კელი დეგნანის განცხადებით, სააკაშვილის ჯანმრთელობის მდგომარეობაზე კითხვებს სამედიცინო ექსპერტებმა უნდა უპასუხონ

საქართველოში ამერიკის ელჩის, კელი დეგნანის განცხადებით, მიხეილ სააკაშვილის ჯანმრთელობის მდგომარეობის თაობაზე კითხვებს სამედიცინო ექსპერტებმა უნდა უპასუხონ. მისი თქმით, ექსპრეზიდენტის ჯანმრთელობის მდგომარეობის და მისი საჭიროებების შეფასება სპეციალური ჯგუფის პრეროგატივაა.

„ამ საკითხზე ალბათ იმ სამედიცინო ექსპერტებმა უნდა უპასუხონ, ვინც ამ პროცესში არიან ჩართულები. მოგეხსენებათ, არის შექმნილი ჯგუფი, რომელიც მისი ჯანმრთელობის მდგომარეობას სწავლობს. მათ უკეთ იციან და შეუძლიათ შეაფასონ მისი ჯანმრთელობის მდგომარეობა, შესაბამისი საჭიროებები. ეს მათი პრეროგატივაა“, - განაცხადა დეგნანმა.

საქართველოს ყოფილი პრეზიდენტი, მიხეილ სააკაშვილი 1-ელ ოქტომბერს დააკავეს. პატიმრობაში მყოფმა სააკაშვილმა შიმშილობა გამოაცხადა. სააკაშვილის ადვოკატები და სახალხო დამცველი ყოფილი პრეზიდენტის სამოქალაქო საავადმყოფოში გადაყვანას ითხოვდნენ, იუსტიციის სამინისტრო კი აცხადებდა, რომ #18 სასჯელაღსრულების (სამკურნალო) დაწესებულებაში სააკაშვილის მკურნალობისთვის ყველა აუცილებელი პირობა არსებობს.

6 ნოემბერს პენიტენციურმა სამსახურმა გაასაჯაროვა იმ პროდუქტების ამსახველი ფოტომასალა, რომლებითაც პატიმარი სააკაშვილი იკვებებოდა. მიხეილ სააკაშვილი გლდანის მე-18 სამკურნალო დაწესებულებაში 8 ნოემბერს გადაიყვანეს. სტრასბურგის სასამართლომ არ დააკმაყოფილა სააკაშვილის საჩივარი კერძო კლინიკაში გადაყვანასთან დაკავშირებით და შიმშილობის შეწყვეტა მოსთხოვა. მიხეილ სააკაშვილი შიმშილობის შესაწყვეტად პირობებს აყენებდა.

სალომე ზურაბიშვილის განცხადებით, კანონის წინაშე ყველა ერთია, მაგრამ სააკაშვილი განსაკუთრებული პატიმარია, რადგან ყველა აკვირდება მის მდგომარეობას და უმაღლესი სტანდარტების შესრულებას მოითხოვს. სახალხო დამცველის მიერ შექმნილმა კონსილიუმმა მიხეილ სააკაშვილის პოლიპროფილურ კლინიკაში მკურნალობის გაგრძელების რეკომენდაცია გასცა.

საბოლოოდ იუსტიციის სამინისტრომ სააკაშვილს გორის სამხედრო ჰოსპიტალში გადაყვანა შესთავაზა, რაზეც მიხეილ სააკაშვილი დათანხმდა. მან შიმშილობა შეწყვიტა.