თეა ახვლედიანი მოლდოვის ვიცე-პრემიერს, რეინტეგრაციის საკითხებში ოლეგ სერებრიანს შეხვდა

შერიგებისა და სამოქალაქო თანასწორობის საკითხებში საქართველოს სახელმწიფო მინისტრმა თეა ახვლედიანმა შეხვედრა გამართა მოლდოვის ვიცე-პრემიერთან რეინტეგრაციის საკითხებში ოლეგ სერებრიანთან, რომელიც საქართველოში ორდღიანი სამუშაო ვიზიტით, სახელმწიფო მინისტრის მოწვევით იმყოფება.

შეხვედრაზე მხარეებმა ხაზი გაუსვეს სახელმწიფო მინისტრის აპარატსა და მოლდოვის რესპუბლიკის რეინტეგრაციის ბიუროს შორის პარტნიორული ურთიერთობების შემდგომი გაღრმავების მზაობას და მნიშვნელობას, მათ შორის 2018 წელს გაფორმებული ურთიერთგაგების და თანამშრომლობის მემორანდუმის ფარგლებში.

მხარეებმა ერთმანეთს ინფორმაცია გაუზიარეს საქართველოსა და მოლდოვაში კონფლიქტის მშვიდობიანი მოგვარების პოლიტიკის განხორციელების პროცესზე, მიმდინარე პროცესებზე და საქართველოსა და მოლდოვის რესპუბლიკის მთავრობების მიერ გაწეულ ძალისხმევაზე.

სახელმწიფო მინისტრმა მიმოიხილა საქართველოს მთავრობის კონფლიქტის მშვიდობიანი მოგვარების პოლიტიკის სხვადასხვა განზომილება, პრიორიტეტები და ამოცანები და აქცენტი გააკეთა ოკუპირებულ რეგიონებში მცხოვრებ მოსახლეობასთან შერიგებისა და ჩართულობის მიმართულებით განხორციელებულ და მიმდინარე საქმიანობაზე, რაც მიზნად ისახავს ხელოვნურად გაყოფილ საზოგადოებას შორის საერთო ინტერესებზე დაფუძნებული თანამშრომლობის, დიალოგისა და ნდობის აღდგენის ხელშეწყობას, ასევე კონფლიქტის შედეგად დაზარალებული მოსახლეობის ჰუმანიტარული და სოციალურ-ეკონომიკური მდგომარეობის გაუმჯობესებას.

თეა ახვლედიანმა მოლდოვის ვიცე-პრემიერს შერიგებისა და ჩართულობის პოლიტიკის ძირითადი შედეგები და არსებული გამოწვევები გააცნო. საუბარი ასევე შეეხო ოკუპირებულ რეგიონებში არსებულ მძიმე უფლებრივ და ჰუმანიტარულ ვითარებას, ადგილობრივი მოსახლეობის ფუნდამენტური უფლებების უხეში დარღვევების, ეთნიკური დისკრიმინაციის, თავისუფალ გადაადგილებაზე დაწესებული შეზღუდვების, საოკუპაციო ხაზის გასწვრივ მავთულხლართებისა და სხვა ხელოვნური ბარიერების უკანონო აღმართვის, საქართველოს მოქალაქეების უკანონო დაკავების, ასევე მშობლიურ ენაზე განათლების მიღების აკრძალვის ჩათვლით.

შეხვედრაზე აღინიშნა უკრაინის წინააღმდეგ რუსეთის სამხედრო აგრესიისა და მიმდინარე საომარი მოქმედებების შედეგად რეგიონში შექმნილი ურთულესი გამოწვევები და მათი გავლენა რეგიონულ უსაფრთხოებასა და საერთაშორისო ნორმებზე დაფუძნებულ მსოფლიო წესრიგზე. ხაზი გაესვა კონფლიქტის მშვიდობიანი მოგვარების პროცესში საქართველოსა და მოლდოვას შორის მჭიდრო თანამშრომლობისა და გამოცდილების გაზიარების მნიშვნელობას, ასევე საერთაშორისო თანამეგობრობის როლს და შემდგომი მხარდაჭერის კონსოლიდაციის აუცილებლობას.

მხარეები შემდგომი მჭიდრო თანამშრომლობის გაგრძელებაზე შეთანხმდნენ.

„საქართველოსა და მოლდოვას ჩვენ საერთო ინტერესებში შემავალი არაერთი მნიშვნელოვანი საკითხი, საერთო მიზნები და გამოწვევებიც გვაკავშირებს, რომელთა შორის ცალსახად აღსანიშნავია საერთაშორისოდ აღიარებულ საზღვრებში ჩვენი ქვეყნების სუვერენიტეტისა და ტერიტორიული მთლიანობის აღდგენა, ისევე როგორც ევროკავშირში გაწევრიანება, და ზოგადად, ორმხრივი თანამშრომლობის შემდგომი გაღრმავება. შესაბამისად, გასული წლის განმავლობაში, სახელმწიფო მინისტრის აპარატსა და მოლდოვის რესპუბლიკის რეინტეგრაციის ბიუროს შორის მჭიდრო ურთიერთობების განახლებას და ახალი იმპულსის მიცემას უდიდესი მნიშვნელობა ენიჭება, რის შედეგადაც, ჩვენი მოწვევით, საქართველოს ორდღიანი სამუშაო ვიზიტით რეინტეგრაციის საკითხებში მოლდოვის ვიცე-პრემიერი სტუმრობს. შემდგომი ორი დღის განმავლობაში მხარეებს საშუალება გვექნება განვიხილოთ აქტუალურ საკითხთა ფართო სპექტრი. დღევანდელ შეხვედრაზე კი ჩვენ ვიმსჯელეთ საქართველოს ოკუპირებულ რეგიონებთან ჩართულობის და შერიგების, ისევე როგორც მოლდოვის კონტროლს მიღმა არსებულ რეგიონთან მიმართებით ჩვენი მთავრობების მიერ გაწეულ ძალისხმევაზე, გავუზიარეთ ერთმანეთს დაგროვილი გამოცდილება და ჩვენი სამომავლო ხედვები, ისევე როგორც შევჯერდით ჩვენი მჭიდრო თანამშრომლობის კონკრეტულ გზებზე“, - განაცხადა სახელმწიფო მინისტრმა, თეა ახვლედიანმა.

თავის მხრივ, შეხვედრის დეტალებზე ისაუბრა ოლეგ სერებრიანმაც.

„ძალიან კარგი შეხვედრა მქონდა ჩემს ქართველ კოლეგასთან, ქალბატონ მინისტრთან თეა ახვლედიანთან. რეინტეგრაციის საკითხებში მოლდოვის რესპუბლიკის ვიცე-პრემიერის რანგში პირველად ვიმყოფები საქართველოში. სამწუხაროდ, ორივე ქვეყანას, მოლდოვასა და საქართველოს, აქვთ სეპარატიზმის პრობლემა, საქართველოს აფხაზეთისა და ცხინვალის რეგიონებთან, ხოლო მოლდოვის რესპუბლიკას დნესტრისპირეთის რეგიონთან მიმართებაში. ორივე შემთხვევაში სეპარატიზმს აქვს მსგავსი წარმომავლობა საბჭოთა კავშირის ბოლო წლებიდან. სეპარატისტული მოძრაობები ორივე ქვეყანაში მხარდაჭერილია ერთი და იგივე ქვეყნის, რუსეთის ფედერაციის მიერ. ახლა საჭიროა ჩვენი ქმედებების კოორდინაცია ჩვენი ქვეყნების რეინტეგრაციისა და ევროკავშირში ინტეგრაციის კუთხით. ძალიან ტურბულენტური პერიოდია შავი ზღვის რეგიონისთვის, რაც განპირობებულია რუსეთის ფედერაციის არაპროვოცირებული აგრესიით უკრაინაში. გეოპოლიტიკური გარემო შავი ზღვის რეგიონის გარშემო მნიშვნელოვნად შეიცვალა, რამაც თავის მხრივ შეცვალა კონფლიქტის მოგვარების პოლიტიკა როგორც საქართველოში, ისე მოლდოვაში. დარწმუნებული ვარ, რომ მექნება ორი საკმაოდ დატვირთული და წარმატებული სამუშაო დღე საქართველოში. დაგეგმილია ძალიან საინტერესო განხილვები საპარლამენტო და სამთავრობო დონეზე, მექნება შეხვედრა საქართველოს პრემიერ-მინისტრთან, საგარეო საქმეთა და ეკონომიკის მინისტრებთან, ეკონომიკური მიმართულება ასევე ძალიან მნიშვნელოვანია, ასევე სამოქალაქო სექტორის წარმომადგენლებთან, რომლებიც ქვეყნის რეინტეგრაციის პროცესზე მუშაობენ. ვიმედოვნებ, რომ ეს ვიზიტი ჩვენი ქვეყნების რეინტეგრაციის პროცესში ახალი ორმხრივი თანამშრომლობის დასაწყისი იქნება“, - განაცხადა ოლეგ სერებრიანოვმა.

სამუშაო ვიზიტის ფარგლებში მოლდოვის ვიცე-პრემიერი შეხვედრებს ასევე გამართავს საქართველოს პრემიერ-მინისტრთან, ვიცე-პრემიერთან, საქართველოს ეკონომიკის და მდგრადი განვითარების მინისტრთან, ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრთან, პარლამენტის თავმჯდომარესთან, ვიც-სპიკერთან, ტერიტორიული მთლიანობის აღდგენისა და დეოკუპაციის საკითხთა დროებითი კომისიის თავმჯდომარესთან და სხვა პარლამენტარებთან, ასევე არასამთავრობო ორგანიზაციების წარმომადგენლებთან და ექსპერტებთან. ვიზიტი აგრეთვე ითვალისწინებს სახელმწიფო მინისტრთან ერთად ცხინვალის რეგიონის მიმართულებით საოკუპაციო ხაზის მონახულებას.