ლავროვის განცხადებით, რუსეთი უკრაინასთან შეთანხმების მისაღწევად მზადაა, თუმცა რამდენიმე პუნქტი დახვეწას საჭიროებს

რუსეთის საგარეო საქმეთა მინისტრის, სერგეი ლავროვის განცხადებით, მოსკოვი კიევთან ცეცხლის შეწყვეტის შესახებ შეთანხმების მისაღწევად მზადაა, თუმცა დოკუმენტში რამდენიმე პუნქტი დახვეწას საჭიროებს.

„ჩვენ შეთანხმების მისაღწევად მზად ვართ. მაგრამ ამ შეთანხმების კონკრეტული მომენტები, ელემენტები არსებობს, რომელიც დახვეწას საჭიროებს. ჩვენ ამით ვართ დაკავებულნი“, - განაცხადა ლავროვმა.

სამშვიდობო მოლაპარაკებებზე საუბრისას ლავროვმა აგრეთვე აღნიშნა, რომ არსებობს რამდენიმე მინიშნება იმის შესახებ, რომ „ჩვენ სწორი მიმართულებით ვმოძრაობთ“.

„აშშ-ის პრეზიდენტი ფიქრობს, მეც მგონია, რომ ის მართალია, რომ ჩვენ სწორი მიმართულებით ვმოძრაობთ“, - დასძინა რუსეთის პირველმა დიპლომატმა.

როგორც ლავროვმა აღნიშნა, ტრამპი, შესაძლოა, ერთადერთი ლიდერია დედამიწის ზურგზე, რომელმაც ამ სიტუაციის ძირეული პრობლემის აღმოფხვრის აუცილებლობა აღიარა.