პარლამენტში კონსტიტუციური კანონის პროექტს მესამე მოსმენით განიხილავენ. LIVE

საქართველოს საკანონმდებლო ორგანოში კონსტიტუციაში ცვლილებების შესახებ კანონპროექტს მესამე მოსმენით განიხილავენ. ცვლილების დამტკიცებას 113 დეპუტატის მხარდაჭერა სჭირდება. რეგისტრაცია 120-მა დეპუტატმა გაიარა.

ბოიკოტის რეჟიმში რჩება „ევროპული საქართველო“ და „ნაციონალური მოძრაობა“. სამაგიეროდ, ცვლილებეს მხარს უჭერენ „პატრიოტთა ალიანსი“ დამოუკიდებელი დეპუტატები და საპარლამენტო უმრავლესობა.

პარლამენტმა პროექტს პირველი და მეორე მოსმენით მხარი უკვე დაუჭირა. დღეს კი, კენჭისყრის მიხედვით გადაწყდება, თუ რომელი საარჩევნო სისტემით ჩატარდება 2020 წლის არჩევნები.

კანონპროექტის მიხედვით, 2020 წლის საპარლამენტო არჩევნები შერეული სისტემით უნდა ჩატარდეს, რაც იმას ნიშნავს, რომ პარლამენტში აირჩევენ 120 წევრს პროპორციული და 30 წევრს მაჟორიტარული საარჩევნო სისტემით.

ცვლილებების თანახმად, პროპორციული არჩევნები ჩატარდება ერთპროცენტიანი საარჩევნო ბარიერით, საარჩევნო ბლოკებისთვის კი ბარიერი განისაზღვრება ერთი პროცენტისა და ბლოკში შემავალი პარტიების ნამრავლით. ასევე, გაუნაწილებელი მანდატები, თუ ასეთი იქნება, თანმიმდევრობით განაწილდება უდიდესი ნაშთის მქონე პარტიებზე და ბლოკებზე.

პროექტით გათვალისწინებულია ე.წ. ჩამკეტი მექანიზმიც, კერძოდ, პარტია, რომელიც 2020 წლის საპარლამენტო არჩევნებზე პროპორციული სისტემით 40.54%-ზე ნაკლებ მხარდაჭერას მიიღებს, მთავრობას დამოუკიდებლად ვერ ჩამოაყალიბებს.

„აღნიშნული ზღვარი ერთპარტიული საპარლამენტო უმრავლესობის ფორმირებას გამორიცხავს იმ შემთხვევაში, თუ გამარჯვებული პარტია ან საარჩევნო ბლოკი პროპორციული სისტემით ხმათა 40.54%- ზე ნაკლებს მიიღებს; ზემოხსენებული მარჟის გადაჭარბების შემთხვევაში, პარტიას ან საარჩევნო ბლოკს მოაკლდება მანდატები პროპორციული საარჩევნო სიიდან, რომლებიც პროპორციულად განაწილდება იმ სხვა პოლიტიკური პარტიებისა და საარჩევნო ბლოკების მიერ წარდგენილ საარჩევნო სიებზე, რომლებმაც შესაბამისი საარჩევნო ბარიერი გადალახეს“, - წერია კანონპროექტში.