კახა კახიშვილი: კატეგორიული წინააღმდეგი ვარ აგრესიული და ბინძური კამპანიის

„აგრესიული საარჩევნო კამპანიის მომხრე არ ვარ - როდესაც წარმადგინეს, ოპონენტებსაც კი ვთხოვე, თუ გნებავთ შევხვდეთ და გავიაროთ ის თამაშის წესები, რომელიც გვექნება საარჩევნო კამპანიის პერიოდში“, - ამის შესახებ ისანში „ქართული ოცნების“ მაჟორიტარი დეპუტატობის კანდიდატმა კახა კახიშვილმა გადაცემაში „ქრონიკა“ განაცხადა.

მისი თქმით, თუ შტაბების დონეზე იქნება რეაგირება, ეფექტიც მეტია.

„ამ თემაზე საუბარი რამდენიმე კანდიდატთან მქონდა. გვქონდა რაღაც პრობლემა, რომელიც უცებ გადავწყვიტეთ ერთ-ერთ კანდიდატთან, კატეგორიული წინააღმდეგ ვარ აგრესიული და ბინძური კამპანიის“, - აღნიშნა კახა კახიშვილმა.

მისივე თქმით, შეიძლება განსხვავებული პოლიტიკური შეხედულებები გქონდეს, მაგრამ მთავარია, არ შელახო შენი კონკურენტის ღირსება, თუნდაც იმ ადამიანის, რომელიც სხვანაირად ფიქრობს.

„მიუხედავად ნებისმიერი აგრესიისა, მშვიდი, ადამიანური პოლიტიკური კამპანია უნდა ვაწარმოოთ. ვიღაც რომ მოვიდეს და აგური ჩამარტყას, სხვა თემაა. არის რაღაცები, რაც შეიძლება, მძიმე იყოს, მაგრამ ჯობს აიტანო. თქვენ ახსენეთ საპრეზიდენტო არჩევნები - ძალიან მძიმე იყო, მაგრამ მახსოვს ის დროც, როდესაც უბნებზე ავტომატიანი ადამიანების მეშვეობით იცავდნენ საარჩევნო ყუთს. ან თუნდაც რაღაც ტიპის მანიპულირება არჩევნებზე - ვგულისხმობ 1993 წელს და ასე შემდეგ. ვითარება იცვლება - გახსოვთ, იმ წლებში მაჟორიტარების კანდიდატებს ავტომატიანი ხალხი დაჰყვებოდა და ხშირ შემთხვევაში კონფლიქტამდეც მისულა. ნელ-ნელა ვვითარდებით და ვხვეწთ საარჩევნო თამაშის წესებს. დარწმუნებული ვარ, რომ მომავალი არჩევნები უკეთესი იქნება, რადგან გამორიცხულია სიძულვილის ენით, ერთმანეთის შეურაცხყოფით აშენდეს კარგი, საერთო ქვეყანა“, - აცხადებს კახა კახიშვილი.

საქართველოში არჩევნები 31 ოქტომბერს გაიმართება.