დავით ქართველიშვილი: „უცხოური გავლენების შესახებ“ კანონპროექტის შემუშავება მიზნად ისახავდა სწორედ ისეთი ტიპის გამჭვირვალობაზე ფარდის ახდას, სადაც უფრო კონკრეტული იქნებოდა სამოქალაქო სექტორის როლი

საქართველოში წლებია ფუნქციონირებს გაეროსთან არსებული ორგანიზაცია UNICEF-ის წარმომადგენლობა, რომლის ერთ-ერთი ძირითადი დანიშნულებაა: ბავშვთა კეთილდღეობისა და ჯანმრთელობის გაუმჯობესების მიზნით შესაბამისი სამსახურების ხელშეწყობა მათი განვითარების საქმეში. ამ ავტორიტეტულ ორგანიზაციას, ყოველგვარი ეჭვის გარეშე, ნამდვილად შეუძლია დატანჯულ და იმედგაცრუებულ მშობლებს მიაწოდოს საკუთარი კომპეტენტური დასკვნა, რა თქმა უნდა, საკითხის პროფესიონალურ დონეზე ყოველმხრივი შესწავლის შემდეგ,- ამის შესახებ სოციალურ ქსელში „ხალხის ძალის“ წევრი დავით ქართველიშვილი წერს.

როგორც ის აღნიშნავს, „აქონდროპლაზიის“ სინდრომის მქონე ბავშვების თემა ძალიან სენსიტიურია და გასაგებია მშობლების პროტესტიც. რადგან ჯერ კიდევ ჯანმო-ს მიერ დამტკიცებული მედიკამენტი არ არსებობს, აუცილებელია ამ საკითხში კარგად გარკვევა და შემდეგ გადაწყვეტა.

„როდესაც საზოგადოებას და ხელისუფლებას შორის იკვეთება გარკვეული გაუგებრობა, სამოქალაქო სექტორის ჩართულობას პრობლემური საკითხების გადაწყვეტაში ენიჭება განსაკუთრებული მნიშვნელობა. მით უმეტეს, როდესაც საქმე ეხება ბავშვების ჯანმრთელობას.

მერამდენე დღეა სახელმწიფო კანცელარიის შენობასთან შიმშილობენ იშვიათი დაავადება „აქონდროპლაზიით“ სინდრომის მქონე ბავშვების მშობლები. საუბარი მიდის ჯერჯერობით კვლევების სტადიაზე არსებული პრეპარატ „ვოსორიტიდ“-ის საქართველოში შემოტანის შესაძლებლობაზე. გამწარებულ მშობლებს, რა თქმა უნდა, აქვთ სრული უფლება, უნდობლობა გამოხატონ ქვეყნის ჯანმრთელობის სამინისტროს მიმართ, რა ტიპის ობიექტური მიზეზებიც არ უნდა ჰქონდეს აღნიშნული პრეპარატის ამ ეტაპზე შესყიდვებისაგან თავის არიდებას.

ვინაიდან არც ჩვენ ვართ სპეციალისტები აღნიშნულ საკითხებში, შესაძლებლობა გვაქვს კონსულტაციებისა და რეკომენდაციებისთვის მივმართოთ საქართველოში ჯანდაცვის მსოფლიო ორგანიზაციის ოფიციალურ წარმომადგენელს, ბატონ სილვიუ დომენტეს, რომლის კომპეტენტური განმარტებით ამ მომენტისთვის „ვოსორიტიდი“ არ შედის ჯანმო-ს სამედიცინო პრეპარატების ოფიციალურ რეესტრში.

სილვიუ დომენტეს ინფორმაციით, ამ ეტაპზე ესპანეთი ერთადერთი ევროპული ქვეყანაა, რომელმაც დაუშვა „ვოსორიტიდის“ გამოყენება. საფრანგეთმა დაუშვა პრეპარატთან „პილოტური“, სატესტო წვდომა. იტალიამ „ვოსორიტიდის“ საცდელი გამოყენებისას, დააფიქსირა ზომიერი წინსვლა, მაშინ როდესაც გერმანიაში სასურველი შედეგი დაფიქსირებული ვერ იქნა.

სილვიუ დომენტეს განმარტებით, ცალკეული „საპილოტე“ პროგრამების მიუხედავად, ჯანმო-ს არა აქვს შემუშავებული რეკომენდაციები აღნიშნული პრეპარატისთვის, რათა შესაძლებელი გახდეს მისი ჩართვა დაფინანსების სქემებში. 2020 წელს „ვოსორიტიდთან“ დაკავშირებით საექსპერტო შეფასების პროცესი შეაჩერა ინგლისმა და უელსმა, თუმცა უკვე წელს შესაძლოა ეს სამუშაოები განახლდეს. ირლანდიამ ეს პროცესი დაიწყო გასული წლის მიწურულს, თუმცა დღემდე ვერ მივიდა დასკვნების გამოტანამდე.

სილვიუ დომენტეს ინფორმაციით, ევროპის მიღმა, მაგალითად აშშ-ს-ა და იაპონიაში ამ პრეპარატის ეფექტურობის შესწავლა არც დაწყებულა და აღნიშნულ დაავადებას კურნავენ ქირურგიული ჩარევით და ზრდის ჰორმონალური თერაპიით. სავსებით შესაძლებელია, რომ ჯანმო-ს ესოდენ ამომწურავი ოფიციალური პოზიცია, ასევე უნდობლობას იწვევდეს დაავადებული ბავშვების მშობლებში. ამიტომ ალბათ ჩნდება აღნიშნულ პროცესებში სამოქალაქო სექტორიდან კიდევ ერთი ავტორიტეტული არბიტრის ჩართვის საჭიროება.

საქართველოში წლებია ფუნქციონირებს გაეროსთან არსებული ორგანიზაცია UNICEF-ის წარმომადგენლობა, რომლის ერთ-ერთი ძირითადი დანიშნულებაა: ბავშვთა კეთილდღეობისა და ჯანმრთელობის გაუმჯობესების მიზნით შესაბამისი სამსახურების ხელშეწყობა მათი განვითარების საქმეში. ამ ავტორიტეტულ ორგანიზაციას, ყოველგვარი ეჭვის გარეშე, ნამდვილად შეუძლია დატანჯულ და იმედგაცრუებულ მშობლებს მიაწოდოს საკუთარი კომპეტენტური დასკვნა, რა თქმა უნდა, საკითხის პროფესიონალურ დონეზე ყოველმხრივი შესწავლის შემდეგ.

სხვათა შორის, „ხალხის ძალის“ მიერ „უცხოური გავლენების შესახებ" კანონპროექტის შემუშავება მიზნად ისახავდა სწორედ ისეთი ტიპის გამჭვირვალობაზე ფარდის ახდას, სადაც უფრო კონკრეტული იქნებოდა სამოქალაქო სექტორის სექტორული და ფუნქციონალური დატვირთვებისადმი წვდომა. UNICEF Georgia-ს შემთხვევაში ჩვენი არჩევანი ემყარება უფრო ინტუიციას, ვიდრე ფაქტობრივ ცოდნას, რომ ჩვენი მიმართვის ადრესატი დაგვეხმარება ამ მეტად ფაქიზი და მგრძნობიარე დილემის გადაჭრაში“, - წერს facebook გვერდზე დავით ქართველიშვილი.