მამუკა მდინარაძე: იმედი გვაქვს, რაციონალურ გადაწყვეტილებამდე მივლენ და თებერვალში საპარლამენტო ცხოვრებას ოპოზიციური წარმომადგენლობით გავაგრძელებთ

არსებობს თუ არა შეთანხმების მიღწევის რესურსი, ეს დამოკიდებულია იმაზე, რამდენად შეძლებენ ოპოზიციური პარტიები კომპლექსების დაძლევას, - ამის შესახებ ფრაქცია „ქართული ოცნების“ თავმჯდომარემ, მამუკა მდინარაძემ ჟურნალისტებს განუცხადა.

„ეს დამოკიდებულია კონკრეტული პარტიული სუბიექტების მხრიდან კომპლექსების მოხსნაზე. ჩემთვის ასევე წარმოუდგენელია, როგორ შეიძლება იყო მაგალითად, ბოკერიას მიერ დალაგებული ნარატივის და კომპლექსის ქვეშ, ეს გაკომპლექსებდეს.

​თუ ოპოზიციური სპექტრი ამ კომპლექსს მოიხსნის, მაშინ ჩვენ შევთანხმდებით. თუ ამ გავლენების ქვეშ უნდა იყვნენ, მაშინ ჩვენ ამაზე საუბარი გაგვიჭირდება, რომ შევთანხმდებით, თუმცა გულწრფელად მაინც იმედი გვაქვს, რომ ისინი რაციონალურ გადაწყვეტილებამდე მივლენ და თებერვალში საპარლამენტო ცხოვრებას გავაგრძელებთ ოპოზიციური წარმომადგენლობით“, – განაცხადა მამუკა მდინარაძემ.

ოპოზიცია და მმართველი გუნდი მოლაპარაკებების მეხუთე რაუნდის მოლოდინში არიან. მხარეები იმედოვნებენ, რომ პოზიციების დაახლოებას შეძლებენ. მიუხედავად იმისა, რომ ხელისუფლების ოპონენტებს ახალი არჩევნები სურთ, „ქართულ ოცნებას“ კი, - შეთანხმება არჩევნების გარეშე. მოლაპარაკებების შუამავალმა ელჩმა მხარეებს მკაფიოდ უთხრა, რომ უნდა გადაწყვიტონ, როგორ მიაღწიონ შეთანხმებას. წინააღმდეგ შემთხვევაში, მეხუთე რაუნდი ეფექტური ვერ იქნება.