ნაციონალები კონსტიტუციასთან დაკავშირებით უმრავლესობას მათ პირვანდელ წინადადებებს სთავაზობენ

"ნაციონალურ მოძრაობას" მმართველი გუნდის მიმართ საკონსტიტუციო რეფორმასთან დაკავშირებით სამი შეთავაზება აქვს. პარტიის ერთ-ერთი ლიდერის სალომე სამადაშვილის განცხადებით,  პარტიის შეთავაზებები რჩება იგივე, რაც თავდაპირველად იყო და რასაც ვენეციის კომისია იზიარებს. ინფორმაციას სააგენტო ipn ავრცელებს.

"ჩვენი შეთავაზება ხელსუფლებისადმი არის იგივე, რაც იყო მაშინ, როცა დავიწყეთ კონსტიტუციის ახალ პროექტზე საუბარი. გვაქვს იგივე პუნქტები და მოთხოვნები, რაც ასევე არის გაზიარებული ვენეციის კომისიის მიერ. პირველ რიგში - ეს შეეხება საპარლამენტო არჩევნებს, ანუ პარლამენტის ფორმირების წესს. ძალიან დიდი ხანია საერთაშორისო ორგანიზაციები ურჩევენ საქართველოს, რომ გადავიდეს პარლამენტი სრულად პროპორციული არჩევის წესზე და მე ვფიქრობ, დროა პარლამენტი დავაკომპლექტოთ პროპორციულად არჩეული დეპუტატებით. ვერ ვხედავ ვერანაირ ლოგიკას, თუ რატომ უნდა გადავადდეს ეს საკითხი რეალურად 7 წლით. ამასთან ერთად, ჩვენ ვაგრძელებთ იმის მოთხოვნას, რომ მანდატების გადანაწილება მოხდეს პროპორციულად ყველა სუბიექტზე, ვინც გადალახავს ბარიერს. ეს არის ერთადერთი სწორი და სამართლიანი მიდგომა ამ საკითხისადმი. მესამე საკითხი, რომელიც ჩვენთვის პრინციპულად მნიშვნელოვანია, შეეხება პრეზიდენტის არჩევის წესს. ქვეყნის მოსახლეობის 93% მიიჩნევს, რომ პრეზიდენტს უნდა ირჩევდეს პირდაპირ, ეს ძალიან მნიშვნელოვანია და ჩვენ მხარს ვუჭერთ პრეზიდენტის პირდაპირი წესით არჩევას. გარდა ჩვენი მოქალაქეების სურვილისა, მიგვაჩნია, რომ ეს არის მნიშვნელოვანი მექანიზმი, რომ მომავალში გვქონდეს დამატებითი ბერკეტები ხელისუფლების შიგნით ინსტიტუციების მიერ ურთიერთდაბალანსების და გაკონტროლების", - განაცხადა სალომე სამადაშვილმა.

სამადაშვილი ირაკლი კობახიძის მიერ გაკეთებულ განცხადებასაც პასუხობს, რომლის მიხედვითაც მმართველი გუნდი ოპოზიციისგან შეთავაზებას ელის.

"ჩვენი მოთხოვნები არ შეცვლილა გასული თვეების მანძილზე, თავის მოკატუნება, რომ რეალურად აპირებს დიალოგში ჩაბმას და ჩვენგან ელოდება შეთავაზებას, ეს არის ძალიან დიდი სისულელე. ბურთი რეალურად ხელისუფლების მოედანზეა და ეს უთხრა მათ რეალურად ვენეციის კომისიის თავმჯდომარემ, რომ ერთი პარტიის მიერ მიღებული კონსტიტუცია არ იქნება ლეგიტიმური. ოპოზიციის და ჩვენი პარტიის მოთხოვნები ხელისუფლებისთვის დიდი ხანია ცნობილია", - განმარტა სამადაშვილმა.

საკონსტიტუციო ცვლილებების შესახებ კონსენსუსის მიღწევისკენ ქართულ პოლიტიკურ სპექტრს ვენეციის კომისიის მდივანი თომას მარკეტერი და კომისიის პრეზიდენტი ჯანი ბუკიკიო მოუწოდებენ.

პრეზიდენტის ადმინისტრაცია კონსტიტუციასთან დაკავშირებით კონსესუსის მიღწევის მიზნით პოლიტიკურ პარტიებს შეხვედრას სთავაზობს. გუშინ პრეზიდენტის შეთავაზებას პრემიერმინისტრი გიორგი კვირიკაშვილი გამოეხმაურა. დღეს კი კონსენსუსის მიღწევის შესახებ განცხადება პარლამენტის თავმჯდომარემ ირაკლი კობახიძემ გააკეთა.

პრეზიდენტი გიორგი მარგველაშვილი საკონსტიტუციო რეფორმის პროცესში შექმნილი მდგომარეობიდან ერთადერთ გამოსავალს "ნაჩქარევად, ორი მოსმენით მიღებული ერთპარტიული პროექტის" შეჩერებაში ხედავს.