გიორგი ვაშაძე: ნახავთ, „ქართულ ოცნებას“ დაბალი რეიტინგი ექნება

ივანიშვილის განცხადება მიუთითებს, რომ კატასტროფულად ვარდება მათი რეიტინგი და რეალურად აგებენ, უნდათ ასეთი ხელოვნური განცხადებებით შეინარჩუნონ ამომრჩეველი, - ამის შესახებ „სტრატეგია აღმაშენებლის“ ლიდერმა, გიორგი ვაშაძემ განაცხადა.

„თქვენ ნახავთ, მათ ექნებათ ძალიან დაბალი რეიტინგი, იმიტომ, რომ ხალხს ყელში ამოუვიდა გაჭირვება, მანიპულაციები, მოტყუება და ის დანაშაულები, რომლებიც ჩაიდინეს“, - განაცხადა გიორგი ვაშაძემ.

8 ოქტომბერს „ქართული ოცნება - დემოკრატიული საქართველოს“ პარტიის თავმჯდომარის, ბიძინა ივანიშვილის განცხადება გამოქვეყნდა, რომელშიც აღნიშნულია: „ქართული ოცნება“ დამაჯერებლად იმარჯვებს ამ არჩევნებში. ყველა კვლევა ადასტურებს, რომ ქართული საზოგადოების უპრეცედენტო მხარდაჭერის ფონზე, ჩვენი საპროგნოზო მაჩვენებელი 54-დან 60%-მდე მერყეობს და რიგ შემთხვევებში, 63%-საც კი აჭარბებს“.

საქართველოში საპარლამენტო არჩევნები 31 ოქტომბერს ჩატარდება.