Reuters: ტრამპის გეგმა უკრაინის შესახებ სულ უფრო აშკარა ხდება: ტერიტორიული დათმობები და ნატოზე უარის თქმა

აშშ-ის არჩეული პრეზიდენტის დონალდ ტრამპის მრჩევლები საჯაროდ და პირად საუბრებში უკრაინაში ომის დასრულების საკუთარ მოსაზრებებს აზიარებენ. ინფორმაციას Reuters-ი ტრამპთან დაახლოებულ ადამიანებზე დაყრდნობით ავრცელებს.

გეგმის თანახმად, უკრაინის ტერიტორიის მნიშვნელოვანი ნაწილი რუსეთს უნდა დარჩეს. ამ წინადადებას ტრამპის სამი საკვანძო მრჩეველი, მათ შორის ამერიკის არმიის თადარიგის გენერალ-ლეიტენანტი კიტ კელოგი ამუშავებს. ომის შეწყვეტის გეგმა უკრაინის ნატოში გაწევრიანების საკითხის დღის წესრიგიდან მოხსნასაც მოიცავს.

ტრამპის მრჩევლები მოსკოვს და კიევს მოლაპარაკებების დაწყებისკენ მოუწოდებენ. თუ უკრაინა მოლაპარაკებებს არ დათანხმდება, აშშ მას სამხედრო დახმარების გარეშე დატოვებს, ხოლო თუ რუსეთს არ მოუნდება მოლაპარაკებების წარმოება, მაშინ ვაშინგტონი კიევს სამხედრო დახმარების მოცულობას გაუზრდის.

სააგენტო აღნიშნავს, რომ წინასაარჩევნო კამპანიის დროს ტრამპი არაერთხელ ამბობდა, რომ ინაუგურაციის შემდეგ 24 საათში დაასრულებდა ომს უკრაინაში თუმცა ჯერჯერობით უცნობია, თუ როგორ მოხდება ეს.

ანალიტიკოსებს და ეროვნული უსაფრთხოების ორგანოების ყოფილ თანამშრომლებს ეჭვი ეპარებათ იმაში, რომ ტრამპი შეძლებს ამ პირობის შესრულებას კონფლიქტის სირთულის გამო.