თამთა მეგრელიშვილი: თუ ოპოზიცია თვლის, რომ მათ არჩევნები ვინმემ გაუყალბა, მათ შეეძლოთ კანონმდებლობის ფარგლებში ემოქმედათ

ოპოზიცია ყოველთვის აპელირებს იმაზე, რომ არჩევნები გაყალბდა მხოლოდ და მხოლოდ იმიტომ, რომ მათ ვერ გაიმარჯვეს და სასურველი შედეგი ვერ დადეს. სამართლებრივად რომ შევაფასოთ, სამართლებრივად ტერმინი - გაყალბება საერთოდ არ არსებობს და ეს არის იმ ძალის დამხმარე მექანიზმი, რომელიც თვლის, რომ არ დამარცხებულა, - ამის შესახებ იურისტმა, თამთა მეგრელიშვილმა „იმედის“ გადაცემა „ნამდვილ რიცხვებში“ განაცხადა.

მისივე თქმით, თუ ამ ლოგიკას გავყვებით და ვიტყვით, რომ არჩევნები გაყალბდა, მაშინ საზოგადოებამ უნდა იცოდეს, რომ დათმობებზე წასვლა არ არის საჭირო და კანონი არის ყველასთვის ერთნაირი დავალება.

„შესაბამისად, საქართველო, როგორც სამართლებრივი სახელწმიფო, ყველას აძლევს შესაძლებლობას, რომ ყოველგვარი გადაცდომის შემთხვევაში, რომელიც შესაძლოა დაფიქსირებულიყო და შევთანხმდეთ იმაზე, რომ არც ერთი არჩევნები არ ჩატარებულა და არც ჩატარდება, რომ არ არსებობდეს გარკვეული ტიპის ხარვეზები, კანონით მოახდინოს რეაგირება“, - განაცხადა თამთა მეგრელიშვილმა.

მისივე თქმით, ოპოზიცია ქუჩაში მანამდე გავიდა, სანამ საარჩევნო პროცესები სრულად დასრულდებოდა.

„ეს არის მთავარი გასაღები იმისა, რა იყო მათი მისია. მათი მისია და პირდაპირი დავალება იყო ის, რომ მათ მოეწყოთ რევოლუციური სცენარი, რაც არ შედგა და დღეს ამბობენ, რომ არჩევნები ტოტალურად გაყალბდა. ახლა მიდის სცენარი, რომ მოხდეს არჩევნების არალეგიტიმურად გამოცხადება, რაც სამართლებრივად ცალსახად გამორიცხულია. თუ ოპოზიცია თვლის, რომ მათ არჩევნები ვინმემ გაუყალბა, მათ შეეძლოთ კანონმდებლობის დანაწესის ფარგლებში ემოქმედათ, რადგან კანონი ყველასთვის თანაბარი შესაძლებლობის მიმცემია“, - განაცხადა თამთა მეგრელიშვილმა.