ტრამპმა განაცხადა, რომ ხელი მოაწერა წერილებს 12 ქვეყნისთვის, სადაც დეტალურად არის აღწერილი ტარიფების სხვადასხვა დონე, რომლის წინაშეც ისინი აღმოჩნდებიან

აშშ-ის პრეზიდენტმა, დონალდ ტრამპმა განაცხადა, რომ ხელი მოაწერა წერილებს 12 ქვეყნისთვის, სადაც დეტალურად არის აღწერილი ტარიფების სხვადასხვა დონე, რომლის წინაშეც ისინი აღმოჩნდებიან.

მისი თქმით, აღნიშნული შეთავაზებები, პრინციპით „აიღე ან დატოვე“, ორშაბათს გაიგზავნება.

ტრამპმა უარი თქვა იმ ქვეყნების დასახელებაზე, რომლებიც ამ პროცესში არიან ჩართულნი, და განაცხადა, რომ ეს ინფორმაცია ორშაბათს გასაჯაროვდება.

ტრამპმა აპრილში 10%-იანი საბაზისო ტარიფის განაკვეთი დააანონსა და დამატებითი გადასახადები უმეტესი ქვეყნებისთვის, რომელთაგან ზოგიერთი 50%-ს აღწევს.

თუმცა, 10%-იანი საბაზისო განაკვეთის გარდა, ყველა დანარჩენი ტარიფი შემდგომში 90 დღით შეჩერდა, რათა შეთანხმებების მისაღწევად მოლაპარაკებებისთვის მეტი დრო მიეცათ.

ეს პერიოდი 9 ივლისს იწურება, თუმცა პარასკევს ტრამპმა განაცხადა, რომ ტარიფები შესაძლოა კიდევ უფრო გაიზარდოს – 70%-მდე – და მათი უმეტესობა 1-ელ აგვისტოს შევა ძალაში.