შოლცი რუსეთის მონაწილეობით უკრაინის მშვიდობის სამიტის მოწვევის იდეით გამოვიდა

გერმანიის კანცლერმა ოლაფ შოლცმა ქვეყნის ბუნდესტაგში გამოსვლისას განაცხადა, რომ მსოფლიოს სჭირდება ახალი უკრაინის მშვიდობის სამიტის მოწვევა, რომლის მუშაობაში რუსეთიც მიიღებს მონაწილეობას.

„ჩვენ გვჭირდება კიდევ ერთი მშვიდობის კონფერენცია. რუსეთმა მაგიდასთან ადგილი უნდა მიიღოს. ეს არის ამოცანა, რომლის შესრულებაც ჩვენ ახლა გვჭირდება“, - თქვა შოლცმა.

სიტყვით გამოსვლის დროს გერმანიის მთავრობის მეთაურმა აღნიშნა, რომ გერმანელი ამომრჩევლების ნაწილი უკრაინისთვის დახმარების გადაცემის წინააღმდეგია. მან აგრეთვე დასძინა, რომ უკრაინის მხარდაჭერა სწორია და ის უნდა გაგრძელდეს იმდენ ხანს, რამდენიც საჭიროა.

ამასთან ერთად, შოლცის განცხადებით, ყველაფერი გაკეთდება სამართლიანი მშვიდობის დასამყარებლად, რომელიც უკრაინის სუვერენიტეტისა და ტერიტორიული მთლიანობის პატივისცემაზე იქნება აგებული.