სანდრო რაქვიაშვილი: იმედი მაქვს, დავისვენებთ, შევჭამთ საცივს და დავფიქრდებით, რომ მართლა დიდი პრობლემის წინაშე ვდგავართ, ყველას მოგვიწევს რაღაცები დავთმოთ

არ მგონია, „სამართლაინი არჩევნების“ (ISFED) გამო რამე შეიცვალოს, თუმცა რაც დრო გადის, ხელისუფლებაც და ოპოზიციაც ხედავს, რომ ასე ცხოვრების გაგრძელება არ შეიძლება, – ამის შესახებ „გირჩის“ წევრმა, სანდრო რაქვიაშვილმა განცხადა.

მისი თქმით, თქმით, ISFED-ის დასკვნა არ იყო არჩევნების გაყალბებაზე საუბრისას მთავარი არგუმენტი. „ზოგადად ISFED-ის ეს დათვლები, რომელიც აღმოჩნდა რომ არასწორად იყო განხორციელებული, პრინციპულად ვერ შეცვლიდა ოქმებს, რომლებიც ცესკო-ს მიერ იყო შედგენილი. პრობლემა იყო ის, რომ ორი კვირა იცოდნენ და არ გვითხრეს. ადრე რომ ეთქვათ, საერთოდ პრობლემა არ გაჩნდებოდა. ამიტომ, არ მგონია, რამე შეიცვალოს ISFED-ის გამო, თუმცა რაც დრო გადის, ორივე მხარე ხედავს, რომ ასე ცხოვრების გაგრძელება არ შეიძლება“, – განაცხადა რაქვიაშვილმა.

რაც შეეხება მოლაპარაკებებს პროცესს, რაქვიაშვილის განცხადებით, საჭიროა, მოლაპარაკებების მხარეები დათმობაზე წავიდნენ. „იმედი მაქვს, რომ გავა ერთი კვირა, ორი კვირა, დავისვენებთ, შევჭამთ საცივს და მერე დავფიქრდებით, რომ მართლა დიდი პრობლემის წინაშე ვდგავართ. ძალიან ვნერვიულობ, მაგრამ ბევრი ოპოზიციონერი და „ქართული ოცნების“ წარმომადგენელი ფიქრობს, რომ რაღაც გართობაა. ზოგი ხუმრობს, მე კი მიმაჩნია, რომ ასე შეიძლება ძალიან ცუდი შედეგი მივიღოთ, რომელიც ყველას დაგვაზიანებს. ამიტომ, როგორც კი, ამას დავინახავთ, მგონი, სხვა ემოციით მივუდგებით მოლაპარაკებებს და მარტივად ვიპოვით კომპრომისს. ზოგადად, მოლაპარაკების იდეა იმაშია, რომ ორივე მხარემ უნდა დათმოს. თუ ერთი მხარე ამბობს, რომ არაფერს არ დათმობს, მაშინ ის არ იღებს მონაწილეობას და მისი მიზანია, რომ ჩაიშალოს მოლაპარაკებები. ამიტომ, ყველას მოგვიწევს რაღაცები დავთმოთ“, – განაცხადა რაქვიაშვილმა.

ოპოზიცია და მმართველი გუნდი მოლაპარაკებების მეხუთე რაუნდის მოლოდინში არიან. მხარეები იმედოვნებენ, რომ პოზიციების დაახლოებას შეძლებენ. მიუხედავად იმისა, რომ ხელისუფლების ოპონენტებს ახალი არჩევნები სურთ, „ქართულ ოცნებას“ კი, - შეთანხმება არჩევნების გარეშე. მოლაპარაკებების შუამავალმა ელჩმა მხარეებს მკაფიოდ უთხრა, რომ უნდა გადაწყვიტონ, როგორ მიაღწიონ შეთანხმებას. წინააღმდეგ შემთხვევაში, მეხუთე რაუნდი ეფექტური ვერ იქნება.