ირაკლი კობახიძე: აშშ-ის ელჩის გზავნილი ეკუთვნის იმ პოლიტიკურ პარტიებს, რომლებიც არჩევნებს აგებენ

კელი დეგნანის გზავნილი ეკუთვნის იმ პოლიტიკურ პარტიებს, რომლებიც აგებენ, - ამის შესახებ „ქართული ოცნების“ აღმასრულებელმა მდივანმა ირაკლი კობახიძემ პარტიის ოფისში გამართულ პრესკონფერენციაზე განაცხადა.

„არჩევნების შედეგებს ეჭვქვეშ აყენებენ ის პარტიები რომლებიც აგებენ. ამ შემთხვევაში ესენი არიან ოპოზიციური პარტიები, რომლებსაც უკვე წაგებული აქვთ არჩევნები. ჩვენ გაგიზიარეთ ჩვენი შტაბების მონაცემები, რაც 900 ათასსა აცილებული. ეს მონაცემი იყო საათნახევრის წინ და სავარაუდოდ ეს მონაცემი მილიონს ასცდება. შესაბამისად „ქართული ოცნება“ დამაჯერებლად იგებს ამ არჩევნებს და არ აქვს მოტივაცია, რომ შეაფერხოს საარჩევნო კომისიების საქმიანობა“, - აღნიშნა კობახიძემ.

აშშ-ის ელჩი საქართველოში კელი დეგნანი საქართველოში მიმდინარე საარჩევნო პროცესს გამოეხმაურა. დეგნანის განცხადებით, ძალიან მნიშვნელოვანია, რომ ყველა პოლიტიკური პარტიის მხარდამჭერმა მშვიდად მიიღოს ოფიციალური შედეგები და აჩვენოს, რომ ეს არჩევნები თავიდან ბოლომდე პასუხობს საერთაშორისო სტანდარტებს.

საქართველოში საპარლამენტო არჩევნები მიმდინარეობს. ამომრჩეველმა არჩევანი დღეს 50 საარჩევნო სუბიექტს - ორ ბლოკსა და 48 პარტიას შორის უნდა გააკეთოს. საპარლამენტო არჩევნებისთვის 38 ქვეყანაში 52 საარჩევნო უბანი გაიხსნა. 2020 წლის 31 ოქტომბრის არჩევნებისთვის კოვიდდაწესებულებებში 127 საარჩევნო უბანი მუშაობს. პენიტენციურ დაწესებულებებში კი 10 საარჩევნო უბანი გაიხსნა. არჩევნებს 132 ადგილობრივი და 23 საერთაშორისო ორგანიზაციის წარმომადგენელი აკვირდება. ამასთან, ამერიკული ორგანიზაცია Public Opinion Strategies „იმედის“ დაკვეთით ეგზიტპოლს ატარებს.