კელი დეგნანი: ყოველთვის აღფრთოვანებული ვიყავი რეფორმებისადმი საქართველოს ერთგულებით

ყოველთვის აღფრთოვანებული ვიყავი საქართველოს ერთგულებით რეფორმებისადმი, რომელთა გატარებაც აუცილებელი იყო და მის მიერ სამხედროების გაძლიერებით. ეს ერთგულება კიდევ ერთხელ დავინახეთ ავღანეთში, სადაც საქართველო სამხედრო ძალის ერთ-ერთი უმსხვილესი კონტრიბუტორია. საქართველოს ეს 32 ჯარისკაცის სიცოცხლედ და 200-ზე მეტ დაჭრილ სამხედროდ დაუჯდა. ისინი დღესაც ავღანეთში არიან ჩვენთან ერთად და 900 სამხედრო მონაწილეობს ნატოს „მტკიცე მხარდაჭერის“ მისიაში ავღანეთში, - ამის შესახებ საქართველოში აშშ-ის ელჩად წარდგენილ კელი დეგნანმა სენატის საგარეო ურთიერთობათა კომიტეტზე სიტყვით გამოსვლისას განაცხადა. 

კელი დეგნანმა საქართველოს ევროინტეგრაციულ კურსსა და ნატო-საქართველოს თანამშრომლობის მნიშვნელობაზე გაამახვილა ყურადღება და აღნიშნა, რომ აღფრთოვანებულია რეფორმებისადმი საქართველოს ერთგულებით.

„ჯერ არ მქონია საშუალება, ვყოფილიყავი საქართველოში. 2008 წელს, როდესაც რუსეთი შეიჭრა საქართველოში, მე თურქეთში ვიმყოფებოდი. ერთ წლის შემდეგ გახლდით ნატო-ს შტაბბინაში, როდესაც საქართველო აღიარებული იყო და დღემდე რჩება ნატოს ღირებულ პარტნიორად. მოკავშირეებმა გასულ წელს კიდევ ერთხელ დაადასტურეს, რომ საქართველო აუცილებლად გახდება ნატოს წევრი. ყოველთვის აღფრთოვანებული ვიყავი საქართველოს ერთგულებით რეფორმებისადმი, რომელთა გატარებაც აუცილებელი იყო და მის მიერ სამხედროების გაძლიერებით. ჩვენ ეს ერთგულება კიდევ ერთხელ დავინახეთ ავღანეთში, სადაც საქართველო სამხედრო ძალის ერთ-ერთი უმსხვილესი კონტრიბუტორია. საქართველოს ეს 32 ჯარისკაცის სიცოცხლედ და 200-ზე მეტ დაჭრილ სამხედროდ დაუჯდა. ისინი დღესაც ავღანეთში არიან ჩვენთან ერთად და 900 სამხედრო მონაწილეობს ნატოს „მტკიცე მხარდაჭერის“ მისიაში ავღანეთში. ჩემს წინა თანამდებობაზე მუშაობისას დავრწმუნდი, რომ საქართველო ასევე არის ღირებული და ერთგული პარტნიორი აშშ-ისთვის და ნატოსთვის შავ ზღვაში“, - განაცხადა კელი დეგნანმა.

სიტყვით გამოსვლისას საქართველოში აშშ-ის ელჩად წარდგენილმა კანდიდატმა საქართველოში დამოუკიდებელი მართლმსაჯულების სისტემისა და მედიაპლურალიზმის მნიშვნელობაზეც გააკეთა აქცენტი. მან ასევე აღნიშნა, რომ დამტკიცების შემთხვევაში, მზად არის, იმუშავოს ყველა პოლიტიკურ მოთამაშესთან საქართველოში, რათა დარწმუნდეს, რომ მომავალ წელს დაგეგმილი არჩევნები იქნება სამართლიანი და თავისუფალი.

„საქართველოს მიერ მიღწეული პროგრესი იოლი არ ყოფილა და კიდევ ბევრია გასაკეთებელი ამ მიღწევების შესანარჩუნებლად და გასავითარებლად. ეს განსაკუთრებით ეხება პლურალისტული კანონმდებლობის წინ წაწევას, დამოუკიდებელ მართლმსაჯულების სისტემას, მედიის მრავალფეროვნებას და აქტიურ სამოქალაქო სექტორს. დემოკრატიის პრინციპებისა და კანონის უზენაესობისადმი ერთგულება ფუნდამენტურად მნიშვნელოვანია საქართველოს ევროატლანტიკური ინტეგრაციისთვის. ჩემი დამტკიცების შემთხვევაში, მზად ვარ, ვიმუშავო ყველა პოლიტიკურ მოთამაშესთან საქართველოში, რათა დავრწმუნდე, რომ მომავალ წელს დაგეგმილი არჩევნები იქნება სამართლიანი და თავისუფალი“, - განაცხადა კელი დეგნანმა.

სენატის საგარეო ურთიერთობათა კომიტეტზე სიტყვით გამოსვლისას საქართველოში აშშ-ის ელჩად წარდგენილი კანდიდატი საქართველოს ოკუპირებული რეგიონების საკითხს შეეხო და რუსეთის მიერ ცეცხლის შეწყვეტის შესახებ შეთანხმებით აღებული ვალდებულებების შესრულების აუცილებლობასაც გაუსვა ხაზი.

ინფორმაციას ამის შესახებ 1tv.ge ავრცელებს. საქართველოში აშშ-ის ელჩის პოსტზე წარდგენილ კელი დეგნანს სენატის საგარეო ურთიერთობათა კომიტეტში უსმენენ.

აშშ-ის პრეზიდენტმა დონალდ ტრამპმა კელი დეგნანი საქართველოში ელჩის პოზიციაზე 4 სექტემბერს დაასახელა. კელი დეგნანი ევროპასა და აფრიკაში აშშ-ის საზღვაო ძალების პოლიტიკური მრჩეველია.

საქართველოში აშშ-ის ელჩის პოსტი 2018 წლის მარტიდან ვაკანტურია. 2015 წლიდან 2018 წლამდე ამ პოსტს იან კელი იკავებდა. ამჟამად საქართველოში აშშ-ის ელჩის მოვალეობას ელიზაბეთ რუდი ასრულებს.