ირაკლი კობახიძე ბიძინა ივანიშვილისა და „კრედიტ სუისის“ დავაზე: ფინანსური ინტერესი რომ არ აქვს ბანკს აშკარაა. სხვა ინტერესი შეიძლება იყოს მხოლოდ პოლიტიკური

ეს არის მართლა საუკუნის ძარცვა, - ასე შეაფასა ირაკლი კობახიძემ „კრედიტ სუისის“ მიერ ბიძინა ივანიშვილის თანხების დაკავება. „ქართული ოცნების“ თავმჯდომარის თქმით, როდესაც ადამიანს დანაშაულებრივი გზით უკავებენ 2 მილიარდ დოლარს, ამას უკვე აქვს პოლიტიკური დატვირთვა. მისივე თქმით, ამ დავის წარმოებისას ბანკის ფინანსური ინტერესი არ იკვეთება.

„თეთრი ძაფით არის ნაკერი ეს საქმე. პირდაპირ ანგარიშიდან მოიხსნა ძალიან სოლიდური თანხა - ასობით მილიონი დოლარი. შეიძლება რომელიმე ბანკის თანამშრომელმა ჩაიდინოს დანაშაული და გააქროს ამ ანგარიშიდან თანხა. მაგრამ აქ პრობლემა სად ჩნდება? როდესაც ჩვენი ანგარიშიდან ქრება თანხა, ასეთ დროს ბანკი რეაგირებს და ამ თანხას აბრუნებს. ამით ბანკს აღარ ადგება ფინანსური და, შესაბამისად, რეპუტაციული ზიანი. დღეს ბანკის მენეჯმენტი, მათ შორის ამ საქმის წარმოებითა და გაგრძელებით თვითდაზიანების რეჟიმშია ჩამდგარი. ეს თვითდაზიანება არა მარტო რეპუტაციის, არამედ ფინანსურ თვითდაზიანებას ნიშნავს. როდესაც ფინანსურად აზიანებ საკუთარ ინტერესებს, ბუნებრივია უნდა ვიფიქროთ სხვა ინტერესებზე, რასაც ეს დანაშაულებრივი ქმედება ემსახურება. ეს ერთადერთი ინტერესი შეიძლება იყოს პოლიტიკური“, - განაცხადა კობახიძემ.

მისივე თქმით, მინიშნებები ამაზე როგორც თავად ბიძინა ივანიშვილმა, ასევე მისმა ადვოკატებმა და ექსპერტებმა გააკეთეს.

„ფინანსური ინტერესი რომ არ აქვს ბანკს აშკარაა. პირიქით, ფინანსურ თვითდაზიანებას ახორციელებს. ესე იგი სხვა ინტერესი აქვს. სხვა ინტერესი შეიძლება იყოს მხოლოდ პოლიტიკური“ - აღნიშნა კობახიძემ.

მისივე თქმით, ბევრი უცნაური და საინტერესო დეტალია, რომელიც პირდაპირ მიგვანიშნებს, რომ საქმე არა ფინანსურ, არამედ პოლიტიკურ ინტერესებთან გვაქვს. მათ შორის ის, რომ პირველად თანხა ანგარიშიდან ჯერ კიდევ 2008 წელს, მას შემდეგ მოიხსნა, რაც ბიძინა ივანიშვილი მიხეილ სააკაშვილს სრულად გაემიჯნა.