ირაკლი ზარქუა: ვენეციის კომისიამ კიდევ ერთხელ დაადასტურა, რომ დეოლიგარქიზაციის კანონპროექტი არის უკრაინული და დაამტკიცა ის, თუ როგორ ატყუებს რადიკალური ოპოზიცია საზოგადოებას

ვენეციის კომისიამ კიდევ ერთხელ დაადასტურა, რომ დეოლიგარქიზაციის კანონპროექტი არის უკრაინული და დაამტკიცა ის, თუ როგორ ატყუებს რადიკალური ოპოზიცია მსგავს თემებზე საზოგადოებას, - ამის შესახებ საპარლამენტო უმრავლესობის წევრმა, ირაკლი ზარქუამ „ქრონიკის“ პირდაპირ ეთერში განაცხადა.

„ჩვენ ვენეციის კომისიიდან მივიღეთ დასკვნები მთელ რიგ კანონპროექტებთან დაკავშირებით, მათ შორის არის დეოლიგარქიზაციის შესახებ კანონპროექტიც. თქვენ გახსოვთ, როდესაც ჩვენ გადავაგზავნეთ ეს რეკომენდაცია, რადიკალური ოპოზიცია როგორ ამბობდა და ატყუებდა ხალხს, რომ ეს არის „ქართული ოცნების“ ინიციატივა, არ არის უკრაინული. ვენეციის კომისიამ დაადგინა და თქვა, რომ დიახ, ეს არის უკრაინული ვარიანტი. გვაქვს გარკვეული რეკომენდაციები, შენიშვნები და ბუნებრივია ამას განხილვის დროს გავითვალისწინებთ. ჩვენ პირველი მოსმენის დროსაც გვქონდა შესწორებები, რომ კონსტიტუციასთან და ადამიანის უფლებებთან იყოს თანხვედრაში. თუმცა, ეს რომ გაგვეკეთებინა შემდეგ უკვე ეს რადიკალური ოპოზიცია იტყოდა, რომ ეს არ არის უკრაინული, არის ქართული ვარიანტი კონკრეტული პიროვნების წინააღმდეგ. კიდევ ერთხელ დადასტურდა, რომ ეს არის უკრაინული მოდელი და რადიკალური ოპოზიცია ატყუებს მსგავს თემებზე საზოგადოებას. ვენეციის კომისიამ ასევე დაადასტურა ის, რომ ის რეკომენდაციები, რაც დაფიქსირდა ამ კანონპროექტთან დაკავშირებით, იძლევა იმის შესაძლებლობას, რომ გავითვალისწინოთ, კანონი დეოლიგარქიზაციასთან დაკავშირებით მივიღოთ და ამით 12 პუნქტიანი გეგმის ერთ-ერთი უმნიშვნელოვანესი ნაწილი შევასრულოთ“, - აღნიშნა ირაკლი ზარქუამ.