Reuters: უკრაინის ბუნებრივი რესურსების მარაგების 40% რუსეთი აკონტროლებს

სააგენტო Reuters-მა უკრაინის წიაღისეულის მარაგები შეისწავლა და დაასკვნა, რომ ბუნებრივი რესურსების 40% ამჟამად რუსეთი აკონტროლებს.

როგორც სააგენტოს მიერ მომზადებულ მასალაშია აღნიშნული, საუბარია როგორც მნიშვნელოვან მინერალებზე, ასევე იშვიათ წიაღისეულ ელემენტებზე.

უკრაინის ხელისუფლებაში აცხადებენ, რომ ქვეყნის ტერიტორიაზე 34 მინერალიდან, რომელიც ევროკავშირის მიერ კრიტიკულად მნიშვნელოვნად ითვლება, 22 მოიძებნება.

სააგენტო უკრაინის გეოლოგიის ინსტიტუტზე დაყრდნობით წერს, რომ ქვეყანაში არსებობს ისეთი ელემენტების მარაგები, როგორებიცაა ლანთანი და ცერიუმი (გამოიყენება ტელევიზორებსა და განათებაში), ნეოდიმი (გამოიყენება ქარის ტურბინებსა და ელექტრომობილების აკუმულატორებში), ერბიუმი და იტრიუმი (გამოიყენება ბირთვულ ენერგეტიკასა და ლაზერებში). ევროკავშირის მიერ ჩატარებული კვლევა კი სკანდიუმის არსებობაზე მიუთითებს.

როგორც მსოფლიო ეკონომიკური ფორუმი იუწყება, უკრაინა, შესაძლოა, ლითიუმის, ბერილიუმის, მანგანუმის, გალიის, ცირკონის, გრაფიტის, აპატიტის, ფლუორიტისა და ნიკელის საკვანძო მომწოდებელი გახდეს.

Reuters-ს აგრეთვე უკრაინის სახელმწიფო გეოლოგიური სამსახურის მონაცემები მოჰყავს, რომლის თანახმადაც ქვეყანას ევროპაში ლითიუმის ყველაზე დიდი მარაგები - 500 000 ტონა აქვს. როგორც სააგენტო აღნიშნავს, ლითიუმი აკუმულატორების, კერამიკისა და შუშის შესაქმნელად გამოიყენება.

ტიტანის მადნები უკრაინის ჩრდილო-დასავლეთ და ცენტრალურ რეგიონებშია, ლითიუმი - ქვეყნის ცენტრში, აღმოსავლეთსა და სამხრეთ-აღმოსავლეთშია. უკრაინას აგრეთვე ქვანახშირის დიდი მარაგები აქვს, თუმცა ისინი დონბასშია.

როგორც სააგენტო აღნიშნავს, უკრაინის ლითონების მარაგების დაახლოებით 40% მოცემულ მომენტში რუსეთის მიერ კონტროლირებად ტერიტორიებზეა. ლითიუმის სულ მცირე ორი საბადო დონეცკისა და ზაპოროჟიეს ოლქებშია, რომელიც რუსეთის კონტროლის ქვეშ გადავიდა. კიევისთვის ლითიუმი ხელმისაწვდომია მხოლოდ კიროვოგრადის ოლქში.