გოგა ხაინდრავა: ტერორისტს ეროვნება არ აქვს, ამიტომ ხაზგასმა, ჩეჩენია, თუ ვინც არის, არასწორია

რასაც დღეს გვარამია, გაბუნია და ძმანი მისნი აკეთებენ, სწორედ ეს არის საფრთხე საქართველოსთვის, - ამის შესახებ კინორეჟისორმა გოგა ხაინდრავამ მედიაჰოლდინგ „კვირაში“ პრესკონფერენციაზე განაცხადა.

ხაინდრავამ საქართველოში ბოლო დღეებში მიმდინარე პროცესებთან დაკავშირებით ისაუბრა, კერძოდ, სუს-ის მიერ რუსეთის მოქალაქის დაკავების ფაქტზე და იმ მწირ ინფორმაციაზე, რომელიც ამ თემაზე საზოგადოებას აქვს. მისი თქმით, არასწორად გავრცელდა ინფორმაცია დაკავებულის შესახებ, რომ ის ჩეჩენი ეროვნებისაა. ხაინდრავამ აღნიშნა, რომ ჩეჩნებზე ყველაფრის გადაბრალება ძალიან სახიფათოა.

„პირველ რიგში, ის არ არის ჩეჩენი, ის არის ინგუში და ამას ძალიან დიდი მნიშვნელობა აქვს. ეს ორი სხვადასხვა ერია. ეს ტენდენცია, ქართველებისა და ჩეჩნების დაპირისპირების და ჩეჩნებზე ყველაფრის გადაბრალების, ძალიან სახიფათოა ჩვენთვის, რადგან ჩვენ და ჩეჩნები ძალიან დიდი ხნის ახლობელი ერები ვართ და პანკისელი ქისტების საქართველოში ცხოვრებაც ამას ადასტურებს. იქაც ვხედავთ საზოგადოებების დაპირისპირების მცდელობებს, ამიტომ, ამას ძალიან დიდი მნიშვნელობა აქვს. ითქვა თავიდანვე, რომ დაკავებული ინგუშია. რაც შეეხება ინგუშებს, ჩვენი სისხლით ნათესავები არიან. ტერორისტს ეროვნება არ აქვს. ამიტომ, ამაზე ხაზგასმა, ჩეჩენია, თუ ვინც არის, არასწორია“, - განაცხადა ხაინდრავამ.

მისივე თქმით, დაკავებულის შესახებ საზოგადოებას ძალიან მწირი ინფორმაცია აქვს - ის, რაც სუს-მა განაცხდა. მან საზოგადოებას და მთავრობას ამ თემაზე განცხადებების დროს სიფრთხილისკენ მოუწოდა, რადგან გაჟღერებული მუქარა ზოგადად, ძალიან დიდი საფრთხის შემცველია ქართული საზოგადოებისთვის.

„ეს არის ძალიან დიდი საფრთხე. არავითარი მნიშვნელობა არ აქვს, ვის წინააღმდეგ ამზადებდნენ. რასაც დღეს გვარამია, გაბუნია და ძმანი მისნი აკეთებენ, ეს არის სწორედ საფრთხე საქართველოსთვის, რადგან როდესაც შენ შეურაცხყოფას აყენებ შენი ქვეყნის ტერიტორიიდან ისეთ საშიშ წარმონაქმნს, რომელსაც შენი ტერიტორიების 20% აქვს ოკუპირებული, პრაქტიკულად ყოველდღე ჩვენ ვართ აგრესიის მსხვერპლი, როგორც სამხედრო, ასევე პოლიტიკური, ისე ფსიქოლოგიური; ბორდერიზაცია მიდის, ადამიანების დატაცება, მკვლელობა, ეს როგორც მინიმუმ უნდა გესმოდეს და თუ შენ არ გესმის, მაშინ უნდა გაითვალისწინო, რომ ჩვენი შვილებიც საფრთხეში არიან. რადგან არავინ იცის, რას იზამენ. სკრიპალები რომ მოიწამლნენ, იმ პატარა ქალაქში მთელი უბანი მოიწამლა. როცა სახლები იყო აფეთქებული, უდანაშაულო ხალხი დაიღუპა. არავინ იცის, რა მეთოდს მიმართავენ აქ, ტერორისტული აქტის ჩადენას თუ მოინდომებენ. ამიტომ, შენი თავიდან და ვიწროპარტიული ინტერესიდან არ უნდა გამოდიოდე. ეს არის უგუნერება, ეს არის მათი სახე. „ნაციონალური მოძრაობა“ ასეთი იყო და ასეთად დარჩებიან ყოველთვის. სამწუხაროდ, ეს პრობლემას უქმნიან ქართულ საზოგადოებას და ესაა პრობლემა“, - განაცხადა ხაინდრავამ.

15 ივნისს სუს-მა დაადასტურა, რომ შეკვეთით განზრახ მკვლელობის მომზადების ფაქტზე დაწყებული გამოძიების ფარგლებში რუსეთის მოქალაქეა დაკავებული.

ნიკა გვარამიას ინფორმაციით, რამზან კადიროვის დაკვეთით გიორგი გაბუნიას მკვლელობა იგეგმებოდა.