ევროკავშირში იმედს გამოთქვამენ, რომ ტრამპისა და პუტინის სატელეფონო საუბარი მშვიდობის პროგრესს შეუწყობს ხელს

ევროპული საბჭოს პრეზიდენტმა, ანტონიუ კოშტამ და ევროკომისიის ხელმძღვანელმა, ურსულა ფონ დერ ლაიენმა სოციალურ ქსელ X-ში ერთობლივი განცხადება გამოაქვეყნეს და იმედი გამოთქვეს, რომ აშშ-ის პრეზიდენტის, დონალდ ტრამპისა და რუსეთის ლიდერის, ვლადიმერ პუტინის გუშინდელი სატელეფონო საუბარი მშვიდობის პროგრესს შეუწყობს ხელს.

„ამ საშინელი ომის შედეგი უკრაინისთვის ყოვლისმომცველი, სამართლიანი და მყარი მშვიდობა უნდა იყოს. გვჯერა, რომ გუშინდელი სატელეფონო საუბარი ამ მიმართულებით პროგრესს შეუწყობს ხელს. ჩვენ უკრაინის მხარდაჭერაში შეუდრეკელნი ვართ“, - ნათქვამია განცხადებაში.

ცნობისთვის, გუშინ აშშ-ის პრეზიდენტმა, დონალდ ტრამპმა და რუსეთის ლიდერმა, ვლადიმერ პუტინმა სატელეფონო საუბარი გამართეს. ტრამპმა პუტინს 30 დღის განმავლობაში უკრაინის ენერგეტიკულ ობიექტებზე თავდასხმებისგან თავის შეკავება შესთავაზა. პუტინი ამ იდეას დათანხმდა.

A comprehensive, just and lasting peace for Ukraine must be the outcome of this terrible war.

We hope that yesterday’s phone call is progress in this direction.

We remain steadfast in our support for Ukraine. (AC & VDL)

— António Costa (@eucopresident) March 19, 2025