გიორგი მიქაუტაძე: ვფიქრობ, კანონმდებლობის გაუმჯობესებას შევძლებთ

დღეს გაიმართა შეხვედრა ვენეციის კომისიის რეკომენდაციებთან დაკავშირებით. როგორც მოგეხსენებათ, ეს არის ინიცირებული კანონპროექტი, რომელიც შეეხება უზენაესი სასამართლოს მოსამართლეების შერჩევის პროცესს და მის შემდგომ დახვეწას. ჩვენ მოხარული ვართ, რომ ჩართულნი ვართ, ასევე ჩვენი საერთაშორისო პარტნიორებიც ჩართულები არიან ამ პროცესში. ვფიქრობ, რომ შევძლებთ კანონმდებლობის გაუმჯობესებას, - განაცხადა იუსტიციის უმაღლესი საბჭოს მდივანმა, გიორგი მიქაუტაძემ პარლამენტის თავმჯდომარის, დიპლომატიური კორპუსის, იუსტიციის უმაღლესი საბჭოს, უზენაესი სასამართლოს თავმჯდომარისა და არასამთავრობო ორგანიზაციების წარმომადგენლების შეხვედრის დასრულების შემდეგ.

მან მესამე სექტორის კრიტიკის შესახებაც ისაუბრა და აღნიშნა, რომ კრიტიკა მსგავსი პროცესების თანმდევია.

„ასეთი ზოგადი კრიტიკა ყოველთვის თან სდევს ხოლმე პროცესს. მე ვისურვებდი, რომ მეტი კონკრეტიკა მოვისმინოთ ამ პრეტენზიებთან დაკავშირებით. თქვენ იცით, რომ ძირეულად არის შეცვლილი უზენაესი სასამართლოს მოსამართლეების შერჩევის პროცედურები და ძალიან ბევრ საფეხურს გადის როგორც საბჭო, ასევე საქართველოს პარლამენტი ამ პროცესში, მაშინ როდესაც საერთოდ არანაირი რეგულაცია არ არსებობდა, ამიტომ, ნამდვილად ვერ ვიტყვით, რომ ფრაგმენტულია ეს ცვლილებები, ვერ დავეთანხმები ამაში. რაც შეეხება ამ კონკრეტულ ინიციატივას, კიდევ ერთხელ ვიტყვი: ეს არის მიმართული ვენეციის კომისიების შესაბამისად და ბოლომდე შესრულებას ემსახურება“, - განაცხადა გიორგი მიქაუტაძემ.

კანონპროექტის გათვალისწინებით, უზენაესი სასამართლოს მოსამართლეობის კანდიდატთა შერჩევის პროცესის ყველა ეტაპზე გადაწყვეტილების დასაბუთების სტანდარტი შემოდის, რომელსაც რაიონულ და სააპელაციო სასამართლოებში მოსამართლეთა განწესების პროცედურის მსგავსად, იუსტიციის უმაღლესი საბჭოს მდივანი განახორციელებს. ცვლილებებით განისაზღვრება, რომ დასაბუთების სტანდარტის გარდა, ასევე შესაძლებელი იქნება, უზენაესი სასამართლოს მოსამართლეობის კანდიდატების შერჩევის ნებისმიერ ეტაპზე იუსტიციის უმაღლესი საბჭოს გადაწყვეტილების საკვალიფიკაციო პალატაში გასაჩივრება. კანონპროექტში აღნიშნულია, რომ თავად ეს პროცესი განსხვავებით რაიონულ და სააპელაციო სასამართლოებში მოსამართლეთა განწესების შემთხვევისა, როდესაც მოსამართლის თანამდებობაზე განწესების შესახებ გადაწყვეტილებას თავად იუსტიციის საბჭო იღებს, უფრო შემჭიდროებული ვადის ფარგლებში განხორციელდება.

ცვლილებების ინიციატორები საპარლამენტო უმრავლესობის წევრები გურამ მაჭარაშვილი, რატი იონათამიშვილი და ირაკლი კობახიძე არიან. ინიციატორები განმარტავენ, რომ გასაჩივრების ვადების ამგვარად განსაზღვრა უზრუნველყოფს კანდიდატების შერჩევის პროცესის დროში ეფექტიანობას, რათა უმართებულოდ არ გაჭიანურდეს უზენაესი სასამართლოს მოსამართლეობის კანდიდატების შერჩევისა და პარლამენტისთვის ასარჩევად წარდგენის პროცესი.