მამუკა მდინარაძე: როდესაც ეკატერინე ტიკარაძის წინააღმდეგ მიზანმიმართული კამპანია მიმდინარეობს, ეს ამორალურად მიმაჩნია

რა თქმა უნდა, არის ხარვეზები და მათი შესწავლა აუცილებელია. მე არ მოვერიდები კრიტიკას და ხელს არავის დავაფარებ, მაგრამ როდესაც მიზანმიმართული კამპანია მიმდინარეობს, მაგალითად, ეკატერინე ტიკარაძის წინააღმდეგ, ეს ამორალურად მიმაჩნია, - ამის შესახებ ტელეკომპანია „იმედის“ გადაცემაში „დღის ქრონიკა“ პარლამენტის ვიცე-სპიკერმა, მამუკა მდინარაძემ განაცხადა.

„პანდემია მსოფლიო გამოწვევაა და ძალიან მდიდარმა და განვითარებულმა ქვეყნებმა ვერ შეძლეს, ეს პროცესი ხარვეზების გარეშე ემართათ. ეს ძალიან სერიოზული პრობლემაა და მასთან გამკვლავება ყველას უჭირს და გვიჭირს ჩვენც. თუ ვინმეს ჰქონდა მოლოდინი, რომ მხოლოდ საქართველო შეძლებდა ამასთან გამკლავებას ხარვეზების გარეშე, ბუნებრივია, ის არასწორად მსჯელობდა, თუმცა კარგი იქნებოდა, ეს ასე ყოფილიყო. როდესაც ამ ფონზე ექიმებს, ჯანდაცვის მინისტრს, ხანდახან მკურნალ ექიმებსაც კი ესხმიან თავს. ხომ შეიძლება შევთანხმდეთ, ხელისუფლებაც და ოპოზიციაც, და ვთქვათ, რომ ამ თემაზე არ შეიძლება ერთმანეთთან ბრძოლა. არ შეიძლება, ომში შენს მეთაურზე მიიტანო იერიში, მაგრამ ამაზე არ ამბობენ უარს. დღეს ჩავატარეთ ბრიფინგი, რომ მოგვეწოდებინა მათთვის - რაღაცნაირად უნდა გავერთიანდეთ ამ ერთი პრობლემის ირგვლივ. აქედან გამომდინარეობს კიდევ ერთი პრობლემა - ეკონომიკური გამოწვევები და ამის წინაშე დგანან ჩვენზე უფრო ძლიერი სახელმწიფოებიც. ყველა საკუთარ თავზე მაღლა უნდა დავდგეთ და ერთმანეთს ხელი შევუწყოთ ამ პრობლემის აღმოფხვრაში. რა თქმა უნდა, არის ხარვეზები და მათი შესწავლა აუცილებელია. მე არ მოვერიდები კრიტიკას და ხელს არავის დავაფარებ, მაგრამ როდესაც მიზანმიმართული კამპანია მიმდინარეობს, მაგალითად, ეკატერინე ტიკარაძის წინააღმდეგ, ეს ამორალურად მიმაჩნია“, - განაცხადა მდინარაძემ.