ამირან სალუქვაძე დავით კეზერაშვილზე: რაღაც მცირე ჯგუფი ამუნათებს მთელ ქვეყანას

რაღაც მცირე ჯგუფი ამუნათებს მთელ ქვეყანას. მათ მიერ ჩადენილი დანაშაულები გმირობად ინათლება და ვინც შეეხება, მტრებად აცხადებენ, - ამის შესახებ ანალიტიკოსმა ამირან სალუქვაძემ, დავით კეზერაშვილზე საუბრისას განაცხადა.

მისი თქმით, ექსთავდაცვის მინისტრი, დავით კეზერაშვილი უნდა შეეშვას ტელევიზიისა და ჟურნალისტების ფარად გამოყენებას და ახსნას გაჟღერებული ბრალდებები და მისი ქონების წარმომავლობა.

,,როგორც მოსალოდნელი იყო ბატონი კეზერაშვილის მხრიდან, მის მიმართ გაჟღერებული კორუფციული ბრალდებები, პოლიტიკურ და მედიის თითქოსდა კონტროლის ჭრილში გადაიტანა. ვის აინტერესებს თქვენი სარედაქციო პოლიტიკა? შეგიძლიათ დღე და ღამე ჯიბის ქურდობები და ხულიგნობა აშუქოთ, თუ გინდათ, თავზე დაიმხეთ ყველაფერი. თქვენი თავდაცვის მინისტრობით, ქვეყანა დაიმხეთ, უფრო სწორად, თავზე დაგვამხეთ და მაგაზე უარესი ტელეეთერებიდან რა უნდა ქნათ? ვერ გადაიტანთ”, - წერს სოციალურ ქსელში ანალიტიკოსი ამირან სალუქვაძე.

ანალიტიკოსი ყოფილ თავდაცვის მინისტრს, დავით კეზერაშვილს მოუწოდებს შეეშვას ტელევიზიის და ჟურნალისტების ფარად გამოყენებას და ახსნას გუშინ გაჟღერებული ბრალდებები, საკუთარი ქონების წარმომავლობა.

,,გუშინ განა რაიმე ახალი გაჟღერდა? ან როგორ უნდა გააფორმოთ სარედაქციო პოლიტიკაზე ზეწოლის მცდელობად, როცა არაფრის მქონე ჩინოვნიკები, მილიონერები და მილიარდელები გახდით? გუშინ არენაში გახმოვანებულს, კიდევ ორ ფაქტს დავამატებ, რომელთა შესახებ ინფორმაცია ჯერ კიდევ 2008 წლის ომამდე მედიითაა გაჟღერებული და მასალები იმ პერიოდიდან პროკურატურაშია. უკრაინული პასიური რადარის „კოლჩუგას“ შეძენა 9 მლნ დოლარად იყო შესაძლებელი, 16,5 მლნ დოლარად, ანუ 7,5 მილიონით ძვირ ფასად შეიძინეს. ერთი ბატარეა საზენიტო კომპლექსი „ოსა“ უკრაინის მიერ მოწოდებულ კომერციულ წინადადებაში 6 მლნ დოლარად იყო შეფასებული, ხოლო ჩვენმა ქვეყანამ ომის წინ 9,5 მილიონ დოლარად, ანუ 3,5 მილიონი დოლარით ძვირად შეიძინეს. რამდენიმე ბატარეა იყიდეს და გაამრავლეთ 3,5 მილიონზე და მთელი ეს თანხები გადაიყვანეთ ლარებში, თუნდაც მაშინდელი კურსით. ქვეყანაში უტიფრობის აღლუმია. რაღაც მცირე ჯგუფი ამუნათებს მთელ ქვეყანას. მათ მიერ ჩადენილი დანაშაულები გმირობად ინათლება და ვინც შეეხება, მტრებად აცხადებენ. ამიტომ მოვუწოდებ პოლიტიკოსებს, საზოგადოებას, რათა ახლიდან იქნას გამოძიებული მაშინდელი ხელისუფლების მიერ სახელმწიფოს და ჯარის ომისათვის მომზადება (ომის დაწყებაში არავის აერიოს, ომისთვის ყველა ემზადება) და როგორ ვაწარმოეთ სამხედრო მოქმედებები“, - წერს ამირან სალუქვაძე.

ივლისში The Times of Israel-მა გამოაქვეყნა სტატია, რომლის მიხედვითაც ცნობილი გახდა, რომ თადარიგის გენერალ გალ ჰირშისთვის ისრაელის სახელმწიფო პროკურორი ბრალის წაყენებას გეგმავს. გამოძიება ჰირშსა და მის სამ პარტნიორს 2007-2009 წლებში დიდი ოდენობით გადასახადების დამალვას და ფინანსურ მაქინაციებს ედავება.

ოთხივე კომპანია „დამცავი ფარის“ მეწილე იყო, რომელიც თუ კონტრაქტებს დავუჯერებთ, საქართველოს 2007-2009 წლებში თავდაცვის სფეროში კონსულტაციებს უწევდა, ჩართული იყო წვრთნის და აღჭურვის პროგრამების მომზადებასა და იარაღის მიწოდებაში. ისრაელის პროკურატურა ამბობს, რომ მაშინ კომპანიამ და მისმა მეწილეებმა 11 მილიონზე მეტი ოდენობის შემოსავალი დამალეს. საქმეში ფიგურირებს მიხაელ ბენიმინი, იგივე მიხეილ ბენიაშვილი, რომელიც დავით კეზერაშვილის ახლო ნათესავია.