ვოლსკი: პროპორციული და მაჟორიტარული სისტემა უნდა შეჯერდეს რომ ქვეყანაში სტაბილურობა შევინარჩუნოთ

პარლამენტის პირველი ვიცესპიკერი გიორგი ვოლსკი ოპონენტებს „ფრონტერას“ თემის ირგვლივ სპეკულაციაში ადანაშაულებს. პოლიტიკოსის შეფასებით, „ფრონტერას“ თემა არათუ სიღრმისეულად უნდა იყოს შესწავლილი, არამედ ყველა აბზაცი უნდა გაიშიფროს. 

კონგრესმენ მარკუეინ მალინის წერილზე დასმული შეკითხვის საპასუხოდ, ვოლსკიმ გადაცემაში „დღის ქრონიკა“ განაცხადა, რომ „ფრონტერას“ დაკავშირება ამერიკულ ბიზნესთან საკმაოდ გადაჭარბებულია, რადგან მისი ინფორმაციით, ის ტეხასური კომპანია აღარ არის.   

გიორგი ვოლსკიმ ოპონენტებს „ნაციონალური მოძრაობის“ წარმომადგენელთა შეფასებები გაახსენა, როდესაც მისი თქმით, 2016 წელს ზუსტად ამერიკული კომპანიის საწინააღმდეგოდ აკეთებდნენ განცხადებებს, ახლა კი ეს ვითარება აწყობთ. 

ვოლსკიმ ოპონენტების საპასუხოდ აღნიშნა, რომ კონგრესმა არაერთხელ მიიღო გადაწყვეტილება საქართველოსთვის ფინანსური, სამხედრო, პოლიტიკური მხარდაჭერის შესახებ.

„ამასთან, გვაქვს ყოველდღიური, ინტენსიური ურთიერთობა აშშ-ს ადმინისტრაციასთან. ამას კი არ აანალიზებს ვინმე და მალინის განცხადება გამოჰყავთ სამსჯელოდ, რომელიც რეალობისგან აბსოლუტურად განსხვავებულ, სხვა რამეს ამბობს. არავის მოსვლია აზრად, შეაფასოს, ვინ არის „ფრონტერა“ და რას წარმოადგენს ის“, - აღნიშნა გიორგი ვოლსკიმ.

რაც შეეხება პოლიტიკურ ნაწილს, პარლამენტის ვიცესპიკერის განცხადებით, მმართველ გუნდში არავის დაუმალავს, რომ კონგრესიდან წერილი მიიღეს, რომლის მიხედვითაც პროპორციული არჩევნების თემაზე უკეთესს მოელოდნენ, თუმცა არავის უთქვამს, რომ ამერიკასა და საქართველოს შორის სტრატეგიული პარტნიორობის თემა რაიმე სახით ჩრდილის ქვეშ აღმოჩნდა. 

„პოლიტიკური ბრძოლის, დაპირისპირების, ისეთი ხარისხი გვაქვს ქვეყანაში და ისეთ სიმწვავეში ვართ შესული რომ, ჩვენს ოპონენტებს ნებისმიერი თემის გამოყენება, თუნდაც ეს ქვეყნის საწინააღმდეგო იყოს, აბსოლუტურად არაფრად უღირთ“, - აცხადებს პარლამენტის ვიცესპიკერი.  

ის ისრაელთან ავლებს პარალელს, სადაც მისი თქმით, პროპორციულმა სისტემამ მოიტანა ის, რომ კოალიციური პასუხისმგებლობა ვერც ერთმა პოლიტიკურმა ძალამ აიღო. პოლიტიკოსის თქმით, არსებობს რეალობა, რომ მეოთხედ ჩატარდეს არჩევნები ამ ქვეყანაში და თუ ისრაელის ეკონომიკა გაუძლებს ამას, საქართველოს შემთხვევაში ასე არ იქნება. ასეთ პირობებში კი, ვოლსკი მიიჩნევს, რომ შესაძლოა, კრიზისი შეიქმნას. 

„ამიტომ, ჩვენ ვამბობთ, კრიზისი რომ არ იყოს, პროპორციული და მაჟორიტარული სისტემის შეჯერება უნდა მოხდეს. ასე უფრო რეალურია, რომ ქვეყანაში სტაბილურობა შევინარჩუნოთ. ჩვენი ამოცანაა, რომ საარჩევნო სისტემასთან დაკავშირებით პოლიტიკურ პარტიების ურთიერთობაში შექმნილი კრიზისი საზოგადოებაში არ გავრცელდეს. ჩვენი ოპონენტების ამოცანაა, დაპირისპირების ისეთი ხარისხი შეიქმნას, რომელიც „კმარას“ ტიპის ორგანიზაციებზე იტრიალებს და ისინი იქნებიან წარმმართველი ძალა ქუჩაში“, - განაცხადა გიორგი ვოლსკიმ.  

რესპუბლიკელი კონგრესმენი მარკუეინ მალინი გიორგი გახარიასადმი გაგზავნილ წერილში„საქართველოს დემოკრატიული ღირებულებებისგან გადახვევითა და ეკონომიკის გაუარესებით“ შეშფოთებულია.