Politico: ევროკომისიამ „კატარ გეითის“ ფარგლებში დისციპლინური გამოძიება დაიწყო ერთ-ერთი მაღალჩინოსნის, ესტონელი ჰენრიკ ჰოლოლეის მიმართ. ის კაია კალასის მამის, სიიმ კალასის მთავრობაში მუშაობდა

ევროპულმა კომისიამ შიდა დისციპლინური გამოძიება დაიწყო ერთ-ერთი მაღალჩინოსნის, ესტონელი ჰენრიკ ჰოლოლეის მიმართ ინტერესთა კონფლიქტის, გამჭვირვალეობის დარღვევისა და ძვირადღირებული საჩუქრების მიღების გამო. ინფორმაციას Politico ავრცელებს.

შიდა მოკვლევა მას შემდეგ დაიწყო, რაც ხუთი თვის წინ ევროპულმა პროკურატურამ ესტონელი პოლიტიკოსის წინააღმდეგ, რომელიც ევროკავშირის მთავარი დიპლომატის, კაია კალასის მამის, სიიმ კალასის მთავრობაში მუშაობდა, კორუფციის ბრალდებით სისხლის სამართლის საქმე აღძრა.

თავის მხრივ, სისხლის სამართლის საქმე აღიძრა მას შემდეგ, რაც ფრანგულმა გაზეთმა Liberation-მა გამოაქვეყნა სტატია, სადაც საუბარი იყო იმაზე, რომ ჰოლოლეი, რომელიც ევროკავშირის ტრანსპორტის სფეროში ერთ-ერთ მაღალ თანამდებობას იკავებდა, კატარს, მისთვის და მისი უახლოესი წრისთვის საჩუქრების, მათ შორის დოჰაში ხუთვარსკვლავიან სასტუმროში ცხოვრების სანაცვლოდ, მსხვილი საავიაციო გარიგების შესახებ კონფიდენციალურ მასალებს აწვდიდა.

როგორც გამოცემა წერს, მიმდინარე წლის 21 მარტს ჰოლოლეის ეცნობა, რომ მის წინააღმდეგ დისციპლინური გამოძიებაა დაწყებული. „შიდა დისციპლინური პროცედურა გრძელდება და გონივრულ ვადებში დასრულდება, როგორც დაწესებულების, ასევე დაინტერესებული პირის ინტერესების სრული დაცვით“, - განუცხადა ევროკომისიის წარმომადგენელმა ჟურნალისტებს.

შიდა მოკვლევას ბიუჯეტისა და ადამიანური რესურსების საკითხებში ევროკომისრის, პიოტრ სერაფინის აპარატი აწარმოებს. ევროკომისიაში ვარაუდობენ, რომ ესტონელმა პოლიტიკოსმა კომისიის ოთხი მუხლი დაარღვია: „საჩუქრების არასანქცირებული მიღება", „ინტერესთა კონფლიქტი“, „დოკუმენტების არასანქცირებული გამჟღავნება“ და „კომისიის მისიების შესახებ გამჭვირვალობის წესების დარღვევა“.

როგორც გამოცემა წერს, თუ ჰოლოლეის ბრალეულობა დადასტურდება, მას სანქციის სახით ან წერილობით საყვედურს ეტყვიან, ან სამსახურიდან გაუშვებენ, საპენსიო გადასახადების შემცირებით.