ალექსანდრე რაქვიაშვილი პრემიერის ინტერპელაციაზე: გამოვიდა, რომ „ნაცებთან“ დაპირისპირება უფრო მნიშვნელოვანი აღმოჩნდა ვიდრე, მართლა იმ რისკებზე დისკუსია, რაც ჩვენი ქვეყნის წინაშე დგას

გამოვიდა, რომ „ნაცებთან“ დაპირისპირება უფრო მნიშვნელოვანი აღმოჩნდა, ვიდრე მართლა იმ რისკებზე დისკუსია, რაც ჩვენი ქვეყნის წინაშე დგას, - ამის შესახებ პარტია „გირჩის“ წევრმა, ალექსანდრე რაქვიაშვილმა, „ქრონიკის“ პირდაპირ ეთერში განაცხადა.

„ცხადია, რომ პრემიერის ვიზიტი პარლამენტში მთავარი თემა უნდა იყოს, ეს ნორმალურია, მით უმეტეს ის მოვიდა იმისთვის, რომ საუბარი ყოფილიყო ქვეყნის უსაფრთხოებაზე. უბრალოდ, სამწუხაროდ, ეს საუბარი პარლამენტში, როგორც ხდება ხოლმე, არ შედგა. გამოვიდა, რომ „ნაცებთან“ დაპირისპირება უფრო მნიშვნელოვანი აღმოჩნდა, ვიდრე მართლა იმ რისკებზე დისკუსია, რაც ჩვენი ქვეყნის წინაშე დგას. ჩვენთვის კრიტიკულად მნიშვნელოვანია გვესმოდეს თუ რამდენად მყარი ურთიერთობა გვაქვს ჩვენს მეგობრებთან ევროპაში, ამერიკაში, რადგან გასაგებია, ჩვენ შეიძლება ბევრი ენერგია ჩავდოთ ჩვენს ჯარში, მაგრამ რუსეთის აგრესიისგან მაინც ამერიკისა და ევროპელების კეთილგანწყობა გვიცავს და თუ ჩვენ მათთან ვჩხუბობთ უბრალოდ დაუცველები აღმოვჩნდებით მტერთან. ჩვენი სამხედრო დოქტრინაც იმაზე დგას, რომ ჩვენმა ჯარმა უნდა დაგვიცვას რაღაც პერიოდი, სანამ სხვები დაგვეხმარებიან და თუ სხვების დახმარების იმედი არ გვექნება, ხომ გასაგებია, რომ უსაფრთხოებაზე საუბარი ზედმეტია. ისეთი სიტუაცია შეიქმნა, რომ როდესაც პრემიერ-მინისტრი აკრიტიკებს ევროპარლამენტარებს, ამბობს, რომ ვიღაცები მოსყიდული არიან „ნაციონალური მოძრაობის“ მხრიდან, გასაგებია, რომ ვიღაცები შეიძლება არ მოგვწონდეს, მაგრამ ევროპელების გადმოსახედიდან შევხედოთ ამას. ვიღაც, საშუალო ამომრჩეველი, ევროპის ქვეყნის უყურებს, რომ საქართველო, რომელსაც ევროპაში უნდა, ევროპის დახმარებას ითხოვს, ევროპარლამენტარების ნაწილს ეძახის, რომ მოსყიდულები, კორუმპირებულები არიან და ა.შ. ეს ხომ ძალიან ცუდად გამოჩნდება ქვეყნიდამ?! ჩვენ ეს გვაღელვებს, რომ ის, რაც ფუნდამენტია ჩვენი უსაფრთხოების, იმას ვაფუჭებთ. მეორე, რაც ძალიან მნიშვნელოვანი იყო, არის თავდაცვის კოდექსი, რომლის განხილვაც ორი დღეა მიმდინარეობს პარლამენტში და საბოლოო ჯამში ამაზე არაფერია ნათქვამი. ამაზე ხომ უნდა გამახვილებულიყო ყურადღება?! ასეთ კითხვებზე ჩვენ პასუხი ვერ მივიღეთ, მაგრამ ბევრი ილაპარაკა პრემიერმა იმაზე, თუ რამდენად ცუდები არიან „ნაცები“. ეს ჩვენ ვიცით, რომ „ნაცები“ ცუდები არიან. ჩვენ არც „ქოცები“ მოგვწონს საბოლოო ჯამში და მთელი პრობლემა იმაშია, რომ ამ დაპირისპირებამ, „ნაციონალური მოძრაობისა“ და „ქართული ოცნების“ ყველა დანარჩენი თემა გადააყოლა ჩემს ქვეყანაში“, - განაცხადა რაქვიაშვილმა.