ევროსაბჭოს მინისტრთა კომიტეტის თავმჯდომარე საქართველოს, საბერძნეთისა და გერმანიის თავმჯდომარეობის პერიოდში განხორციელებულ საქმიანობაზე ანგარიშს აქვეყნებს

ევროსაბჭოს მინისტრთა კომიტეტის თავმჯდომარე ორგანიზაციაში საქართველოს, საბერძნეთისა და გერმანიის თავმჯდომარეობის პერიოდში განხორციელებულ საქმიანობაზე ანგარიშს აქვეყნებს.

„2020 წლის 27 თებერვალს, საქართველოს თავმჯდომარეობის დროს, გაიმართა მაღალი დონის კონფერენცია - „გარემოს დაცვა და ადამიანის უფლებები“. საქართველოს თავმჯდომარეობის დროს, მრგვალი მაგიდა „ბავშვებზე მორგებული მართლმსაჯულება - ევროპაში აღდგენითი მართლმსაჯულების სფეროში არსებული გამოცდილების გაერთიანება“ Covid-19-ის პანდემიის გამო ონლაინ რეჟიმში ჩატარდა. რაც შეეხება საქართველოს, 2020 წლის 5 თებერვალს დეპუტატებმა ცნობად მიიღეს საქართველოსთვის 2016-2019 წლების სამოქმედო გეგმის შესრულების საბოლოო ანგარიში. 2020 წლის 22 აპრილს, დეპუტატებმა ცნობად მიიღეს გენერალური მდივნის 21-ე კონსოლიდირებული ანგარიში საქართველოში კონფლიქტის შესახებ“, - ნათქვამია ანგარიშში.

ანგარიშში ასევე აღნიშნულია, რომ „2020 წლის 21 ოქტომბერს, დეპუტატებმა (მინისტრთა კომიტეტი) მიიღეს გადაწყვეტილებები სახელწოდებით „ევროპის საბჭო და კონფლიქტი საქართველოში“. მათ კიდევ ერთხელ დაადასტურეს ევროპის საბჭოს წევრი სახელმწიფოების ცალსახა მხარდაჭერა საქართველოს სუვერენიტეტისა და ტერიტორიული მთლიანობისადმი მის საერთაშორისოდ აღიარებულ საზღვრებში. კერძოდ, დეპუტატებმა განაცხადეს, რომ რუსეთის ფედერაციასა და საქართველოს შორის შეიარაღებული კონფლიქტიდან 12 წლის შემდეგ, რუსეთის ფედერაცია აფერხებს კონფლიქტის მშვიდობიანი გზით მოგვარების პროცესს და ხელს უშლის უსაფრთხოებასა და სტაბილურობას რეგიონში, მათ შორის აფხაზეთისა და ცხინვალის რეგიონში / სამხრეთ ოსეთში მუდმივი სამხედრო ყოფნის, სამხედრო წვრთნების გაზრდისა და ინფრასტრუქტურის გაძლიერების გზით. მათ კიდევ ერთხელ დაადასტურეს, რომ რუსეთის ფედერაციის ნებისმიერი უკანონო ქმედება, რომელიც მიზნად ისახავს საქართველოს რეგიონების სტატუსის შეცვლას, მათ შორის რუსული პასპორტების გაცემა და ე.წ. ბინადრობის ნებართვების გაცემა, არ აქვს იურიდიული ძალა და ადგილზე ვითარებას ართულებს. მათ რუსეთის ფედერაციას მოუწოდეს, შეაჩეროს ეს უკანონო პროცესი. მათ სერიოზული შეშფოთება გამოხატეს აფხაზეთის რეგიონსა და ცხინვალის რეგიონში / სამხრეთ ოსეთში „გამშვები პუნქტების“ ხანგრძლივად ჩაკეტვის გამო, რამაც ადგილობრივი მოსახლეობისთვის მძიმე ჰუმანიტარული შედეგები გამოიწვია და ღრმა შეშფოთება გამოხატეს იმის გამო, რომ ადამიანის უფლებათა მდგომარეობა საქართველოს რეგიონებში, აფხაზეთსა და ცხინვალის რეგიონში / სამხრეთ ოსეთში, კიდევ უფრო გაუარესდა. მათ ასევე განსაკუთრებული შეშფოთება გამოხატეს მთელი რიგი საკითხების გამო, როგორიცაა ეთნიკური ნიშნით ქართველების დისკრიმინაცია ან დევნილთა და ლტოლვილთა მდგომარეობა, ინციდენტების პრევენციისა და მათზე რეაგირების მექანიზმების (IPRM) შეჩერება. მათ მხარდაჭერა გამოუხატეს საქართველოს მთავრობის სამშვიდობო ინიციატივას სახელწოდებით „ნაბიჯი უკეთესი მომავლისკენ“ და ასევე პროგრამას „მშვიდობის ფონდი უკეთესი მომავლისთვის“. ისინი ასევე ღრმა მწუხარებას გამოთქვამენ იმის გამო, რომ არც ადამიანის უფლებათა კომისარს, არც ევროსაბჭოს სადამკვირვებლო ორგანოებსა და არც სამდივნოს დელეგაციას, რომელიც გენერალური მდივნის კონსოლიდირებულ მოხსენებებს ამზადებს, არ მიეცათ წვდომა შესაბამის რეგიონებზე“.

2020 წლის 25 ნოემბერს დეპუტატებმა ცნობად მიიღეს გენერალური მდივნის 22-ე კონსოლიდირებული ანგარიში საქართველოში არსებული კონფლიქტის შესახებ.