ვახტანგ მახარობლიშვილმა აშშ-ის კომერციის მდივნის თანაშემწის მოადგილესთან ქვეყნებს შორის ეკონომიკის მიმართულებით დინამიკური თანამშრომლობის გაღრმავების პერსპექტივები განიხილა

საგარეო საქმეთა მინისტრის პირველმა მოადგილემ, ვახტანგ მახარობლიშვილმა ​ ევროპისა და ევრაზიის საკითხებში აშშ-ის კომერციის მდივნის თანაშემწის მოადგილესთან, დევიდ დე ფალკოსთან ონლიან შეხვედრა გამართა.

მხარეებმა აშშ-საქართველოს სტრატეგიული პარტნიორობის მთავარი საკითხები და ქვეყნებს შორის ვაჭრობისა და ეკონომიკის მიმართულებით დინამიკური თანამშრომლობის შემდგომი გაღრმავების პერსპექტივები განიხილეს. შეხვედრა დე ფალკოს საქართველოში ვირტუალური ვიზიტის ფარგლებში გაიმართა და მასში აშშ-ის მხრიდან სახელმწიფო დეპარტამენტის, USAID-ისა და საერთაშორისო განვითარების საფინანსო კორპორაციის (DFC) წარმომადგენლები მონაწილეობდნენ.

მხარეებმა აშშ-სა და საქართველოს შორის ვაჭრობისა და ეკონომიკის სფეროში მიმდინარე ინტენსიური თანამშრომლობის პროგრესი და არსებული მიღწევების საფუძველზე კავშირების შემდგომი გაღრმავების გზები და კონკრეტული ინიციატივები შეაჯამეს. საუბარი შეეხო საქართველოში ამერიკული ბიზნეს კომპანიების ჩართულობის გაზრდისა და მეტი ინვესტიციის მოზიდვის მიზნით გადასადგმელ კონკრეტულ ნაბიჯებს.

ყურადღება გამახვილდა აშშ-სა და საქართველოს შორის თავისუფალი ვაჭრობის თაობაზე შეთანხმებისა და საქართველოში საერთაშორისო განვითარების საფინანსო კორპორაციის რეგიონული ოფისის შესაძლო გახსნის საკითხებს. საგარეო საქმეთა მინისტრის პირველი მოადგილე განსაკუთრებით მიესალმა აშშ-სა და საქართველოს შორის მზარდ ეკონომიკურ თანამშრომლობას და მადლიერება გამოხატა აშშ-ის მხარდაჭერისა და დახმარებისთვის საქართველოს მიერ კორონავირუსის წინააღმდეგ ბრძოლისა და პანდემიით გამოწვეულ ეკონომიკურ შედეგებთან გამკლავების პროცესში.

პანდემიის გამოწვევების ფონზე ეკონომიკური აქტივობის წახალისების კუთხით ყურადღება გამახვილდა საშუალო და მცირე ზომის ბიზნეს სუბიექტების მხარდაჭერის მნიშვნელობაზე. ამერიკულმა მხარემ ამ თვალსაზრისით რელევანტურ ქართულ უწყებებთან აქტიური თანამშრომლობის მზაობა დაადასტურა. ქართულმა მხარემ კომერციის მდივნის თანაშემწის მოადგილეს მადლობა გადაუხადა იმისათვის, რომ საქართველოს კერძო სექტორს აშშ-ის მთავრობა, USAID-ის საშუალებით, დაეხმარება COVID-19 პანდემიის შემდგომ აღდგენაში და დააფინანსებს უცხოური ინვესტიციების საკონსულტაციო ფირმა OCO Global-ს, რომელიც გამოავლენს მაღალანაზღაურებადი ინვესტიციების შესაძლებლობებს საქართველოს ეკონომიკაში და ხელს შეუწყობს ქვეყნის ეკონომიკური პოტენციალის შესახებ მსხვილ საერთაშორისო ინვესტორებს შორის ცნობიერების ამაღლებას.

მხარეებმა მზაობა გამოხატეს ერთობლივი, ინტენსიური ძალისხმევის გასაგრძელებლად ქვეყნებს შორის ვაჭრობისა და ეკონომიკის სფეროში თანამშრომლობის გასაღრმავებლად. საუბრისას, ასევე, განხილულ იქნა საქართველოს, როგორც რეგიონული ჰაბის ფუნქციას და ამ კონტექსტში ხაზი გაესვა საქართველოს მიერ საერთაშორისო პარტნიორებთან ერთად განხორციელებულ პროექტებსა და სამომავლო გეგმებს. განსაკუთრებული ყურადღება გამახვილდა საქართველოსა და რეგიონულ პროექტებში აშშ-ის ჩართულობისა და მონაწილეობის გაზრდის მნიშვნელობას სამხრეთ კავკასიისა და შავი ზღვის რეგიონის ეკონომიკური განვითარებისა და უსაფრთხოების განმტკიცების კონტექსტში. საგარეო საქმეთა მინისტრის მოადგილემ აშშ-ის მხარეს დეტალური ინფორმაცია მიაწოდა საქართველოს მიერ რეგიონული ჰაბის ფუნქციის განმტკიცებისა და გაფართოების მიზნით საქართველოს მიერ ბოლო პერიოდში გადადგმულ ნაბიჯებს შესაბამისი საკანონმდებლო ჩარჩოს გაძლიერების, სავაჭრო პოლიტიკისა და მსხვილი ინფრასტრუქტურული პროექტების განვითარების კუთხით. აშშ-ის კომერციის მდივნის ვირტუალური ვიზიტი საქართველოში ორ დღეს გაგრძელდება და ვიზიტის ფარგლებში დაგეგმილია კომერციის მდივნის თანაშემწის მოადგილის შეხვედრები საქართველოს ეკონომიკისა და მდგრადი განვითარების, სოფლის მეურნეობის სამინისტროებთან, ასევე, ეროვნული უშიშროების საბჭოსა და „საქპატენტის“ წარმომადგენლებთან.