მამუკა ხაზარაძე: თუ რაღაც მიზეზის გამო არჩევნების 2021-ში ჩატარებას ვერ მივაღწიეთ, ერთადერთი ვარიანტი რჩება - სრულფასოვანი, სრულად პროპორციული არჩევნების 2022 წლის გაზაფხულზე ჩატარება

მამუკა ხაზარაძის განცხადებით, მისი მოსაზრება რიგგარეშე არჩევნების 2022 წელს ჩატარებასთან დაკავშირებით განიხილებოდა მხოლოდ იმ სცენარში, თუკი ოპოზიცია რიგგარეშე არჩევნების ჩატარებას, ყველანაირი მცდელობის მიუხედავად, 2021 წელს ვერ მიაღწევდა. ამის შესახებ „ლელოს“ ლიდერმა „რუსთავი 2“-ის ეთერში განაცხადა.

მისი თქმით, ეს განცხადება არ ნიშნავს, რომ „ლელო“ ბოიკოტს წყვეტს ან 2021 წელს რიგგარეშე არჩევნების ჩატარებას არ ითხოვს.

„მინდა ხაზი გავუსვა, ძალიან ბევრ ადამიანთან, რომელიც დღეს ოპოზიციის მხარესაა, არ მაკავშირებს არანაირი ღირებულებითი ან ფილოსოფიური კავშირი ან მორალური ამბავი. ყველა თავისუფალია თავის კომენტარებში, მაგრამ მინდა ეს ყველაფერი გადავშალოთ და დავუბრუნდეთ ძირითადს. ძირითადში ოპოზიციონერები დღეს აპროტესტებენ გაყალბებულ არჩევნებს - ეს არის მოცემულობა, ძირითადი მოთხოვნა არის რიგგარეშე არჩევნების ჩატარება, რაც შეიძლება სწრაფად - 2021-ში.

მე არ ვაპირებ, ირაკლი ოქრუაშვილისა და შალვა ნათელაშვილის კომენტარებზე კომენტარის გაკეთებას, საქმეზე ვილაპარაკოთ, საქმე კიდევ მდგომარეობს შემდეგში: ოპოზიცია ყველა ღონისძიებას ხმარობს დღეს და ის ბერკეტი აქვს, რომ არ შედის პარლამენტში. ამას დაემატება საკმაოდ სერიოზული გამოხმაურება ჩვენი პარტნიორი ქვეყნებისგან, როგორც კი ახალი წელი გადაივლის. ამას, სამწუხაროდ, ემატება ის მძიმე მდგომარეობა, რომელიც შექმნილია ქვეყანაში. „ქართული ოცნება“ იძულებული იქნება დანიშნოს რიგგარეშე არჩევნები, რაც უფრო სწრაფად, მით უკეთესია ჩვენი ქვეყნისთვის. მაგრამ, თუ რაღაც მიზეზის გამო ეს ვერ მოხდა და ჩვენ ჩვენი ძალისხმევით ვერ მივაღწიეთ, ერთადერთი ვარიანტი რჩება, რომ ჩატარდეს სრულფასოვანი, სრულად პროპორციული არჩევნები 2022 წლის გაზაფხულზე, რადგან ჩვენ შემოდგომაზე გვაქვს ადგილობრივი თვითმმართველობის არჩევნები ჩასატარებელი.

თუმცა, ამას ვგულისხმობ მხოლოდ და მხოლოდ იმ შემთხვევაში, როცა იცვლება საარჩევნო კანონმდებლობა. ეს ვარიანტი განიხილება იმ შემთხვევაში, თუ მოლაპარაკება ვერ შედგა ყველა მეთოდის გამოყენების მიუხედავად, მაგრამ ეს არ ნიშნავს, რომ ვიღაც ბოიკოტს ანებებს თავს ან იმას, რომ ვიღაც 2021 წელს არჩევნებს არ ითხოვს“, - განაცხადა მამუკა ხაზარაძემ.

მოძრაობა „ერთიანი საქართველოსთვის“ ლიდერმა ირაკლი ოქრუაშვილმა „ლელოს“ თანადამფუძნებელს, მამუკა ხაზარაძეს მიმართა და გალექსილ პოსტში სიმხდალეში დასდო ბრალი.

ამის მიზეზი კი ხაზარაძის მიერ ერთ-ერთი ტელევიზიის ეთერით გაკეთებული განცხადებაგახდა, რომ კარგი იქნება, თუ ვადამდელი არჩევნები 2021 წელს ჩატარდება, თუმცა, მანვე აღნიშნა, რომ ეს არარეალურია და ვადამდელი არჩევნები სრულად პროპორციული სისტემით 2022 წელს უნდა ჩატარდეს.