“.

დოკუმენტში აღნიშნულია, რომ ევროპა ამ საუკუნის დასაწყისში ეკონომიკური ზრდის შენელების წინაშე აღმოჩნდა, ეკონომიკური ზრდის ტემპების გაზრდის სხვადასხვა სტრატეგია იყო გამოყენებული, თუმცა ტენდენცია იგივე დარჩა.

სხვადასხვა მაჩვენებლის მიხედვით, 2000 წლიდან ევროკავშირსა და აშშ-ს შორის შემოსავლების ზრდის სხვაობა გაორმაგდა. მარიო დრაგი მიიჩნევს, რომ ევროპაში ეკონომიკური შენელების მთავარი მიზეზი შრომის პროდუქტიულობის არასაკმარისი ზრდაა.

„და ეს მიუხედავად იმისა, რომ ბოლო ათწლეულები საკმაოდ ხელსაყრელი იყო ევროპისთვის: ევროპელმა ექსპორტიორებმა მოახერხეს განვითარებად ქვეყნებში, განსაკუთრებით აზიაში, ბაზრის მნიშვნელოვანი წილების დაკავება; გაიზარდა შრომით საქმიანობაში ჩართული ქალების წილი; გეოპოლიტიკური ვითარება ხელსაყრელი იყო ევროკავშირისთვის, რადგან ევროპა ფაქტობრივად აშშ-ს სამხედრო მფარველობის ქვეშ იყო“, - აღნიშნულია ანგარიშში.

„სტაბილური გეოპოლიტიკის სამყაროში, ჩვენ არ გვქონდა მიზეზი, რომ შეშფოთებულნი ვყოფილიყავით იმ ქვეყნებზე დამოკიდებულების გაზრდით, რომლებიც ჩვენი მოლოდინით, მეგობრებად დარჩებოდნენ. მაგრამ საძირკველი, რომელზედაც ჩვენ ავაშენეთ [გაერთიანებული ევროპა], ახლა ირყევა“, - წერს მარიო დრაგი.

დოკუმენტში აღნიშნულია, რომ წინა გლობალური პარადიგმა ქრება, ხოლო „მსოფლიო ვაჭრობის სწრაფი ზრდის ეპოქა, როგორც ჩანს, დასრულდა, ევროკავშირის კომპანიებს ემუქრებათ როგორც მეტი კონკურენცია საზღვარგარეთიდან, ასევე დაბალი წვდომა საზღვარგარეთის ბაზრებზე - ევროპამ მოულოდნელად დაკარგა ენერგომატარებლების ყველაზე მნიშვნელოვანი მომწოდებელი რუსეთი; ამ დროს კი გეოპოლიტიკური სტაბილურობა სუსტდება, ხოლო ჩვენი დამოკიდებულებები სუსტ წერტილად იქცა“.

„ევროპამ დიდწილად ხელიდან გაუშვა ინტერნეტით მართული ციფრული რევოლუცია და პროდუქტიულობის ზრდა, რომელიც ამ პროცესს უკავშირდება. სინამდვილეში, პროდუქტიულობის სხვაობა ევროკავშირსა და აშშ-ს შორის დიდწილად აიხსნება ტექნოლოგიური სექტორით. ევროკავშირი სუსტია ახალი ტექნოლოგიების სფეროში, რომელიც მომავალ ზრდას განაპირობებს. მსოფლიოს 50 უმსხვილესი ტექნოლოგიური კომპანიიდან მხოლოდ ოთხია ევროპული“, - ნათქვამია ანგარიშში.

დოკუმენტში ასევე აღნიშნულია, რომ ევროპამ ამოწურა თავისი დემოგრაფიული პოტენციალი ეკონომიკური ზრდისთვის.

„ევროკავშირი უახლესი ისტორიაში პირველად შედის ისეთ პერიოდში, როდესაც [ეკონომიკური] ზრდა არ იქნება მხარდაჭერილი მოსახლეობის მატებით. პროგნოზის მიხედვით, 2040 წლისთვის სამუშაო ძალა ყოველწლიურად დაახლოებით 2 მილიონი მუშაკით შემცირდება. ჩვენ უფრო მეტად უნდა დავეყრდნოთ პროდუქტიულობას, რათა ხელი შევუწყოთ ზრდას. თუ ევროკავშირი შეინარჩუნებს პროდუქტიულობის ზრდის საშუალო ტემპს [2015 წლიდან], ეს საკმარისი იქნება იმისთვის, რომ მშპ უცვლელი დარჩეს 2050 წლამდე“, - აღნიშნულია ანგარიშში.

მარიო დრაგი ასევე აცხადებს, რომ ეკონომიკის დიჯიტალიზაციისა და დეკარბონიზაციისთვის და ევროპის თავდაცვისუნარიანობის გასაზრდელად, ევროპაში ინვესტიციების წილი მშპ-ს დაახლოებით 5 პროცენტული პუნქტით უნდა გაიზარდოს იმ დონემდე, რომელიც ბოლოს გასული საუკუნის 60-იან და 70-იან წლებში დაფიქსირდა.

„თუ ევროპა არ გახდება უფრო პროდუქტიული, ჩვენ იძულებულნი ვიქნებით არჩევანი გავაკეთოთ. ჩვენ ვერ შევძლებთ ერთბაშად გავხდეთ ლიდერი ახალ ტექნოლოგიებში, კლიმატის სფეროში შუქურა და დამოუკიდებელი მოთამაშე ვიყოთ მსოფლიო ასპარეზზე. ჩვენ ვერ დავაფინანსებთ ჩვენს სოციალურ მოდელს. ჩვენ მოგვიწევს ზოგიერთი, თუ არა ყველა, ჩვენი ამბიციების შემცირება. ეს არის ეგზისტენციალური გამოწვევა“, - ხაზგასმით აღნიშნულია ანგარიშში.

„ევროპის ფუნდამენტური ღირებულებებია კეთილდღეობა, თანასწორობა, თავისუფლება, მშვიდობა და დემოკრატია მდგრად გარემოში. ევროკავშირი არსებობს იმისთვის, რომ ევროპელებმა ყოველთვის ისარგებლონ ამ ფუნდამენტური უფლებებით. თუ ევროპა ვეღარ უზრუნველყოფს ამას თავისი ხალხისთვის - ან მოუწევს რომელიმეთი ვაჭრობა - ის დაკარგავს არსებობის მიზეზს. ერთადერთი გზა ამ გამოწვევის დასაძლევად არის ზრდა და უფრო მეტი პროდუქტიულობა, ჩვენი თანასწორობისა და სოციალური ინკლუზიურობის ღირებულებების შენარჩუნებით. და ერთადერთი გზა, რომ გავხდეთ უფრო პროდუქტიულები, არის ევროპის რადიკალურად შეცვლა“, - წერს მარიო დრაგი.